2 TAWARIKH 21 - WUKE SUSI WATTI'U AL᷊AL᷊USASSA

¹ Yosafat nate wuṛṛu nilabbinga su Soan Daud. Yehoram anangnge naola'a ratu nallol᷊ossa si tou.

I Yehoram Ratun Yehuda

² Yehoram ana'i Yosafat, ratun Yehuda, pia siri annumma tuṛṛangnga esakka: Azarya, Yehiel, Zakharia, Azariahu, Mikhail, wuṛṛu Sefaca.

³ I mangitou naasomba manambo wul᷊awanna, sal᷊a'a wuṛṛu manga saranapa maarega waine wuassu iamangngi mangitou, wuṛṛu sangkatou-sangkatou lai nionggol᷊annu sambau soa pia tanda'a watu su Yehuda. Arawe ana waugu Yehoram ana'a esakka pahul᷊une, ete i tou apan nitantunni Yosafat maola'a ratu.

⁴ Sutempo i Yehoram naapendamma araratuanne matohasse, i tou nandolokku taumata niapapate anambon manga tuṛṛangnge, wuṛṛu manga pira lai mamanaran araratuanna apan atanggaṛṛanne.

⁵ Yehoram naola'a ratu su uukka 32 su tonnane, wuṛṛu i tou uaparenta su Yerusalem 8 tonna al᷊annune.

⁶ I tou nangaṛṛussa ola'u pabbiaṛṛanni Ratu Ahab wuṛṛu manga ratun Israel waine, ana waugu i tou naawingngu sangkatou ana'i Ahab. I tou narosate su lantakku hatin Mawu,

⁷ arawe Mawu maddiri mamate ratu papapulunni Daud ana waugu I tou buatte na'ire manungku papapulunni Daud sarun uatatana'a uaparenta.

⁸ Sulal᷊ummu parentan Yehoram, Edom namangalo wuṛṛu na'ola'a araratuanna sassane.

⁹ Ana waugu udde i Yehoram wuṛṛu manga tembonannu tantarane sinumabbangke ringannu manga keretan pangalone ana see namangalote Edom, arawe ṛabbine i mangitou naal᷊assangnga wuassu pangalo seetta wuṛṛu tinumal᷊angngu watanganne.

¹⁰ Nanattakka orassa udde Edom tate uasuṛṛubbawa su Yehuda. Sutempo udde soa Libna lai namangalo. Sarangkanambone udde nariaddi ana waugu Yehoram buatte nanantangngu Mawu, Ruata apan sassubbannu al᷊amonane.

¹¹ Ewe'e i tou napararisikku manga tampa passubbanna paal᷊uanna su panenteannu Yehuda, wuṛṛu naarosa lai tumana'u Yehuda wuṛṛu Yerusalem su lantakku hatin Mawu.

¹² Ana see i Yehoram naasomba sangkul᷊appa suratta apan niwoṛṛetti Nabi Elia sutempo ta'e wiakka. Arendi tingikku suratta udde, “Mawu, Ruata apan sassubbanni Daud, sarun makkuumanni Tuangnga ana waugu i Tuangnga tawe nangaṛṛussa wal᷊iuddu iamangnga wuṛṛu iupungngi Tuangnga.

¹³ Ewe'e lai i Tuangnga mabbiakka naal᷊ihidda manga ratun Israel, wuṛṛu naaola'a tumana'u Yehuda wuṛṛu Yerusalem tate maddaringikka Mawu. Inolaanni Tuangnga naal᷊ihidda i Ratu Ahab wuṛṛu manggahantine waine. Ewe'e lai i Tuangnga namate manga tuṛṛangngi Tuangnga, wutte'e i mangitou mappianne wuassi Tuangnga.

¹⁴ Ṛuumanna apan mawakkatta wuassu Mawu sarun maṛṛia'a su tumana'u soa, al᷊aṛṛana'a ana see lai manga awingngi Tuangnga, wuṛṛu mamate sarangkanambone apan tatahuananni Tuangnga.

¹⁵ I Tuangnga sassane lai sarun matataṛṛangnga radda'a tinai apan mallannu maggewalla!”

¹⁶ Sutempo udde pia taumatan Filistin wuṛṛu taumatan Arab apan uatana'a maranin pamamanuannu taumatan Sudan su leta'u apanne. Mawu nangal᷊oren naungngu manga taumata udde tadea'u iapapangalo si Yehoram.

¹⁷ I mangitou namangalo Yehuda, nangaṛṛo wal᷊en araratuanna, ana see nangapiddu anambon ana'a wuṛṛu awingngi Yehoram naola'a taumata niatawanna, tumba'u i Ahazia anangnge esakka atuarianne apan nal᷊iudda.

¹⁸ Napawe nal᷊iudde anambon arariaddianna udde, Mawu nakkuumanni Yehoram ringannu radda'a su tinai apan tawe mapia.

¹⁹ Al᷊annune maranin rua tonna radda'a udde aatambanna na'oman sara panginsueanne ringannu tumaniten uatataṛṛangnga i tou nate. Tumanangnge tawe nande'omma pandu'a maola'a sambau tatiala lullal᷊o ere lai buatte niola'u iupungngu al᷊amonane.

²⁰ Tawe saran sangkatou apan sinumassillu papatene. I tou nilabbinga su Soan Daud, arawe tawe sulal᷊ummu labbingu manga ratu. Sutempo i tou naola'a ratu, Yehoram uukke 32 su tonnane, wuṛṛu i tou namarenta su Yerusalem 8 su tonnane al᷊annune.