2 TAWARIKH 19 - WUKE SUSI WATTI'U AL᷊AL᷊USASSA

I Yosafat tinaguannu sangkatou nabi

¹ Napawe Yosafat ratun Yehuda nabelengke ringannu sal᷊amatta su wal᷊en araratuanne su Yerusalem,

² sangkatou nabi aranne i Yehu ana'i Hanani nirumanta sinumaruanna ratu. Nabbi udde nabbisara ratu, “Apa naṛṛinote i Tuangnga nassumbala Taumata lal᷊eo, wuṛṛu mannamba'a taumata apan maddantinnu Mawu? Inolaanni Tuangnga udde naasa'u naungngu Mawu si Tuangnga.

³ Salaiwe aroddi piaddu lai apapia si Tuangnga. i Tuangnga buatte nandammen anambon paal᷊uannu Monganni Asyera apan sassubbannu tumana'u soa wuṛṛu i Tuangnga buatte nattinsahadda mabbiakka tumuṛṛuttu apulun Duata.”

I Yosafat na'ola'a pallal᷊imbakku

⁴ Ratu Yosafat uatana'a su Yerusalem. Arawe i tou masokka mattembo tumanangnge su ahewallu wanua mangngehetta si mangitou tadea'u mabelengnga apia ringannu Mawu, Ruatan al᷊amonan mangitou.

⁵ Su al᷊awo'u soa pia tanda'a watu su Yehuda i tou namile manga mallaṛuungnga,

⁶ wuṛṛu nangonggolu parenta indi si mangitou, “Pammanarate ringannu asingkatta, ana waugu i yamiu makkuungnga wal᷊ine wuassu arannu taumata, ewe'e wuassu arannu Mawu. I tou mallu'adda si yamiu sutempo i yamiu makkawessu hatto.

⁷ I yamiu ṛinone mata'uttu Mawu, wuṛṛu mammanara matammudda, ana waugu Mawu Ruatan kite maddantinnu taumata apan inolaanne mallinga, apan inolaanne mangngempe ara'e mannengkamma aongolla.”

⁸ See lai su Yerusalem, Yosafat nanenegu mallaṛṛuungnga wuassu manga taumatan Lewi, manga imam, wuṛṛu matatimmaddu soa. I mangitou ṛinone makkawessu manga hatto su taumata apan lullawangnga Titan Mawu wuṛṛu manga hatto waine.

⁹ Su manga mallaṛṛuungnga udde i Yosafat nangonggolu parenta indi, “Amata'e manaranu ringannu pangangimanna su Mawu. Paatuṛṛutte parenta-Ne su al᷊awo'u inolaanni yamiu.

¹⁰ Amungkangu pia manga hawenu wuassu soa waine nangapiddu sambau hattom pamamate si'o, nilumawangnga tita ara'e nilumawangnga atoranna, ṛinone i yamiu mangonggolu tatantiro si mangitou. Ringannu aroddi i mangitou tawe massal᷊a su saruannu Mawu, wuṛṛu Mawu tawe masa'u si'o aroddi lai si mangitou. Amata'e parenta indi, ne i yamiu tawe massal᷊a.

¹¹ Imam Wahewalla i Amarya ta'u nionggol᷊annu taṛṛino apan atanggaṛṛanne su ola'u hatto apan pia sasampangnge su manga titan agama. Zebaya ana'i Ismael, eteudde gubernuren Yehuda, ta'u nionggol᷊annu taṛṛino apan atanggaṛṛanne su ola'u manga hatto waine. Manga taumatan Lewi manarane mallu'adda tadea'u laṛṛawessu mallaṛuungnga udde iapaamatta. Daringiṛṛete manga tatantiro indi wuṛṛu pammamarate ringannu mapia. Antimanna Mawu uatantalongnga taumata apan mammanara ringannu matul᷊idda!”