2 TAWARIKH 35 - WUKE SUSI WATTI'U AL᷊AL᷊USASSA

I Yosia nallaghu ramean Paskah

¹ Wua'udde i Yosia nallaghu ramean Paskah su Yerusalem, tadea'u ipangaddatta Mawu. Domba ipallaghu ramean udde pateanna su allo 14 su wul᷊anna paarorone.

² Yosia nattahia manara su manga imam apan ṛinone manaranni mangitou su Wal᷊en Mawu, wuṛṛu i tou nandolokka lai tadea'u i mangitou mammanara ringannu mapia.

³ Manga taumatan Lewi apan buatte niṛṛae iapa'imbe Mawu, wuṛṛu apan naola'a huru su Israel naasomba parenta indi wuassi Yosia, “Addoa'e Wantallu Paairen Mawu apan susi udde sulal᷊ummu Wal᷊en Mawu apan nipararisikki Ratu Salomo ana'i Daud. Ariete paingkati yamiu apia. Pangimbete Mawu Ruatanu wuṛṛu walahannu Israel al᷊aṛanang-Nge.

⁴ Pasaddiate su Wal᷊en Mawu tumuṛṛuttu manga wageangnge, uasul᷊ungngu tahian manara apan buatte tinantunni Ratu Daud wuṛṛu Ratu Salomo anangnge, si yamiu.

⁵ Atoṛṛa'e manga wageangnge udde aroddi olangnge na'oman sara sidutu wuassi yamiu piaddu uatatul᷊ungnga suapan ammul᷊annu taumatan Israel su Wal᷊en Mawu.

⁶ I yamiu ṛinone maṛṛata domba su ramean Paskah. Ana waugu udde pandiahite watangannu tadea'u wotongnge massubba Mawu, wuṛṛu riahite lai manga sasamba apan ṛinone ionggola su Mawu, tadea'u ringannu aroddi manga taumatan Israel waine wotongnge mappaamattu parentan Mawu apan niapasingkatta si Musa.”

⁷ Tadea'u manga taumata apan nirumanta su ramean Paskah udde wotongnge mangonggolu sasamban Paskah, i Ratu Yosia nangonggolu wianatangnge sassane anambone 30.000 domba, ana'u domba wuṛṛu ana'u ambinga, see lai 3.000 sapi esakka.

⁸ Manga mamanaran Yosia lai nangonggola su manga imam, wuṛṛu taumatan Lewi mawae aonggola wuassu tumanangnge. Manga mamanara apan nionggol᷊annu manara su Wal᷊en Mawu, eteudde Imam Wahewalla i Hilkia, wuṛṛu i Zakharia, see i Yehiel, ingana'a siri tallu indi nangonggolu su manga imam 2.600 ana'u domba wuṛṛu ana'u ambinga see 300 sapi esakka apan olaanna sasamba sulal᷊ummu ramea udde.

⁹ Manga piaṛṛa'u taumatan Lewi, eteudde: Konanya, Semaya, wuṛṛu Netaneel tuṛṛangnge, Hasabya, Yeiel, wuṛṛu Yozabad, nangonggola su taumatan Lewi 5.000 ana'u domba wuṛṛu ana'u ambinga see lai 500 sapi esakka maola'a sasamba sulal᷊ummu ramea udde.

¹⁰ Napawe sarangkanambone apan ipaatta su ramean Paskah nariahite, manga imam wuṛṛu manga ammul᷊annu taumatan Lewi nanganu tampane sambau-sambau ere buatte nirolokku ratu.

¹¹ Ana see i mangitou nakkata winatangnga apan ipaatta su ramean Paskah; taumatan Lewi nalluussa wuṛṛu manga imam nangalassu daṛṛan binatangnga udde su wowon mezbah.

¹² Suapan ammul᷊annu amonanna apan nirumanta isudde naasomba sambau wuassu manga winatangnga apan sarun ionggola maola'a sasamba itattambunna. Ringannu aroddi i mangitou napangonggolu sasamba tumuṛṛuttu atoranna apan uawoṛṛetta sulal᷊ummu wuke Titan Musa.

¹³ Ana see manga taumatan Lewi namangganga sasamban Paskah udde su putungnga, uasul᷊ungngu atoranna, wuṛṛu nallaha manga sasamba niṛṛae udde sulal᷊ummu urinna, wua'udde ṛemene mal᷊iha-l᷊ihakka tinahia su manga taumata.

