2 TAWARIKH 16 - WUKE SUSI WATTI'U AL᷊AL᷊USASSA

Napapangalon Israel

¹ Su tonna tallun pul᷊o annumma sutempo i Ratu Asa uaparenta su Yehuda, Baesa ratun Israel namangalo Yehuda wuṛṛu nanohassa soan Rama ipakkappinga lal᷊anna sabbanganna sumutta su Yehuda.

² Ne i Ratu Asa nanganu wul᷊awanna wuṛṛu sal᷊a'a wuassu tampane su Wal᷊en Mawu wuṛṛu wal᷊en araratuanna, ana see niroho watukku Damsyik si Benhadad ratun Siria ringannu tanata indi,

³ “Wette i ite makkiinnu pagahahawe ere lai buatte niola'u hagurangngi ite. Ringannu indi lai i ya'u mangirimmu bul᷊awanna wuṛṛu sal᷊a'a maola'a aonggola, wuṛṛu mangahe si Tuangnga mamassutta paa'aukka si Baesa ratun Israel, tadea'u i tou mapawelengngu tantarane apia wuassu leta'a paparentangku.”

⁴ Benhadad inumire darorongnga udde ana see i tou nandolokku manga piaṛṛa'u tantarane suadio'a ringannu tantaran mangitou namangalo manga soan Israel. I mangitou namaddon soa Iyon, Dan, Abel-Bet-Maakha wuṛṛu anambon pangangadoannu anna su leta'u Naftali.

⁵ Sutempo i Ratu Baesa naaringikka olangnge udde, i tou nangillol᷊ote nanohassa soa Rama wuṛṛu nanantangken soa udde.

⁶ Ana see i Ratu Asa napasabbangngu manga taumata su ahewallu Yehuda niapaal᷊appa watu wuṛṛu alu apan nipaatti Baesa su Rama nipanohassa soa udde. Manga saranapa udde nipaatti Asa pinanohassa soa Geba su Mizpa.

I Nabi Hanani

⁷ Sutempo udde i Nabi Hanani nirumanta ringanni Ratu Asa wuṛṛu nabbisara, “Ana waugu i'o uaantimma ratun Siria, wuṛṛu wal᷊ine uaantimma Mawu Ruatanu, ne nawul᷊ite temponu ipamaddon tantaran ratun Israel.

⁸ Wal᷊inewe Sudan wuṛṛu Libia uatahuanna tantara apan manambo ringannu keretan pangalo wuṛṛu tantara uasa'e awal᷊o? Salaiwe aroddi Mawu nangonggolu auntunganna si yamiu, ana waugu i'o uaantimma si Tou.

⁹ Mawu ual᷊u'adda ahewallu runia tadea'u mangonggolu atatohan-Ne su taumata apan matuṛṛutta si Tou. Inolaannu tumaniten longonna, ana waugu udde manattakka orassa indi i'o sidutu sarun mamendamma pangalo.”

¹⁰ Wisaran Nabi Hanani udde naasa'u si Asa na'oman sara nabi udde nitaṛṛon Asa sulal᷊ummu tattupanna. Orassa udde lai Asa nanansara manga pira taumata wuassu tumanangnge.

Panguddusannu i Asa uaparenta

¹¹ Anambon apa nariaddi sutempo i Asa uaparenta wuassu panattaṛṛanne naddatingngu panguddusanne buatte niwoṛṛetta sulal᷊ummu wuke Watti'u Mararatun Yehuda wuṛṛu Israel.

¹² Su tonna tallum pul᷊o Sio sutempo i tou uaparenta, i Asa namendamma radda'a apan masaddatta su leddane ruan ba'a. Salaiwe aroddite, i tou tawe maiontolla su Mawu, ewe'e su mangangundamma. Rua tonna wua'udde i tou natete.

^13-14 Winal᷊unanne niwokkannu udamma apan niola'a wuassu rampa-rampa wuṛṛu lana mawangngi, ana see nilabbinga su labbingu manga ratu su Soan Daud. Wuṛṛu su ipangaddata si tou tumana'u soa nangundu'u pandu'a apan wahewalla.