2 TAWARIKH 31 - WUKE SUSI WATTI'U AL᷊AL᷊USASSA

I Hizkia nangapia ola'u pangangagama

¹ Napawe ramea nuddusse, tumanangnge sarangkanambone inaite su al᷊awo'u soa su Yehuda, ana see nanggohakku manga pale pasasubbanna, naṛṛa'an manga paal᷊uanna apan niaparisikka hunan Mongannu Asyera, wuṛṛu nanggohakku manga mezbah see lai manga tampa passubbanna paal᷊uanna. I mangitou na'ola'a aroddi lai su manga tampa waine su Yehuda, see su wageangngu leta'i Benyamin, Efraim, wuṛṛu Manasye. Wua'udde i mangitou sarangkanambone napul᷊ete su wanuane sambau-sambau.

² I Ratu Hizkia nangatokku apia manga ammul᷊annu manga imam wuṛṛu taumatan Lewi tumuṛṛuttu tahia manaran mangitou. Manga manara eteudde: mangonggolu sasamba itattambunna wuṛṛu sasamban paddarame, mangangimben lal᷊aghu patataṛṛamawu su Mawu su al᷊awo'u tampa su Wal᷊en Mawu.

³ Wuassu winatangnga papadul᷊iananne sassane ratu nangonggolu manga winatangnga apan pappandumanna ipaatta su sasamba itattambunna suapan marua allo wuṛṛu waawallo, wuṛṛu su sasamba apan ionggola su allon Sabat, su ramean Bul᷊anna Wakku, wuṛṛu su manga ramea waine ere buatte tinantunna sulal᷊ummu manga titan Mawu.

⁴ Waine wua'udde lai ratu nandolokku tumana'u Yerusalem mangapiddu sasamba apan tinantunna su manga imam wuṛṛu taumatan Lewi, tadea'u i mangitou wotongnge maṛṛingiddu pangangimbe su Wal᷊en Mawu ere lai uawoṛṛetta sulal᷊ummu manga titan Mawu.

⁵ Napawe parenta udde buatte nial᷊iata, taumatan Israel nangapidda su Wal᷊en Mawu manga aonggolla wuassu hessin leta'i mangitou paarorone, eteudde taponna, anggore, lanan zaitun, pul᷊a wuṛṛu hessin leta'a waine. I mangitou lai nangapiddu sepeṛṛe mapul᷊o wuassu pussa'an mangitou.

⁶ Anambon taumata apan uatana'a su manga soan Yehuda uaapiddu sepeṛṛe mapul᷊o wageangnge wuassu winatangnga sapi wuṛṛu domba mangitou, wuṛṛu lai manambo manga aonggola waine, ana see sarangkanambone udde nionggola su Mawu Ruatan mangitou.

⁷ Manga aonggola udde mannattakke ruddanta su wul᷊anna atallune, na'oman sara su wul᷊anna appitune.

⁸ Naasilo aonggola apan manambo udde, i Ratu Hizkia wuṛṛu mamanara araratuanne mammatuga Mawu, wuṛṛu naddalo tumana'u Israel, al᷊aṛanang-Nge.

⁹ Sutempo ratu uahahatton manga imam wuṛṛu taumatan Lewi su ola'u manga aonggola udde,

¹⁰ Imam Wahewalla i Azarya papapulunni Zadok nabbisara, “Ro'en tumana'u soa nanguntuddu manga sasamban mangitou su Wal᷊en Mawu, yami tawe niapausannu anna, ewe'e lai nilumambalanna, na'oman sara si yami ta'e manambo anna uaraddo. Sarangkanambone udde nisengkammi yami ana waugu Mawu nangal᷊amatta al᷊aṛanang-Nge.”

¹¹ Wuassu parentan datu, i mangitou nanaddia manga wal᷊ingkakka maranin Wal᷊en Mawu,

¹² ana see nanahipunna anambon aonggola wuṛṛu sepeṛṛe mapul᷊o nitaṛṛo sulal᷊ummu wal᷊ingkakka udde. Sangkatou taumatan Lewi aranne i Konanya, nionggol᷊annu manarane mattaṛṛapa, wuṛṛu i Simei tuarine masasumbalane.

¹³ Su al᷊ungngu piaṛṛa'i mangitou pia siri 10 taumatan Lewi apan niapamanara eteudde: Yehiel, Azazya, Nahat, Asael, Yerimot, Yozabad, Eliel, Yismakhya, Mahat, wuṛṛu Benanya. Sarangkanambone udde tinantunnu tatantiron Ratu Hizkia wuṛṛu Imam Wahewalla i Azarya.

¹⁴ Kore ana'i Yimna, sangkatou taumatan Lewi apan naola'a tembonannu mandariaga su Ngara Wahewallu Ra'i su Wal᷊en Mawu, tinantil᷊annu manara mannengkamma manga aonggola apan ia'onggola su Mawu ana see i tou lai nattahiate.

¹⁵ Su manga soa waine tatanaannu manga imam, i Kore nisumbalannu manga taumatan Lewi waine eteudde: Eden, Minyamin, Yesua, Semaya, Amarya, wuṛṛu Sekhanya. Manga anna udde nitahia uasul᷊ungnga suwallattu rundussa taumatan Lewi mawae udde timmadde ara'e dario'a tumuṛṛuttu manaran mangitou.

¹⁶ Anambon taumata esakka apan uukke tallun pul᷊o su tonnane ire'e, apan naasomba manara su Wal᷊en Mawu, udde lai nionggol᷊annu wageangnge sambau-sambau tumuṛṛuttu manarane wuṛṛu ammul᷊anne.

¹⁷ Manga imam niwoṛṛetta tumuṛṛuttu ṛuanganne, wuṛṛu taumatan Lewi apan uukke 20 su tonnane ire'e niwoṛṛetta tumuṛṛuttu manarane wuṛṛu ammul᷊anne.

¹⁸ I mangitou sarangkanambone niwoṛṛetta suadio'a ringannu ana'a wuṛṛu awingnge, wuṛṛu manga taumata waine sulal᷊ummu wal᷊ene, ana waugu i mangitou ṛinone uasaddiate suapan tempo mappaamattu manga manaran mangitou hunan Mawu sassane.

¹⁹ Suwallatu manga imam apan uatana'a su manga soa apan tinantunna iapatana'a su papapulunni Harun, ara'e su manga wadda'a maranin soa udde, nipilete manga mamanara apan iapatahia anna su anambon esakka sulal᷊ummu amonannu imam, wuṛṛu su anambon taumata apan uawoṛṛetta sulal᷊ummu ṛuanganni Lewi.

²⁰ Su ahewallu Yehuda, i Ratu Hizkia napaamattu atatul᷊idda, tawe mallinga, wuṛṛu sidutu maal᷊uassa naungngu Mawu Ruatane.

²¹ I tou mammanara pia gessine, ana waugu al᷊awo'u inolaanne su Wal᷊en Mawu ara'e tatuṛṛutta su manga titan Mawu, niapaamanne ringannu ahewallu naungnga wuṛṛu ringannu darangngu su Mawu Ruatane.