2 TAWARIKH 25 - WUKE SUSI WATTI'U AL᷊AL᷊USASSA

I Amazia ratun Yehuda

¹ Amazia naola'a ratu sutempo uukki tou 25 su tonnane, wuṛṛu i tou namarenta su Yerusalem 29 su tonnane al᷊annune. Inangngene eteudde Yoadan wuassu Yerusalem.

² Inolaanni Amazia maal᷊uassa naungngu Mawu, arawe tawe ringannu ahewallu naungnga.

³ Tawe nal᷊annu napawe araratuanne natohasse, i tou namate manga mamanaran araratuanne apan namate iamangnge.

⁴ Arawe al᷊aṛṛana'u manga mamanaran araratuanna udde tawe nipatene, ana waugu i tou naddaringikka parentan Mawu sulal᷊ummu Wuken Musa apan tingikke arendi, “Imbaṛṛangnga mamate timmadde ana waugu pasasal᷊a apan niola'u al᷊aṛṛanangnge, wuṛṛu imbaṛṛangnga mamate al᷊aṛṛana'a ana waugu pasasal᷊a apan niola'u hagurangngi mangitou suapan taumata tumba'u wotongnge pateanna ana waugu pasasal᷊a apan niolangnge sassane.”

Pangalo nando'appa Edom

⁵ Ratu Amazia nangammullu anambon taumata wuassu ṛuanganni Yehuda wuṛṛu Benyamin ana see nandolokki mangitou niapararisikka tumuṛṛuttu ṛuanganne sambau-sambau, su piaṛṛa'u sangkatou tembonannu tantara maṛṛasutta. Wua'udde i tou namile manga taumata apan uukke 20 su tonnane ire'e apan wotongnge mapapangalo wuṛṛu pande mappaattu sambeangnga wuṛṛu allungnga. I mangitou anambone 300.000 su atoune.

⁶ Wal᷊ine wua'udde lai i tou namaekka 100.000 tantara wuassu Israel ringannu wawaekke iraṛṛangngo 3.400 su kilone sal᷊a'a.

⁷ Arawe sangkatou nabi nirumanta ringannu ratu wuṛṛu nabbisara, “Imbaṛṛangnga mappaattu manga tantataran Israel udde, ana waugu Mawu tawe mantul᷊ungngu taumatan Israel apan wuassu Araratuannu Sawannakka udde.

⁸ Arawe amungkangu i Tuangnga mangke mappaatti mangitou, Ruata sarun mamalan Tuangnga iawaddon seetta salaiwe tantaran Tuangnga matohassa wuṛṛu waṛṛani. Ana waugu tumba'u Ruata pia taṛṛino mangonggolu auntunganna ara'e arugianna.”

⁹ “Arawe ereapa ringannu anambon sal᷊a'a apan buatte ta'u nionggola si mangitou?” aiwal᷊on Amazia. Nabi udde sinumimbakka, “Mawu wotongnge mamelengnga mannamboanna lai wua isudde!”

¹⁰ Ana waugu udde Amazia namallose manga tantara apan niwaeṛṛanna udde wuṛṛu niapapul᷊ete watukku wanuane. Ne i mangitou napul᷊ete, arawe ringannu tumaniten nasa'u.

¹¹ Amazia nattumbaṛṛanin batanganne wuṛṛu nangapiddu tantarane watukku Wawal᷊annu Asin. Poiaroddi i mangitou napapangalo lapiddu naapate 10.00 su atoune tantaran Edom.

¹² Mapul᷊o ṛiwu waine niatawanna. I mangitou niapidda su puiddu wowon batu su soa Sela ana see tinuntungnga inawa na'oman sara nate.

¹³ Tantal᷊anna udde manga tantaran Israel apan buatte niapapul᷊en Amazia, wuṛṛu tawe niwala mapapangalo, namangalote manga soan Yehuda suwallattu Samaria wuṛṛu Bet-Horon. I mangitou namate 3.000 su atoune lapiddu nangaṛṛo manambo saranapa.

¹⁴ Napawe buatte namaddon tantaran Edom, Amazia napul᷊ete ringannu uaapiddu paal᷊uanna sassubbannu taumatan Edom wuṛṛu sinahipunna su Yehuda. Ana see i tou nanambunnu amania su manga paal᷊uanna udde udde lapiddu nassubba si tou.