¹⁴ Napawe manara udde nal᷊iudde, wakkute udde manga taumatan Lewi nanaddia wageangngi mangitou sassane wuṛṛu manga imam papapulunni Harun. Ana waugu maddatingngu ṛabbi manga imam sidutu mammanara mangngonggolu manga winatangnga maola'a sasamba itattambunna, wuṛṛu mannambunnu tawan manga sasamba udde.

¹⁵ Manga panden mananalangnga musikka wuassu ṛuanganni Asaf sulal᷊ummu ṛuanganni Lewi uarisikka isudde su tampa pammanaranna apan buatte niatokki Ratu Daud si mangitou. Eteindi manga aranni mangitou: Asaf, Heman, wuṛṛu Yedutun, sangkatou nabi apan mammanara ringannu ratu. Manga mandariaga ngara mal᷊oangnga imbaṛṛangnga manantangngu tampan mangitou, ana waugu i mangitou wotongnge mallaghu ramean Paskah sutampa pammanaranni mangitou ringannu lal᷊imannu taumatan Lewi waine.

¹⁶ Su allo udde i mangitou napaamattu manara apan nirolokki Ratu Yosia su ipallaghu ramean Paskah, nasutta lai manga sasamba su mezbah.

¹⁷ Pitu allo al᷊annune tumana'u Israel sarangkanambone apan nirumanta isudde mallaghu ramean Paskah wuṛṛu Roti Tawe Ragine.

¹⁸ Paskah ereudde taambe saran paassa nilaghu ro'en sutempo i Nabi Samuel. Tawe saran sangkatou wuassu manga ratu paarorone apan buatte nallaghu ramean Paskah ere buatte nilaghu

¹⁹ sulal᷊ummu tonna mapul᷊o ual᷊u sutempo i Yosia uaparenta, wuassu ratu udde sassane suadio'a ringannu manga imam, taumatan Lewi, taumatan Yehuda wuṛṛu Israel, see lai tumana'u Yerusalem.

Panguddusannu i Yosia namarenta

²⁰ Napawe i Ratu Yosia buatte nammanara sarangkanambone udde su Wal᷊en Mawu; Nekho ratun Mesir namiaṛṛa'u tantarane inai mapapangalo su Karkemis maranin Sal᷊ukku Efrat. Yosia maddea'a mapamo'a si tou,

²¹ arawe i Nekho nangirimmu tanata indi si Yosia, “Pangalo indi wal᷊inewe pangalo mamangalo si'o, ratun Yehuda! I ya'u nirumanta wal᷊inewe mando'appa si'o, ewe'e mando'appa manga see'u, wuṛṛu Ruata nandolo'u tadea'u mal᷊ihakka mammanara. Ruata uasamba'a si ya'u, ana waugu udde imbaṛṛangnga manal᷊are si Tou, ana waugu panginsueanne i'o sarun ṛimunsaan-Ne.”

²² Arawe i'o Yosia mangke maapulu lumawangnga, wuṛṛu maddiri tumuṛṛutta wisaran Duata wuassi Ratu Nekho. Yosia namal᷊u hati ana see napapangalo lai su wawal᷊annu Megido.

²³ Sulal᷊ummu pangalo udde i Ratu Yosia niaṛṛinoannu anaanna. Ana see i tou namarenta manga allangnge tadea'u i tou iapidda su liudde marau pangalo ana waugu lessane tumaniten wahewalla.

²⁴ I mangitou namasanna si Yosia wuassu keretane wuṛṛu niingkatta su kereta waine isudde, wua'udde niapidda watukku Yerusalem. I tou nate poiaroddi wuṛṛu nilabbinga su labbingu manga ratu. Tumana'u Yehuda wuṛṛu Yerusalem sarangkanambone lullal᷊on papatene udde.

²⁵ Nabi Yeremia namoṛṛettu sambau aantari lal᷊al᷊o si Ratu Yosia. Naddatingngu orassa indi aantari udde ta'e ipappaattu mangangantari su Israel, mawae ete esakka aroddi lai wawine, su ipannaungnga i mangitou lullal᷊on Yosia. Aantari udde buatte niwoṛṛetta sulal᷊ummu ammul᷊annu aantarin lal᷊al᷊o.

²⁶ Watti'a waine su ola'i Yosia, su ola'u darangngune su Mawu, wuṛṛu tatuṛṛunne su manga titan Mawu,

²⁷ aunne, su ola'u pabbiaṛṛanne wuassu panattaṛṛanne maddatingngu panguddusanne, buatte niwoṛṛetta sulal᷊ummu wuke Watti'u Mararatun Israel wuṛṛu Yehuda.