2 TAWARIKH 34 - WUKE SUSI WATTI'U AL᷊AL᷊USASSA

I Yosia ratun Yehuda

¹ Yosia uukke 8 tonna sutempo i tou naola'a ratun yehuda, wuṛṛu i tou namarenta su Yerusalem 31 su tonnane al᷊annune.

² Inolaanni Yosia maal᷊uassa naungngu Mawu; i tou nangaṛṛussa si Ratu Daud iupungnge, wuṛṛu matuṛṛutta anambon titan Duata ringannu ahewallu naungnge.

I Yosia nanginsue pasasubba paal᷊uanna

³ Napawe 8 tonna i Yosia naola'a ratu, su uukka ta'e dario'a, i Yosia nanattakke mattaṛṛamawu Ruata apan sassubbanni Ratu Daud iupungnge. Appattu tonna wua'udde i tou nanattakke nanggohakku manga tampa passubbanna paal᷊uanna, manga paal᷊uannu Monganni Asyera, wuṛṛu manga paal᷊uanna waine.

⁴ Manga paal᷊uanna wuṛṛu manga monganna udde nihohakku tantaran Yosia ana see omane nisal᷊iawukki mangitou su wowon labbingu manga taumata apan mangngonggolu sasamba su manga monganna udde. Manga mezbah Baal wuṛṛu manga mezbah amania isudde niṛṛa'an mangitou.

⁵ Wua'udde i Yosia nanutungnga su wowon mezbah udde duṛṛin manga imam apan mangngimbe paal᷊uanna udde. Ringannu aroddi Yehuda wuṛṛu Yerusalem niola'i Yosia apia mattaṛṛamawu su Mawu.

⁶ Inolaanna uasul᷊ungnga niolangnge lai su manga soa wuṛṛu su manga wageangngu leta'a apan nahohakke su wageangngu leta'i Manasye, Efraim, wuṛṛu Simeon, naddatingngu leta'i Naftali su sawannakka.

⁷ Manga mezbah wuṛṛu manga paal᷊uanni Asyera su ahewallu Araratuannu Sawannakka niṛṛa'an Yosia, ana see manga paal᷊uanne wuṛṛu anambon mezbah amania niṛṛimunsange. Wua'udde i Yosia napul᷊ete watukku Yerusalem.

Wuke Manga Titan Mawu niasombanganna apia

⁸ Su tonna mapul᷊o ual᷊u sutempo i Yosia uaparenta, napawe i tou buatte nanginsue pasasubbanna paal᷊uanna su Wal᷊en Mawu wuṛṛu su ahewallu wanua, i tou nandolokku siri 3 taumata iapaapia Wal᷊en Mawu Ruata. Siri tallu taumata eteudde i Safan ana'i Azalya, Maaseya gubernuren Yerusalem, wuṛṛu Yoah ana'i Yoahas, sangkatou mamanaran araratuanna apan atanggaṛṛanne.

⁹ Manga taumatan Lewi apan uariaga Ngaran Wal᷊en Mawu, nanantilla si Imam Wahewalla i Hilkia, roitta apan buatte niammulli mangitou. Roitta udde niroronganna wuassu taumatan Efraim wuṛṛu Manasye, wuṛṛu wuassu tumanangnge waine su Araratuannu Sawannakka, see lai wuassu tumana'u Yehuda, Benyamin wuṛṛu Yerusalem.

¹⁰ Ana see roitta udde tinantilli Imam Wahewalla i Hilkia singana'a siri tallu apan mammanara uariaga mangangapia Wal᷊en Mawu udde. Ana see i mangitou nangonggolu roitta udde

¹¹ su manga wasen kalu wuṛṛu maaola'a wal᷊en apan ṛinone ipamalli watu wuṛṛu alu ipangapia wal᷊en apan buatte niwalan manga ratun Yehuda niapahohakka.

¹² Manga taumata apan mammanara mangngapia wal᷊en udde atonna-tonna tawe mamahia. I mangitou ipappiaṛṛa'u siri appatta taumatan Lewi: Yahat wuṛṛu Obaja wuassu ṛuanganni Merari, see i Zakharia wuṛṛu Mesulam wuassu ṛuanganni Kehat. Manga taumatan Lewi sarangkanambone apan masingkatta mannalangnga musikka,

¹³ nionggol᷊annu manara niapariaga mallaṛṛootta manga aola'u wal᷊en, uapiaṛṛa'u manga mamanara wuassu al᷊awo'u hatin manara, manara mammoṛṛetta, wuṛṛu uariaga ngara.

¹⁴ Sutempo roitta sasumbala udde niapasabbangnga wuassu tampa pangangadoanne, i Hilkia naasangkalla wuke Titan Mawu, eteudde manga tita apan nionggolu Ruata si Musa.

¹⁵ Hilkia nabbisarate si Safan, “I ya'u naasangkalla wuke Titan Mawu su Wal᷊en Mawu,” ana see wuke udde nionggoli tou si Safan.

¹⁶ Safan nanengkamma wuke udde, ana see i tou inaite ringannu ratu wuṛṛu nabbisara, “Sarangkanambone apan buatte nirolokki Tuangnga buatte nimanaran kami.

¹⁷ Yami buatte nanganu roitta apan sasahipunanna su Wal᷊en Mawu wuṛṛu nionggola su manga mamanara wuṛṛu manga mandariagane.”

