2 TAWARIKH 2 - WUKE SUSI WATTI'U AL᷊AL᷊USASSA

Pandariahi mandarisikku Wal᷊en Mawu

¹ I Ratu Salomo buatte nakkawessa mapararisikku Wal᷊en Mawu, wuṛṛu sambau wal᷊en araratuanna.

² Ana waugu udde i tou napamanaran 70.000 su atoune niapaal᷊appa aola'u wal᷊en, 80.000 su atoune niapapaangnga watu su wowone wuṛṛu 3.600 su atoune mandore iapal᷊u'adda manara udde.

³ Salomo nandohon batti'a indi si Hiram ratun Tirus, “Ṛinone i Tuangnga mangatokku paddaragangnga ringangku ere lai niola'i Tuangnga si Daud iamangku. Tuangnga buatte nabbal᷊u'u alun cemaran Libanon si tou niapaola'a wal᷊en araratuanne.

⁴ Orassa indi ya'u mapararisikku sambau wal᷊en patataṛṛamawuanna apan tumba'u ipangaddatta Mawu Ruata'u. Su wal᷊en udde i ya'u wuṛṛu tumana'u araratuangku sarun mattaṛamawu si Tou ringannu manambunnu amania mawangngi, lapiddu mangonggolu roti ia'imbe si Tou sumiallo-miallo. Su wal᷊en udde lai yami sarun mangonggolu sasamba itattambunna suapan marua allo wuṛṛu maṛṛabbi, suapan allon Sabata, allo wahewa Wul᷊anna Wakku wuṛṛu allo waine apan buatte niṛṛae tumba'u ipangaddata Mawu Ruatan kami. Ana waugu, i Tou buatte namarenta tadea'u olangnge udde sarun iapaamattu taumatan Israel saran mal᷊annu-l᷊annu.

⁵ I ya'u maapulu tadea'u Wal᷊en Mawu apan sarun ta'u iapararisikka udde maola'a sambau wal᷊en apan mawantuga, ana waugu Ruatan kami mabbantuhanna wuassu al᷊awo'u mawu waine.

⁶ Arawe suṛṛinone, tawe saran sangkatou apan wotongnge mapararisikku Wal᷊en Mawu, ana waugu ahewallu winalanganna tawe tumaniten bahewalla maola'a tatanaan-Ne. Nariaddi, Wal᷊en Mawu apan ta'u iapararisikka udde asinungka tumba'u tampa panambunannu amania su Mawu!

⁷ Ana waugu udde, ṛinone i Tuangnga mandolokku sangkatou taumata pande manguitta alu wuṛṛu wotongnge mammanara wul᷊awanna, sal᷊a'a, witu'a, atta'a see lai pande mandadu'a mal᷊aṛenessa ma'elomma, willossa wuṛṛu maṛṛamu. I tou sarun mammanara su sambau ringannu manga taṛṛa manaran Yehuda wuṛṛu Yerusalem apan buatte nipilen iamangku Daud.

⁸ I ya'u masingkatta manungku manga mananuwangnga alu su wanuan Tuangnga, masingkatta manuwangnga alu, ana waugu udde ṛinone i Tuangnga mangonggolla si ya'u al᷊awo'u hatin alu cemara wuṛṛu alu cendana wuassu Libanon. I ya'u sarun mandolokku manga taumata'u iapalal᷊ima manga taumatan Tuangnga,

⁹ tadea'u i mangitou manaddia manambo alu mangkasallakka. Ana waugu Wal᷊en Mawu apan ta'u iapararisikka udde ṛinone wahewalla wuṛṛu matohassa.

¹⁰ Apan maola'a wal᷊unnu manga taumatan Tuangnga udde sarun ta'u iiringnga si Tuangnga darua hatin ganduma, sambau-sambau 2.000 su tonnane, anggore anambone 400.000 su litere wuṛṛu lanan zaitun 400.000 su litere.”

¹¹ Su ipabbal᷊issa suratti Ratu Salomo udde, Ratu Hiram nangirimmu suratta lai tingikke arendi, “Ana waugu Mawu marangngu al᷊aṛṛanang-Nge, i tou buatte namile si Tuangnga maola'a ratun mangitou.

¹² Dalo su Mawu Ruatan Israel, Nandiaddi langitta wuṛṛu runia! I tou nangonggolla si Daud sangkatou ana'a esakka apan lembon pia asingkatta wuṛṛu pande, apan orassa indi tantal᷊anna mattinsahadda mapararisikku Wal᷊en Mawu, wuṛṛu wal᷊en araratuanne.

¹³ Ringannu udde i ya'u mandolokku taumata ringanni Tuangnga sangkatou pia asingkatta apan pande wuṛṛu taṛṛa manara, aranne i Huram.

¹⁴ Inangngene wuassu ṛuanganni Dan, iamangnge taumatan Tirus. I tou pande mallanginnu manga saranapa wuassu wul᷊awanna, sal᷊a'a, witu'a, atta'a, watu wuṛṛu alu. I tou lai wotongnge mammanara mal᷊aṛenessa ma'elomma, willossa, maṛṛamu wuṛṛu lai mal᷊aṛenessa linen. Al᷊awo'u hatin manara mangnguitta wotongnge olaanne tumuṛṛuttu al᷊awo'u saṛṛe apan ipaapulu. Mappianne i tou irolokke iapamanara su sambau ringannu manga taṛṛa manaran Tuangnga, wuṛṛu ringannu taumata apan buatte nammanara ringanni Ratu Daud iamangngi Tuangnga.

¹⁵ Yami ete ual᷊aṛaddo daroho darua hatin ganduma, anggore wuṛṛu lanan zaitun apan pina'iren Tuangnga udde.

¹⁶ Yami sarun manuwangnga alu cemara wuassu leta'u panenteannu Libanon suapan pappandumanni Tuangnga, ana see wa'isanna maola'a ṛumbanna, wuṛṛu iapa'elekka su tahal᷊oangnga maddatingngu Yope. Wua poiaroddi i Tuangnga wotongnge mangapidda watukku Yerusalem.”

Pandararisikku Wal᷊en Mawu nitattakka

¹⁷ Ratu Salomo na'ola'a pandareengnga su anambon taumata raho apan uatana'a su Israel, ere lai buatte niola'i Ratu Daud iamangnge. Inauranna pia 153.600 su atoune taumata raho.

¹⁸ Pitun pul᷊o su ṛiwune wuaassi mangitou niapamanara makkuwo manga aola'u wal᷊en, 80.000 su atoune niapapaangnga watu su panenteanna, wuṛṛu 3.600 su atoune niapariaga wuṛṛu niapal᷊u'adda manara udde.