2 TAWARIKH 29 - WUKE SUSI WATTI'U AL᷊AL᷊USASSA

I Hizkia ratun Yehuda

¹ Hizkia naola'a ratun Yehuda uukke 25 su tonnane, wuṛṛu i tou namarenta su Yerusalem 29 su tonnane al᷊annune. Inangngene aranne i Abia ana'i Zakharia.

² Hizkia inolaanne maal᷊uassa naungngu Mawu ere lai i Ratu Daud iupungnge.

I Hizkia napasusin Wal᷊en Mawu

³ Su wul᷊anna sambau su tonna paarorone i tou uaparenta, Hizkia namu'essa manga ngaran Wal᷊en Mawu wuṛṛu nandolokku taumata mangapia wal᷊en udde.

⁴ Manga imam wuṛṛu taumatan Lewi nirolokki Hizkia niapaammula su rallakka samba'a ra'i wuassu Wal᷊en Mawu,

⁵ wuṛṛu i tou nagahattote mangitou poiaroddi. I tou nabbisara, “I yamiu manga taumatan Lewi, ṛinone manantillu watangannu sassane su Mawu, wuṛṛu mapasusin Wal᷊en Mawu, Ruatan al᷊amonanu. Sarangkanambone apan maal᷊al᷊eo wal᷊en udde ṛinone iramme.

⁶ Al᷊amonan kite mal᷊awangnga Mawu Ruatan kite wuṛṛu inolaanni mangitou tawe maal᷊uassa naungngu Mawu. I mangitou tawe maddaringikka si Tou wuṛṛu tawe manaile tampa atatanaan-Ne.

⁷ I mangitou maṛṛuuddu manga ngaran Wal᷊en Mawu wuṛṛu namaddumma manga sasol᷊oanne. I mangitou tawe manambunnu amania su Wal᷊en Mawu, wuṛṛu tawe mangonggolu sasamba itattambunna su Ruata apan sassubbannu taumatan Israel.

⁸ Ana see Mawu sulal᷊ummu asasa'u-Ne nakkuumannu taumatan Yehuda wuṛṛu Yerusalem. Wuṛṛu i yamiu sarangkanambone masingkatta aroddi inolaannu Mawu maaṛindu'a wuṛṛu maata'utta.

⁹ Manga iamangngi ite nate sulal᷊ummu pangalo, wuṛṛu ana'a, awingngi ite niapiadda naola'a taumata niatawanna.

¹⁰ Orassa indi i ya'u maapulu ma'ola'a paaire ringannu Mawu Ruatan Israel, tadea'u i Tou tate masa'u lai si ite.

¹¹ Manga al᷊aṛṛana'u, ariete mallo'engnga allo, ana waugu ete nipilen Mawu iapataṛṛamawu wuṛṛu iapasubba si Tou lapiddu manambunnu amania wuṛṛu mamiaṛṛa'u tumanangnge mattaṛṛamawu.”

^12-14 Manga taumatan Lewi apan ua'ianna sutempo udde eteudde: Wuassu ṛuanganni Kehat: Mahat ana'i Amasai, wuṛṛu Yoel ana'i Azarya Wuassu ṛuanganni Merari: Kish ana'i Abdi, wuṛṛu Azarya ana'i Yehaleleel Wuassu ṛuanganni Gerson: Yoah ana'i Zima, wuṛṛu Eden ana'i Yoah Wuassu ṛuanganni Elisafan: Simri wuṛṛu Yeiel Wuassu ṛuanganni Asaf: Zakharia wuṛṛu Matanya Wuassu ṛuanganni Heman: Yehiel wuṛṛu Simei Wuassu ṛuanganni Yedutun: Semaya wuṛṛu Uzial.

^15-16 Wua'udde i mangitou nangammullu manga taumatan Lewi waine, ne i mangitou sarangkanambone napasusin batanganni mangitou. Wua'udde, wuassu parentan datu, manga imam sinumuttate sulal᷊ummu Wal᷊en Mawu wuṛṛu nanattakke mapasusi tumuṛṛuttu titan Mawu. Sarangakanambone apan lal᷊eo niapidda su liuddu rallakku Wal᷊en Mawu. Wua isudde niapiddu taumatan Lewi watukku Wawal᷊annu Kidron su liuddu soa.

¹⁷ Manara udde tinattakka su allo paarorone wul᷊anna paarorone. Su allo aual᷊une i mangitou buatte napasusin ahewallu rallakku Wal᷊en Mawu na'oman sara panumbal᷊e su saruanne. Wua'udde al᷊annune ual᷊u allo lai i mangitou napasusin ahewallu wal᷊en udde na'oman sara nuddussa su allo mapul᷊o annumma wul᷊anna udde lai.

Wal᷊en Mawu tinantilla apia su Ruata

¹⁸ Ana see manga taumatan Lewi udde nabbal᷊o si Ratu Hizkia, “Yami buatte napasusin Wal᷊en Mawu sarangkahewalle, nasutta lai mezbah sasamba itattambunna, medda pangangimbeannu roti, wuṛṛu anambon saranapane.