¹⁸ Wua'udde i tou nabbisara apia, “Hilkia nangonggolu wuke indi si ya'u.” Ana see i Safan nabbasate wuke udde su saruannu ratu.

¹⁹ Naaringikka lal᷊oṛṛon buke udde, ratu nanggesa'a laungnge ana waugu massusa.

²⁰ Wua'udde ratu nangonggolu parenta indi si Hilkia, Ahikam ana'i Safan, Abdon ana'i Mikha, Safan ruddutul᷊issu araratuanna wuṛṛu i Asaya daroloṛṛannu ratu,

²¹ “I yamiu roote paiwal᷊o Mawu, su ola'u i ya'u wuṛṛu manga taumata apan ta'e uatana'a su Israel wuṛṛu Yehuda su ola'u lal᷊oṛṛon buke indi. Mawu nasa'u si ite ana waugu al᷊amonan kite tawe napaamattu manga parenta apan uawoṛṛetta sulal᷊umme.”

²² Ne inaite i Hilkia, Ahikam, Abdon, Safan wuṛṛu Asaya naddorongnga tatantiro su sangkatou wawine aranne i Hulda. I tou sangkatou nabi apan uatana'a su ampungnga wakku su Yerusalem. Awingnge aranne i Salun ana'i Tikwa, oulunni Harhas. I tou uapadul᷊i laubbu patataṛṛamawu su Wal᷊en Mawu. Napawe i Hulda naaringikka i mangitou nanal᷊a'a,

²³ i tou nandolokki mangitou niapawelengnga ringannu ratu wuṛṛu niapawal᷊on tanata indi, “Mawu, Ruata apan sassubbannu taumatan Israel nabbisara,

²⁴ ‘I Ya'u sarun makkumannu Yerusalem wuṛṛu tumanangnge sarangkanambone ringannu tatal᷊a apan uawoṛṛetta sulal᷊ummu wuke udde apan buatte niwasa su saruannu ratu.

²⁵ I mangitou buatte nanantang-Ku wuṛṛu nangonggolu sasamba su manga mawu waine. Sarangkanambone apan buatte niola'i mangitou mangke naasa'u si Ya'u. I Ya'u nasa'u su Yerusalem, wuṛṛu asasa'u-U tawe umompo'a.

²⁶ Arawe su ola'i Ratu Yosia eteindi tanata-U, Mawu Ruatan Israel: Napawe i'o naaringikka lal᷊oṛṛone apan uawoṛṛetta sulal᷊ummu wuke udde,

²⁷ i'o sinumassilla wuṛṛu sinumallungngu watangannu su saruang-Ku. I Ya'u buatte namansaga sarun makkuumannu Yerusalem wuṛṛu tumanangnge, arawe napawe i'o naaringikka i Ya'u mammansaga, i'o nilumuai wuṛṛu nanggesa'a laungngu tatialan massusa. I Ya'u buatte naddaringikka aal᷊iomannu,

²⁸ ana waugu udde ṛuumanna su Yerusalem tawe Ta'u iaparanta amungkangu i'o ta'e wiakka. I'o sarun Ta'u iwala mate ringannu paddarame.’ ” Ne manga daroloṛṛanna udde nabelengke ringannu ratu wuṛṛu namasingkattu tanata udde.

I Yosia nakkiinnu paaire, tadea'u sidutu tuttuṛṛutta Mawu

²⁹ Ratu Yosia namaggo anambon piaṛṛa'u Yehuda wuṛṛu Yerusalem,

^30-31 ana see inaite suadio'a ringanni mangitou watukku Wal᷊en Mawu. Suadio'a ringanni mangitou tinumantalongnga lai manga imam, taumatan Lewi wuṛṛu anambon tumanangnge, mawae ete asiangnga aroddi taumata ala. Su saruanni mangitou sarangkanambone, maranin diṛṛin datu sassane, ratu dirumarsisikka wuṛṛu mabbasa ringannu tingikka ma'ikkatta lal᷊oṛṛon buke paaire apan buatte niasangkal᷊anna sulal᷊ummu Wal᷊en Mawu. Wua'udde ratu nakkiinnu paaire ringannu Mawu tadea'u sidutu tuttuṛṛutta si Tou wuṛṛu mappaamattu ringannu ahewallu naungnga wuṛṛu ṛimuudda anambon parenta wuṛṛu manga tita-Ne, see lai manuungngu atorannu paairen Mawu wuṛṛu al᷊aṛṛanang-Nge apan uawoṛṛetta sulal᷊ummu wuke udde.

³² Anambon taumata wuassu ṛuanganni Benyamin wuṛṛu anambon taumata waine apan uatana'a su Yerusalem nirolokki tou nakkiinnu paaire su Mawu tadea'u sidutu tuttuṛṛutta paaire udde. Ne manga taumatan Yerusalem tuttuṛṛutta manga atoranna sulal᷊ummu paaire udde, eteudde paaire suwallatti mangitou ringannu Mawu Ruatan al᷊amonan mangitou.

³³ Manga paal᷊uanna apan maarantinna, apan uaraddo su manga tampa nasutta su wageangngu leta'u Israel, sarangkanambone niṛṛimunsa'i Ratu Yosia. Ana see i tou namarenta tumanangnge mattaṛṛamawu Mawu, Ruatan al᷊amonan mangitou. Ne sutempo al᷊annune i Yosia wiakka, tumanangnge sidutu tuttuṛṛutta Mawu.