2 TAWARIKH 26 - WUKE SUSI WATTI'U AL᷊AL᷊USASSA

I Uzia ratun Yehuda

^1-3 Napawe i Amazia natete, tumana'u Yehuda sarangkanambone namile si Uzia anangnge naola'a ratu. Sutempo udde ukke 16 su tonnane. Inangngene aranne i Yekholya, wawinen Yerusalem. Uzia namarenta su Yerusalem 52 su tonnane al᷊annune. Ete apan nangaṛṛo wuṛṛu na'ola'a apia soa Elot.

⁴ Ere lai iamangnge, i Uzia inolaanne maal᷊uassa naungngu Mawu.

⁵ Zakharia eteudde sangkatou mananantiro su pangangimanne. Su al᷊o'engngu i Zakharia ta'e mabbiakka, Uzia ringannu matuṛṛutta mattaṛṛamawu Mawu na'oman sara Mawu nangal᷊amatta si tou.

⁶ Uzia napapangalo nando'appa taumatan Filistin. I tou nanggohakku manga tanda'u watu su soa Gat, Yabne, wuṛṛu Asdod, ana see napararisikku manga soa pia tatandange watu maranin Asdod wuṛṛu su wageangnge waine su Filistin.

⁷ Ruata nantul᷊ungngi tou namaddo taumatan Filistin, wuṛṛu taumatan Arab apan uatana'a su Gur-Baal see lai taumatan Meunim.

⁸ Taumatan Amon mammaekku roitta wul᷊awanna si Uzia. I tou lembon mataṛṛino na'oman sara aranne tinumelengke naddatingngu wanua Mesir.

⁹ Su ipanohassa soa Yerusalem, i Uzia napararisikku wal᷊en matanggakka su Ngara Wahewan Buune, wuṛṛu su Ngara Wahewan Bawal᷊anne wuṛṛu su pabbuuannu darandungngu soa.

¹⁰ I tou lai napararisikku wal᷊en matanggakka pia tanda'a watune su wageangngu wadda'a, wuṛṛu naal᷊i manambo paṛṛihi ana waugu winatangnga papadul᷊iananne tumaniten manambo, mawae ete su leta'a uasendekka aroddi lai su leta'a ratakke su samba'a waṛṛatta. Ana waugu i tou pia ṛingidda su pabbail᷊anna, ne i tou napamanaran manambo taumata niapawaillu anggore su panenteanna, wuṛṛu niapawailla lai su manga wageangngu leta'a apan masuwukka.

¹¹ Uzia pia tantarane manambo apan uasaddiate mapapangalo. I mangitou pinaammul᷊annu manga tantara apan anambone iwaboṛṛettu ruan katou ruddutul᷊issu ratu, eteudde i Yeiel wuṛṛu i Maaseya su al᷊ungngu piaṛṛa'i Hananya, sangkatou suwallattu mamanaran araratuanna.

^12-13 Tantaran pangalo sarangkanambone udde pinaammul᷊annu 307.500 tantara nipiaṛṛa'u 2.600 tembonannu tantara. I mangitou sarangkanambone pia apulu apan wahewalla mapapangalo wuṛṛu massumbala ratu mamaddon seetta.

¹⁴ Uzia nanuungngu tantarane udde ringannu nionggol᷊annu allungnga, sambeangnga, araposa waja, laubba atta'a, darangeanna wuṛṛu anaanna see lai watu wawareta.

¹⁵ Su Yerusalem manga mapapanden lutangnga buatte nallanginnu sambau lutangnga apan wotongnge mamiti'u anaanna wuṛṛu manga watu wahewalla wuassu lal᷊ummu wal᷊en matanggakka, wuṛṛu su manga pabbuuannu darandungngu soa. Uzia tinumelengke su al᷊awo'u tampa wuṛṛu nabbal᷊ite lembon mataṛṛino ana waugu Ruata lembon mantul᷊ungngi tou.

I Uzia niṛṛuumanna ana waugu mawunga

¹⁶ Napawe i Ratu Uzia matohasse, i tou nabbal᷊i mawunga, wuṛṛu udde panattaṛṛannu nanawon araratuanne. I tou nilumawangnga parentan Mawu Ruatane ana waugu sinumutta su Wal᷊en Mawu manambunnu amania su wowon mezbah amania.

¹⁷ Arawe Imam Azarya suadio'a ringannu 80 su atoune imam waine apan matohassa wuṛṛu waṛṛani tinumantalongnga si tou

¹⁸ tadea'u manal᷊are inolaanne udde. I mangitou nabbisara, “Tuangnga Apan Mawantuga! Tuangnga tawe suṛṛinone manambunnu amania ipassubba Mawu. Udde manaran manga imam papapulunni Harun, ana waugu ete i mangitou sassane apan niapamanara manara udde. Ṛinone i Tuangnga manantangngu tampa susi indi! Tuangnga nilumawangke Mawu Ruata, wuṛṛu tate lai maasomba al᷊aman-Ne.”

¹⁹ Sutempo udde i Uzia tantal᷊anna uarisikka maranin meddan amania su Wal᷊en Mawu ringannu anutungnga dare'omma amania su limane. I tou nasa'u su manga imam udde, wuṛṛu inaṛṛombanganne nilumattote radda'a su pisi apan maarantinna su pakkanne.

²⁰ Azarya wuṛṛu manga imam waine naasilo si tou ringannu niṛṛumoro, ana see i tou niwata'a tadea'u manantangngu Wal᷊en Mawu. Ne i tou nasasaṛṛawutta sinumabbangnga ana waugu Mawu buatte nakkuumanne.

²¹ Na'oman sara i Ratu Uzia nate raddangnge udde tawe napia. I tou niapatana'a sassane su sambau wal᷊en wuṛṛu tate niwala lai sumutta su Wal᷊en Mawu. I tou tate nionggol᷊annu manara, ne i Yoyam anangnge namarenta tumanangnge uatepelle si tou.

²² Watti'a waine su ola'u pamamarentan Ratu Uzia, buatte niwoṛṛetti Nabi Yesaya ana'i Amos.

²³ Napawe natete, i Uzia nilabbinga su leta'a maranin labbingu manga ratu, arawe tawe su labbinga udde sassane, ana waugu i tou pia radda'a su pisi apan maarantinna. Yotam anangnge naola'a ratu nallol᷊ossa si tou.