2 TAWARIKH 30 - WUKE SUSI WATTI'U AL᷊AL᷊USASSA

Pananaddia Paskah

^1-5 Ramean Paskah taambe nilaghu tumanangnge sutempone eteudde sulal᷊ummu wul᷊anna paarorone, ana waugu manga imam apan buatte napasusin batanganne tumaniten matul᷊ungnga reenganne wuṛṛu ta'e matul᷊ungnga lai taumata apan uaammulla su Yerusalem. Ana waugu udde i Ratu Hizkia wuṛṛu manga mamanaran araratuanne see lai tumana'u Yerusalem nabbaidda mallaghu ramean Paskah sulal᷊ummu wul᷊anna aruane, ne i mangitou sarangkanambone mal᷊uassa ringannu hol᷊aga udde. Ana see ratu nangirimmu suratta su anambon taumata su ahewallu leta'u Israel wuṛṛu Yehuda. See lai su taumatan Efraim wuṛṛu Manasye. Walahannu Israel sarangkanambone wuassu wageangngu leta'u walahanni Dan su samba'a sawannakka maddatingngu Bersyeba su timukka, niwal᷊oanna tadea'u rumanta su Wal᷊en Mawu su Yerusalem mallaghu ramean Paskah wuṛṛu mangaddatta Mawu Ruatan Israel ere buatte niatokka sulal᷊ummu manga titan Musa. Taambe saran passa Paskah nilaghu ereudde.

⁶ Wuassu parentan datu wuṛṛu manga mamanaran araratuanne manga daroloṛṛanna nirolokke watukku ahewallu leta'u Yehuda wuṛṛu Israel niapaapiddu manga suratta apan tingikke ereindi: “Tumana'u Israel! I yamiu napallosse wuassu taṛṛinon taumatan Asyur. Orassa indi yamiu ṛinone mabelengnga mangaddatta Mawu, Ruata apan sassubbanni Abraham, Ishak wuṛṛu Yakub, tadea'u i Tou lai mabelengnga mangontolla si yamiu apia.

⁷ Ariewe ere iupungngu al᷊amonanu wuṛṛu manga taumatan Israel waine apan tawe maddaringikka Mawu Ruatan mangitou. I yamiu naasilote sassane ereapa awakkanne i Tou nakkuumanni mangitou.

⁸ Imbaṛṛangnga i yamiu mal᷊awangnga ere i mangitou, arawe paatuṛṛutte Mawu. Rantate watukku Yerusalem su Wal᷊en Mawu apan buatte niṛṛaen Mawu Ruatanu su watangan-Ne saran mal᷊annu-l᷊annu. Wette mattaṛṛamawu si Tou tadea'u umompo'e asasa'u-Ne su saruanni yamiu.

⁹ Amungkangu i yamiu mabelengnga mattaṛṛamawu su Mawu, ne manga taumata apan nangapiddu manga tuṛṛangngu naola'a taumata niatawanna, sarun umakkanna wuṛṛu mamalan mangitou iapapul᷊e apia. Mawu Ruatanu eteudde Ruata apan mapia wuṛṛu marangngu; i Tou sarun manarimmatti yamiu amungkangu i yamiu mabelengnga apia ringanni Tou.”

¹⁰ Napawe manga daroloṛṛanna udde inaite wuassu soa watukku soa su wageangngu leta'u ṛuanganni Efraim wuṛṛu Manasye naddatingngu sawannakka araune sara wageangngu leta'u ṛuanganni Zebulon i mangitou nilagge wuṛṛu nial᷊uandahanna.

¹¹ Arawe, pia lai manga taumata wuassu ṛuanganni Asyer, Manasye, wuṛṛu Zebulon maapulu rumanta su Yerusalem.

¹² Su Yehuda lai Ruata nammanara wuṛṛu nangaukku naungngu tumanangnge tadea'u atonna-tonna tumuṛṛutta apulun Duata ringannu tuttuṛṛutta lai manga parentan datu wuṛṛu mamanaran araratuanne.

Ramean Paskah

¹³ Su wul᷊anna aruane, mannamboanne wuassu reengannu tumanangnge naammulla su Yerusalem mallaghu Allo Wahewan Roti Tawe Ragine.