¹⁹ Yami lai buatte nanganu apia saranapa apan niingkatti Ratu Ahas sutempo i tou tawe maddaringikka Mawu sutempo i tou uaparenta. Anambon saranapa udde buatte niṛṛaen kami apia hunan Mawu, ne orassa indi uaddote su saruannu mezbah.”

²⁰ Ringannu tawe naṛṛaddo tumaniten mal᷊annu Ratu Hizkia nangammullu matatimmadu soa ana see inaite suadio'a i mangitou su Wal᷊en Mawu.

²¹ Su sasamba aampungnga rosa amonannu ratu wuṛṛu tumana'u Yehuda, wuṛṛu hunan mapasusin Wal᷊en Mawu, i mangitou nangapiddu 7 sapi esakka, 7 domba esakka, 7 ana'u domba, wuṛṛu 7 ambinga esakka. Ratu nandolokku manga imam papapulunni Harun mangapiddu manga winatangnga su wowon mezbah apan maola'a sambau sasamba itattambunna.

²² Manga sapi udde niṛṛata ana see manga imam nanebokku daṛṛane su mezbah. Wua'udde i mangitou na'ola'a aroddi lai su pitu domba wuṛṛu su pitu ana'u domba udde.

²³ Panginsueanne i mangitou nanganu manga ambinga udde wuṛṛu niapidda ringannu ratu wuṛṛu tumanangnge apan tantal᷊anna mattaṛṛamawu isudde, ana see i mangitou sarangkanambone nanaappu liman mangitou su wowon manga ambinga udde.

²⁴ Wua'udde ambinga niṛṛata manga imam ana see daṛṛane nilal᷊inna su mezbah maola'a sasamba aampungnga rosan tumanangnge sarangkanambone. Olangnge udde niola'i mangitou ana waugu ratu buatte namarenta tadea'u mallaghu sasamba itattambunna wuṛṛu sasamba aampungnga rosan anambon tumana'u Israel.

²⁵ Uasul᷊ungngu manga tatantiro apan nionggolu Mawu si Daud wuassi Nabi Gad, apan mammanara ringannu ratu wuṛṛu wuassi Nabi Natan, ratu napamanaran manga taumatan Lewi su Wal᷊en Mawu iapanalangnga kecapi wuṛṛu gambus,

²⁶ ere lai buatte nipaatti Daud. Ana see lai manga imam iapamanara isudde ringannu uaagassa trompeta.

²⁷ Hizkia nangonggolu tatialane tadea'u lal᷊aghun pangangonggolu sasamba itattakka. Tantal᷊anna sasamba ia'onggola, manga taumata mannattakke mangngantari maddalo Mawu, wuṛṛu manga mananalangnga musikka mattiuppe trompeta wuṛṛu hatin musikka waine.

^28-29 Ratu Hizkia wuṛṛu anambon taumata isudde niumal᷊intudda nassubba Mawu tantal᷊anna mangangantari sidutu mangngantari wuṛṛu manga mananalangnga musikka sidutu mammusikka na'oman sara anambon sasamba udde natutungnga abbi.

³⁰ Ratu wuṛṛu matatimmadu wanua nandolokku manga taumatan Lewi niapaantari iaparalo Mawu eteudde manga daralo apan niaṛṛa'i Daud wuṛṛu Nabi Asaf. Anambon taumata mangngantari ringannu lulluassa lapiddu niumal᷊intudda massubba Ruata.

³¹ Wua'udde i Hizkia nabbisara, “Ana waugu orassa indi yamiu buatte nipilen Mawu, ne maola'a sasamba aadiangkamanni yamiu, i yamiu ṛinone mangapiddu sasamba su Wal᷊en Mawu.” Ana see awadaalla apan uasemodda isudde nangapiddu manga sasamba udde, ewe'e piaddu lai ringannu al᷊al᷊uassu naungnge nangapiddu manga winatangnga maola'a sasamba itattambunna.

³² I mangitou nangapiddu 70 sapi esakka, 100 domba, wuṛṛu 200 ana'u domba ana see nionggola maola'a sasamba itattambunna hunan Mawu.

³³ I mangitou lai uaapiddu 600 sapi esakka wuṛṛu 3.000 domba maola'a sasamba wuṛṛu inasanni mangitou suadio'a apan uasemodda isudde.

³⁴ Manga imam apan buatte napasusin batanganne tumba'u matul᷊ungnga anambone ipalluussa anambon winatangnga udde. Ana waugu udde i mangitou nilal᷊imannu manga taumatan Lewi ana waugu taumatan Lewi lembon matuṛṛutta su atorannu mappasusi. I mangitou sidutu nallal᷊ima na'oman sara natipusse reengannu imam apan buatte napasusin batanganne.

³⁵ Waine lai wuassu sasamba itattambunna, manga imam nangonggolu tawa wuassu sasamba aadiangkamanna apan niinassu tumanangnge. I mangitou lai nangonggolu anggore apan nilal᷊inna suadio'a ringannu sasamba itattambunna udde. Etearoddi patataṛṛamawu su Wal᷊en Mawu nilaghu apia.

³⁶ Ne naungngi Ratu Hizkia wuṛṛu tumanangnge nal᷊uasse ana waugu sulal᷊ummu tempo apan mal᷊ihakka Ruata buatte nassumbala na'ola'a sarangkanambone udde.