2 TAWARIKH 3 - WUKE SUSI WATTI'U AL᷊AL᷊USASSA

¹ i Ratu Daud buatte nanantunna manungku Wal᷊en Mawu ṛinone iapararisikka su Yerusalem su Wowon Moria su tampa pakkindanna ganduma pussa'an Arauna taumatan Yebus. Pandararisikku Wal᷊en Mawu udde tinattakki Ratu Salomo

² su wul᷊anna aruane tonna aiappanne sutempo i tou uaparenta.

³ Al᷊o'engngu wal᷊en udde 27 su metere wuṛṛu al᷊alakke 9 metere.

⁴ Al᷊o'engngu wabbo'a su saruanne nassul᷊ungngu al᷊alakku wal᷊en udde, eteudde 9 metere. Atanggakke 54 metere. Su wageangngu lal᷊ummu wabbo'a nioossu wul᷊awanna tutune.

⁵ Wabbo'a paarorone nirandungannu alu cemara apan apianne wuṛṛu nioossu wul᷊awanna maarega. Su aoossu wul᷊awanna udde niuitannu hambarannu alu palem wuṛṛu hambarannu ṛate.

⁶ Ratu nallogakka Wal᷊en udde ringannu watu permata apan angkapianne wuṛṛu wul᷊awanna nial᷊appa wuassu wanua Parwaim.

⁷ I tou nappaattu wul᷊awanna udde lai pinangoossa manga darandungngu Wal᷊en Mawu udde, manga sal᷊aba'une, manga sasuttanna su ngara wuṛṛu manga ngarane. Manga darandungnge ni'uittu hambarannu mala'ekatta.

⁸ Wabbo'a sulal᷊umme apan isassago Wabbo'a Lembon Susi al᷊o'engnge 9 metere wuṛṛu alal᷊akke 9 metere, uasul᷊ungngu al᷊alakku Wal᷊en Mawu udde. Daruan pul᷊o tonna wul᷊awanna nipaatta pinangoossa manga darandungngu Wabbo'a Lembon Susi udde

⁹ wuṛṛu 570 gramma wul᷊awanna niola'a pa'u. Darandungngu manga wabbo'a su ṛengkenne lai nioosannu wul᷊awanna.

^10-13 Ratu lai nandolokku manga mamanarane udde niapaola'a darua paal᷊uannu mala'ekatta wuassu logam. Manga paal᷊uanna udde nioosannu wul᷊awanna wuṛṛu niaddo uasasandiṛannu Wabbo'a Lembon Susi uasaruanna ngara. Suapan mala'ekatta udde pia darua papaidde, sambau-sambau al᷊o'engnge 2,2 metere. Manga papaidda udde nati'akka aroddi olangnge na'oman sara pentakku papaidde sambau uaa'eṛṛetta su pattangngannu wabbo'a wuṛṛu pentakke waine na'omaten darandungnga su aiṛṛi wuṛṛu aikkatanna. Nariaddi, manga papaidda udde uasiappakka al᷊o'engnge 9 metere eteudde alal᷊akku wabbo'a udde.

¹⁴ Su Wabbo'a Lembon Susi udde niola'a lai pampelene wuassu mal᷊aṛenessa linen wuṛṛu mal᷊aṛenessa waine lihidde ma'elomma, ungu wuṛṛu maṛṛamu. Pampele udde nilogaṛannu manga hambarannu mala'ekatta.

Darua diṛṛi masallakka niola'a wuassu witu'a

¹⁵ Ratu na'ola'a darua diṛṛi apan sambau-sambau al᷊o'engnge 15.5 metere, ana see nipasi'a su saruannu Wal᷊en Mawu. Suapan diṛṛi udde pia puane atanggakke 2.2 metere.

¹⁶ Su al᷊iurosone wuassu manga diṛṛi udde nilogaṛṛannu witu'a, eteudde ṛate nianamma ringannu 100 wuan delima.

¹⁷ Manga diṛṛi udde nipasi'a su samba'a aiṛṛi wuṛṛu aikkatannu ngara sasuttanna su Wal᷊en Mawu; su samba'a timukka aranne i Yakhin, wuṛṛu su samba'a sawannakka aranne i Boas.