¹⁴ Manga mezbah su Yerusalem apan nipaatta pangangadoannu sasamba wuṛṛu panambunannu amania su manga monganna, sarangkanambone nianu wuṛṛu niramme su Wawal᷊annu Kidron.

¹⁵ Su allo 14 wul᷊anna udde i mangitou naṛṛata manga domba ionggola maola'a sasamban Paskah. Manga imam wuṛṛu manga taumatan Lewi apan ta'e marosa, nabbal᷊ite nassili. I mangitou napasusin batanganne na'oman sara wotongngete mangonggolu sasamba itattambunna su Wal᷊en Mawu.

¹⁶ I mangitou sangkatou-sangkatou na'inumma su Wal᷊en Mawu tumuṛṛuttu atoranna apan uawoṛṛetta sulal᷊ummu Wuken Manga Titan Musa. Daṛṛan manga sasamba udde tinantillu manga taumatan Lewi su manga imam, ana see nilal᷊inni mangitou su mezbah.

¹⁷ Manambo wuassu wallattu taumata apan uasemodda isudde taambe napasusin batanganne, nariaddi i mangitou imbaṛṛangnga maṛṛata domba maola'a sasamban Paskah. Ana waugu udde ete manga taumatan Lewi apan na'ola'a manara udde si mangitou wuṛṛu nangonggola su Mawu.

¹⁸ Wal᷊ine wuassu udde lai, suwallattu manga taumatan Efraim, manasye, Isakhar, wuṛṛu Zebulon, manambo apan nirumanta ringannu tawe napasusin batanganne asuene. Nariaddi, i mangitou mallaghun Paskah udde ringannu tawe suṛṛinone. Ana waugu udde i Ratu Hizkia niumal᷊iomanni mangitou, wisarane,

¹⁹ “Mawu Ruata raddaloannu al᷊amonan kami, antimanna wuassu apapian naung-Ngu, I'o mangampungnga si mangitou apan tantal᷊anna mattaṛṛamawu Si'o ringannu ahewallu naugnge, salaiwe i mangitou tawe napasusin batanganne.”

²⁰ Mawu naddaringikka aal᷊iomanni Hizkia. I Tou nangampungnga manga taumata udde, wuṛṛu tawe nakkuumanni mangitou.

²¹ Pitu allo al᷊annune, ringannu tumaniten lulluassa manga taumata apan uaammula su Yerusalem nallaghun ramean Roti Tawe Ragine. Allo-allo manga taumatan Lewi wuṛṛu manga imam maddalo Mawu ringannu atonna-tonna.

²² Manga taumatan Lewi apandene mamiaṛṛa'u patataṛṛamawu su Mawu, na'oman sara i Hizkia naddalo si mangitou. Napawe pitute allo al᷊annune i mangitou u'anna wiakku ramea udde see lai nangonggolu sasamba aadiangkamanna su Mawu, Ruatan al᷊amonan mangitou,

Ramea aruane

²³ i mangitou sarangkanambone nakkawessa manassu ramea udde 7 allo lai. Ana see i mangitou naddameate apia ringannu lulluassa.

²⁴ Ratu Hizkia nangonggolu 1.000 sapi esakka wuṛṛu 7.000 domba. Manga mamanaran araratuanni Hizkia nangonggolu 1.000 sapi esakka wuṛṛu 10.000 domba. Winatangnga sarangkanambone udde nionggola su tumana'u soa iapaṛṛata wuṛṛu inasanna. Tumaniten manambo imam napasusin batanganne.

²⁵ Tumana'u Yehuda, manga imam, manga taumatan Lewi, manga taumata apan nirumanta wuassu sawannakka, see manga taumata raho apan namanuate su leta'u Israel wuṛṛu Yehuda, sarangkanambone naapendamma al᷊al᷊uassa.

²⁶ Soa Yerusalem tumaniten marame, ana waugu ro'en i Salomo ana'i Daud uaparenta, taambe saran paassa pia arariadianna ereudde.

²⁷ Manga imam wuṛṛu taumatan Lewi naddorongnga tadea'u Mawu mangal᷊amatta tumanang-Nge, wuṛṛu wuassu tampa atatanaan-Ne su surga Ruata maddaringikka aal᷊iomanni mangitou see lai manengkamma darorongngi mangitou.