2 TAWARIKH 17 - WUKE SUSI WATTI'U AL᷊AL᷊USASSA

I Yosafat naola'a ratu

¹ Yosafat naola'a ratun Yehuda nallol᷊ossa si Asa iamangnge, wuṛṛu i tou nanohassa watanganne ipando'appa Israel.

² I tou napariagan tantara su anambon soa pia tanda'a watune su Yehuda, wuṛṛu su wageangngu leta'a su liuddu soan Yehuda, see lai manga soa apan buatte niaṛṛon iamangnge su wageangngu leta'u Efraim.

³ Mawu nangal᷊amatta si Yosafat ana waugu i tou nangaṛṛussa wal᷊iuddu iamangnge; i tou tawe massubba si Baal,

⁴ ewe'e tumba'u mattaṛṛamawu Ruata. I tou matuṛṛutta manga parentan Duata, wuṛṛu i tou mabbiakka wal᷊ine ere manga ratun Israel.

⁵ Mawu nangonggola si Yosafat araratuanna apan matohassa su Yehuda. Tumanangnge sarangkanambone nangonggolu manga aonggola si tou, ne i tou nabbal᷊ite ala wuṛṛu aaddatanna.

⁶ Ringannu apulun naungnga apan wahewalla i tou tuttuṛṛutta parentan Mawu wuṛṛu nanggohakku anambon tampa pasasubbanna monganna see lai manga paal᷊uanni Mongannu Asyera su Yehuda.

⁷ Su tonna atallune i tou uaparenta, i tou nandolokku manga mamanara apan atanggaṛṛanne su araratuanne niapaaṛa'u manga titan Mawu su manga soan Yehuda. I mangitou uddewe: Benhail, Obaja, Zakharia, Netaneel wuṛṛu Mikha.

⁸ I mangitou raringanannu siri sio taumatan Lewi wuṛṛu ruan katou imam. Manga taumatan Lewi udde eteudde Semaya, Netanya, Zebaja, Asael, Semiramot, Yonatan, Adonia, Tobia wuṛṛu Tob-Adonia. Manga imam eteudde Elisama wuṛṛu Yoram.

⁹ Ringannu uaapiddu wuke Manga Titan Mawu i mangitou inaite watukku al᷊awo'u tampa su anambon soan Yehuda wuṛṛu mangngaṛṛa'a tumanangnge poiaroddi.

Taṛṛinon Yosafat

¹⁰ Mawu na'ola'a anambon araratuanna maranin Yehuda matta'utta mapapangalo mando'appa si Ratu Yosafat.

¹¹ Wuassu taumatan Filistin i tou nanengkamma manambo sal᷊a'a wuṛṛu manga aonggola waine, wuṛṛu wuassu taumatan Arab i tou nanengkamma 7.700 domba wuṛṛu 7.700 ambinga.

¹² Etearoddi i Yosafat mallannu lembon uataṛṛino. Su ahewallu Yehuda namangunna manga tanda'a watu wuṛṛu manga soa pangangadoannu anna.

¹³ I tou nangombon anna apan manambo su soa udde. Su Yerusalem i tou napatana'u manga piaṛṛa'u tantara apan matohassa,

¹⁴ sangkatou-sangkatou ringannu tantarane tumuṛṛuttu ṛuanganne. Adna eteudde tembonannu tantara wuassu ṛuanganni Yehuda. I tou uapiaṛṛa'u 300.000 su atoune tantara.

¹⁵ Taumata aruane eteudde i Yohanan; i tou uapiaṛṛa'u 280.000 su atoune tantara.

¹⁶ Taumata atallune eteudde i Amasia ana'i Zikhri; i tou uapiaṛṛa'u 200.000 su atoune tantara. (Amasia eteudde sangkatou taumata apan uararingikka Mawu.)

¹⁷ Tembonannu tantara wuassu manga ṛuanganna sulal᷊ummu ṛuanganni Benyamin eteudde i Elyada, sangkatou tantara apan matohassa. I tou uapiaṛṛa'u 200.000 su atoune tantara apan nariahi ringannu anaanna wuṛṛu allungnga.

¹⁸ Taumata aruane wuassu ammul᷊annu tantara indi eteudde Yosabad; i tou uapiaṛṛa'u 180.000 su atoune tantara apan nasuungnga ahiddi mangitou.

¹⁹ Ete i mangitou udde apan uariaga su Yerusalem. Wal᷊ine wua'udde lai, ratu napariaga manga ammul᷊annu tantara waine su manga tanda'a watu su wageangngu leta'u Yehuda.