¹⁵ Inolaanne udde naasa'u naungngu Mawu. Mawu nandolokku sangkatou nabi inai ringanni Amazia. Nabi udde nabbisara, “Anio i Tuangnga massubba mongannu walahanna waine apan tawe maapanal᷊amatta walahanna sassane wuassu taṛṛinon Tuangnga?”

¹⁶ “Paal᷊annabba,” unni Amazia, “Amungkangu tawe, yami sarun mamate si'o! Tawe saran paassa yami namile si'o maola'a mananantiron datu!” Ne nabi udde nallannabbe, arawe paarorone i tou naawisara, “Orassa indi ya'u masingkatta manungku Ruata buatte nakkawessa mamate si Tuangnga ana waugu inolaanni Tuangnga udde, wuṛṛu ana waugu i Tuangnga maddiri maddaringikka tatantiro'u.”

Yehuda napapangalo nando'appa Israel

¹⁷ Amazia ratun Yehuda ringannu manga mananantirone naammule mando'appa Israel. I tou nandolokku daroloṛanna inai ringanni Yoas ratun Israel, ana'i Yoahas, pulunni Yehu, tadea'u mando'appa si tou mapapangalo.

¹⁸ Arawe i Ratu Yoas nangirimmu sasimbakke indi, “Su sambau tempo anggaṛṛumunanna pia ṛoangnge su Wowon Libanon nangirimmu darorongnga indi su alu cemara, ‘Ei, alu cemara, onggol᷊a'ewe anangngu maṛṛuala maola'a awingngu ana'u.’ Arawe wua'udde sinumabbite sambau winatangngu ahuranganna apan nakkinda anggaṛṛumunanne apan pia ṛoangnge udde.

¹⁹ I'o Amazia, tuttal᷊umama manungku i'o buatte namaddon taumatan Edom, arawe mappianne i'o paatana'e su wal᷊en. Ipa'ura uaradea'a hatto apan tumba'u manilaka watangannu wuṛṛu tumanangngu?”

²⁰ Arawe Amazia, ratun Yehuda tawe maddaringikka manga wisaran Yoas ratun Israel. Wuṛṛu Ruata mangke mappandumma tadea'u Amazia iawaddo ana waugu i tou buatte nassubba paal᷊uannu taumatan Edom.

²¹ Ana waugu udde i Yoas inaite ringannu tantarane watukku Bet-Semes wuṛṛu napapangaloten Amazia poiaroddi.

²² Tantaran Yehuda niawaddo wuṛṛu anambon tantarane tinumal᷊angnga napul᷊e watukku wal᷊ene sambau-sambau.

²³ Yoas nanametta si Amazia wuṛṛu niapidda watukku Yerusalem, ana see nanggohakku manga darandungu soa udde al᷊o'engnge iraṛṛangngo 200 metere, manattakka wuassu Ngara Wahewan Efraim maddatingngu Ngara Wahewan Buune.

²⁴ Anambon wul᷊awanna wuṛṛu sal᷊a'a see manga saranapa apan niasombanganna su Wal᷊en Mawu wuṛṛu saranapa apan rariaganni Obed-Edom, wuṛṛu lai manga saranapan araratuanna suadio'a ringannu sire pira taumata niatawanna niapiddi Yoas watukku Samaria.

²⁵ Napawe i Yoas ratun Israel natete, Amazia ratun Yehuda ta'e lai nabbiakka 15 su tonnane.

^26-28 Ro'en i Amazia nanantangngu Mawu, taumata nabbaidde lumawangnga si tou su Yerusalem. Ana waugu udde i tou tinumal᷊angnga watukku soan Lakhis, arawe manga seenne nangenggenna si tou poiaroddi wuṛṛu namate si tou. Winal᷊unanne niluranna su awal᷊o ana see niapidda watukku Yerusalem, wuṛṛu nilabbinga su labbingu manga ratu su Soan Daud. Watti'a waine su ola'i Ratu Amazia wuassu panattaṛanne maddatingngu panginsueannu pamamarentane niwoṛṛetta sulal᷊ummu wuke, Watti'u Mararatun Yehuda wuṛṛu Israel.