2 TAWARIKH 15 - WUKE SUSI WATTI'U AL᷊AL᷊USASSA

Asa nallimbakku araratuanne

¹ Ghaṛṛahon Duata nangintaṛṛo si Nabi Azarya ana'i Oded,

² na'oman sara i tou inaite naisasomban Ratu Asa, wuṛṛu nabbisara, “Ei Ratu Asa, tumana'u Yehuda wuṛṛu Benyamin sarangkanambone! Paddaringikka! Mawu maraninu amungkangu i yamiu maranin Tou. Amungkangu i yamiu maddorongnga tatantiron Mawu, i Tou sarun mangonggola. Arawe amungkangu i yamiu tawe maddaringikka si Tou, i Tou lai tawe maddaringikka si yamiu.

³ Tumaniten mal᷊annu Israel tawe maddaringikka Ruata apan naṛṛino, tawe manga tita apan tinuṛṛutanne, wuṛṛu lai tawe manga imam apan mangngangaṛṛa'a si mangitou.

⁴ Arawe sutempo i mangitou sulal᷊ummu asasusa, i mangitou ma'iontolla su Mawu Ruatan Israel. I mangitou naddorongnga tatantiro-Ne ne i Tou nangonggola.

⁵ Sutempo udde taumata tawe maamatta ringannu matammudda, ana waugu su al᷊awo'u wanua pia pangalo apan wahewalla.

⁶ Walahanna sambau mammangalo walahanna waine, wuṛṛu soa sambau mammangalo soa waine, ana waugu Ruata nandantan al᷊iba'ukka apan wahewa si mangitou.

⁷ Arawe i yamiu ṛinone matammudda wuṛṛu waṛṛani. Inasaharannu sarun pia gessine.”

⁸ Napawe i Asa naaringikka wisaran Azarya ana'i Oded udde, naungnge natohasse apia. I tou nangingkattu anambon paal᷊uanna su wanuan Yehuda wuṛṛu Benyamin, wuṛṛu manga soa apan buatte niwaddone su panenteannu Efraim, ana see i tou nangapia mezbah Mawu apan uaraddo su rallakku Wal᷊en Mawu.

⁹ Manambo taumatan Efraim, Manasye wuṛṛu Simeon naammulli Asa, wuṛṛu natana'a su wageangngu araratuanne, ana waugu i mangitou naatutukke manungku Mawu niumontolla si tou. Asa nandolokku anambon taumata udde suadio'a ringannu tumana'u Yehuda wuṛṛu Benyamin

¹⁰ naammulla su Yerusalem. Ne i mangitou naammulle su wul᷊anna atallune tonna mapul᷊o l᷊ima sutempo i Ratu Asa uaparenta.

¹¹ Su allo udde i mangitou nangonggolu sasamba su Mawu 700 sapi wuṛṛu 7.000 domba, ul᷊en niaṛṛo apan niapiddi mangitou wua napapangalo.

¹² I mangitou naddiandi su Mawu manungku ringannu ahewallu naungnga wuṛṛu niawa, i mangitou sarun mabbiakka tuttuṛṛutta apulun Mawu Ruatan al᷊amonan mangitou.

¹³ Anambon taumata, mawae ete timmadde ara'e dario'a, esakka ara'e wawine, apan tawe mabbiakka tutuṛṛutta Mawu sarun iṛṛuumanna pateanna.

¹⁴ Ringannu tingikka ma'ikkatta i mangitou nassalu su Mawu manungku i mangitou sarun mangaggassa paaire udde. Wua'udde i mangitou ringante pasi pangintul᷊i wuṛṛu nattiuppa trompeta.

¹⁵ Tumana'u Yehuda sarangkanambone lulluassa ana waugu i mangitou buatte na'ola'a paaire udde ringannu ahewallu naungnge. I mangitou mal᷊uassa maddalo Mawu, wuṛṛu Mawu lai mal᷊uassa manengkamma si mangitou. I tou nangonggolu atatammudda su leta'i mangitou.

¹⁶ Wua'udde i Ratu Asa napaillol᷊on iupungnge i Maakha, wuassu manarane Inangngu Ratu ana waugu i tou buatte nallanginnu paal᷊uanna sassubanna apan masandaga si Asyera, mongannu asasuwukka. Asa napaṛṛa'a wuṛṛu nakkimunsa'a paal᷊uanna udde ana see tinutungnga su wawal᷊annu Kidron.

¹⁷ Salaiwe tawe anambon tampa pasasubbanna monganna su wanua udde nihohakki Asa, arawe i tou sidutu matuṛṛutta Mawu su al᷊o'engngu pabbiaṛanne.

¹⁸ Anambon wul᷊awanna wuṛṛu sal᷊a'a see lai manga saranapa waine niaaṛṛo su pangalo tatahuanannu iamangnge wuṛṛu i tou sassane sinahipunna su Wal᷊en Mawu maola'a pussa'an Mawu.

¹⁹ Na'oman sara tonna ual᷊un pul᷊o l᷊ima i Asa uaparenta tawe saran paassa pia pangalo su wanua udde.