2 TAWARIKH 33 - WUKE SUSI WATTI'U AL᷊AL᷊USASSA

I Manasye ratun Yehuda

¹ Manasye uukke 12 su tonnane sutempo i tou naola'a ratun Yehuda ne i tou lai namarenta su Yerusalem 55 su tonnane al᷊annune.

² I tou na'ola'a rosa su lantakku hatin Mawu, ana waugu nangaṛṛussa manga anaramma lal᷊eo wuassu walahanna apan nilimbuaṛṛannu Mawu wuassu Kanaan sutempo taumatan Israel sinumuttate su wanua udde.

³ Manga tampa pasasubbanna paal᷊uanna apan buatte nihohakki Hizkia, iamangnge, niolangnge apia. I tou nallanginnu manga mezbah passubbanna si Baal, wuṛṛu nallanginnu manga paal᷊uanni Asyera, ana see lai massubba manga anumpitanna.

⁴ Mawu buatte nabbisara manungku maddatingngu mal᷊annu-l᷊annu ete Yerusalem udde maola'a tampa patataṛṛamawuanna si Tou, arawe poiaroddi su Wal᷊en Mawu udde, Manasye buatte nallanginnu manga mezbah passubbanna manga monganna.

⁵ Su rallakku Wal᷊en Mawu ruan ba'a udde i tou nallanginnu manga mezbah passubbanna anumpitanna.

⁶ Al᷊aṛṛanangnge niolangnge sasamba itattambunna su Wawal᷊annu Hinom. I tou lai naola'a taṛṛa pasangkadda, manani'atta, wal᷊iimmata, wuṛṛu maddorongnga tatantiro su manga ghaṛṛaho. I tou tumaniten narosa su lantakku hatin Mawu na'oman sara naasa'u Mawu.

⁷ Paal᷊uanna sassubbanna niaddone sulal᷊ummu Wal᷊en Mawu, sumbal᷊i su ola'u tampa udde Ruata buatte nabbisara si Daud wuṛṛu si Salomo anangnge, “Wal᷊e-U su Yerusalem indi, apan buatte Ta'u nipile suwallattu mapul᷊o dua leta'u ṛuangannu Israel, eteudde tampa apan Ta'u tinantunna maola'a tampa patataṛṛamawuanna si Ya'u saran mal᷊annu-l᷊annu.

⁸ Amungkangu ṛuangannu Israel maddaringikka anambon parenta-U wuṛṛu tuttuṛṛuta tita apan nionggola si Musa allang-Ku si mangitou, ne i Ya'u tawe mamalan mangitou limbuaṛṛanna wuassu wanua apan buatte Ta'u nionggola su iupungngi mangitou.”

⁹ Manasye naaola'a tumana'u Yerusalem na'ola'a manga rosa maddal᷊eoanna wuassu rosa apan buatte niola'u manga walahanna apan nilimbuaṛṛannu Mawu wuassu Kanaan sutempo al᷊aṛṛana'u Mawu sinumutta su wanua udde.

I Manasye pia awawal᷊u

¹⁰ Mawu nanaggu si Manasye wuṛṛu tumanangnge, arawe i mangitou maddiri maddaringikka.

¹¹ Ana waugu udde Mawu naparantan manga tembonannu tantaran Asyur niapapangalo Yehuda. Manasye sinamettu aaitta, ana see nimantungnga wuṛṛu niapidda watukku Babel.

¹² Sulal᷊ummu asasusane udde i tou sinumallungngu watanganne su saruannu Mawu Ruatane, wuṛṛu niumal᷊iomanna maddorongnga aontolu Mawu.

¹³ Ruata naddaringikka aal᷊iomanni Manasye wuṛṛu namelengngi i tou watukku Yerusalem iapaparenta apia. Ana waugu arariadianna udde Manasye nangimanna manungku Mawu eteudde Ruata.

¹⁴ Wua'udde i Manasye nananggakka darandungnga su liudde su samba'a ra'i Soan Daud. I tou nanattakka wuassu sambau tampa su wawal᷊anne maranin al᷊imatan ua'en Gihon ana see nasal᷊a watukku sawannakka naddatingngu Ngara Wahewallu Inassa wuṛṛu su wageangngu soa apan isassago Ofel. Su al᷊awo'u soa apan pia tatandange watu su Yehuda, i tou napatana'u sangkatou tembonannu tantara.

¹⁵ I tou nandammen manga paal᷊uannu mongannu walahanna waine see lai manga paal᷊uanna apan buatte niaddone su Wal᷊en Mawu. I tou nanggohakku manga mezbah pasasubbanna su wuiddu Wal᷊en Mawu, wuṛṛu su manga tampa waine su Yerusalem. Sarangkanambone udde niapidde watukku liuddu soa ana see niramme.

¹⁶ Wua'udde i tou nangapia mezbah tampa patataṛṛamawuanna Mawu, ana see nangonggolu sasamban paddarame wuṛṛu sasamban aadiangkamanna. Anambon taumatan Yehuda nirolokka mattaṛṛamawu Mawu Ruatan Israel.

¹⁷ Tumanangnge ta'e mangngonggolu sasamba su manga tampa pasasubbanna waine, arawe sasamba udde tuddane tumba'u su Mawu.

Panguddusanne i Manasye uaparenta

¹⁸ Watti'a waine su ola'i Manasye, wuṛṛu su ola'u aal᷊iomanne su Mawu, wuṛṛu manga tanatan Duata apan niapasingkattu manga nabi si tou ringannu arannu Mawu, Ruatan Israel, sarangkanambone buatte niwoṛṛetta sulal᷊ummu wuke Watti'u Mararatun Israel.

¹⁹ Sulal᷊ummu wuke Watti'u Manga Nabi buatte niwoṛṛetta lai aal᷊iomanni Manasye wuṛṛu sasimbakku Ruata su aal᷊iomanna udde, see lai watti'u manga rosane tantal᷊anna i tou taambe awawal᷊u, manga tampa pasasubbanna paal᷊uanna wuṛṛu manga paal᷊uannu Monganni Asyera apan nilanginne, wuṛṛu manga monganna apan sassubbanne.

²⁰ Manasye nate wuṛṛu nilabbinga su wal᷊en araratuanna. Amon anangnge naola'a ratu nallol᷊ossa si tou.

I Amon ratun Yehuda

²¹ Amon uukke 22 su tonnane sutempo i tou naola'a ratun Yehuda, wuṛṛu namarenta su Yerusalem rua tonna al᷊annune.

²² Nangaṛṛussa lai iamangnge i tou na'ola'a rosa su lantakku hatin Mawu. I tou massubba manga paal᷊uanna apan sassubbannu iamangnge wuṛṛu mangngonggolu sasamba su manga paal᷊uanna udde.

²³ Arawe uapapaṛṛalan iamangnge, Amon tawe sinumallungngu watanganne, wuṛṛu tawe nabbal᷊i'a ringannu Mawu; ewe'e i tou maddosanna wuassu iamangnge.

²⁴ Manga mamanaran araratuanni Ratu Amon naammulla nilumawangnga si tou wuṛṛu i tou nipate su wal᷊en araratuanna.

²⁵ Arawe tumana'u Yehuda namate lai manga taumata apan namate si Ratu Amon, ana see nanenegi Yosia anangnge naola'a ratu.