2 TAWARIKH 4 - WUKE SUSI WATTI'U AL᷊AL᷊USASSA

Manga saranapa su Wal᷊en Mawu

¹ Ratu Salomo nandolokka niapaola'a sambau mezbah wuassu witu'a, al᷊o'engnge wuṛṛu alal᷊akke sambau-sambau 9 metere, wuṛṛu atanggakke 4.5 metere.

² I tou lai nallanginnu sambau wensadda mal᷊imbulunna wuaasu perunggu, ringannu uuṛanne manansunna indi: alal᷊umme 2.2 metere, al᷊oangngu loṛṛangnge 4.4 metere, wuṛṛu al᷊imbulunne 13.2 metere.

³ Uapal᷊iwutta su liudde nilogaṛannu ruan daddaga hambarannu sapi, apan nicore suadio'a ringannu wensadda udde.

⁴ Wensadda udde niaddo su tapanna'u mapul᷊o dua sapi witu'a – tatallu uasaruanna watukku sawannakka, tatallu watukku timukka.

⁵ Aaappalu wensadda udde 75 milimetere. Winggine naal᷊ihidda wiwikku mangko apan uatul᷊ebbe watukku liudde naal᷊ihidda wunga bakung apan matti'akka. Wensadda udde wotongnge loṛṛoanna iṛaṛṛangngo 60.000 litere.

⁶ Ratu Salomo lai na'ola'a 10 mangko wahewalla, lima niaddo su samba'an timukku Wal᷊en Mawu, wuṛṛu lima lai su samba'a sawannakka. Manga mangko udde hunane pangukkasanna winatangnga apan sarun itambunna olaanna sasamba. Ua'e sulal᷊ummu wensadda wahewalla udde saddianna pangukkasannu manga imam.

^7-8 I tou lai na'ola'a mapul᷊o leddan sol᷊o wuassu wul᷊awanna tumuṛṛuttu saṛṛene apan buatte niṛṛiinna, wuṛṛu 10 medda. Anambon leddan sol᷊o wuṛṛu medda udde niaddo sulal᷊ummu wabbo'a paarorone su Wal᷊en Mawu – sambau-sambau eteudde lima su samba'a aiṛṛi, wuṛṛu lima lai su samba'a aikkatanna. I tou lai nallanginnu 100 mangko wul᷊awanna.

⁹ Ratu Salomo lai na'ola'a sambau panumbal᷊e sulal᷊umme, hunane aianannu manga imam, wuṛṛu sambau panumbal᷊e su liudde. Ngara su manga sasuttanna suwallatu panumbal᷊e darua udde nioosannu tembaga.

¹⁰ Wensadda niaddo maranin buune samba'a maṛṛai wuassu Wal᷊en Mawu.

^11-16 Huram, tembonannu manga mamanara udde, nallanginnu manga urinna, manga sikopo wuṛṛu manga mangko. Ne i tou nuddusse na'ola'a al᷊awo'u saranapan Wal᷊en Mawu ere buatte nipa'irene si Ratu Salomo. Indiwe manga saranapa apan buatte niolangnge udde: Darua diṛṛi masallaka Darua puan diṛṛi saṛṛene ere mangko apan niaddo su wowon darua diṛṛi udde Ṛate nianamma suapan puan diṛṛi 400 delima witu'a apan niatokka sulal᷊ummu darua raddage uapal᷊iwutta ṛate niamamma suapan puan diṛṛi 10 kereta 10 mangko wahewalla Wensadda perunggu 12 sapi witu'a apan uatumpilla wensadda udde Manga urinna, manga sikopo wuṛṛu manga saṛṛampangnga Anambon saranapa udde niola'i Huram hausannu Wal᷊en Mawu, niola'a wuassu witu'a wuṛṛu niraddassa na'oman sara lullendappa. Huram na'ola'a sarangkanambone udde ana waugu parentan Ratu Salomo.

¹⁷ Ratu nandolokka niapaola'a manga saranapa udde sutampa pamamosoannu atta'a suwallatu Sukot wuṛṛu Zereda su Wawal᷊annu Yordan.

¹⁸ Manga saranapa udde aroddi anambone, na'oman sara tawe saran sangkatou apan maasingkatta pira su kilone witu'a apan nipaatta.

^19-22 Ratu Salomo lai nandolokka niapal᷊anginnu manga saranapa waine wuassu wul᷊awanna tutune tadea'u iaddo su Wal᷊en Mawu. Indiwe manga saranapa apan nilanginne udde: Mezbah Medda pangimbeannu roti Anambon leddan sol᷊o ringannu sol᷊one wuassu wul᷊awanna tutune tadea'u re'omanna su saruannu Wabbo'a Lembon Susi, ere buatte niṛṛiinna Manga lal᷊ogakka saṛṛene ere bunga Manga sol᷊o Manga sasipitta Wawaresi sumbun sol᷊o Manga mangko Manga lama'a amania Manga lama'a human waṛṛa Anambon ngara suttanna su Wal᷊en Mawu wuṛṛu ngara Wabbo'a Lembon Susi nioosannu wul᷊awanna.