2 TAWARIKH 14 - WUKE SUSI WATTI'U AL᷊AL᷊USASSA

Ratu Asa namaddon walahannu Sudan

¹ Napawe Ratu Abia natete wuṛṛu nilabbinga su labbingu manga ratu su Soan Daud, Asa anangnge esakka naola'a ratu nallol᷊ossa si tou. Su al᷊ungngu parentan Asa, wanua Yehuda mal᷊annabba tawe pangalone, al᷊annune mapul᷊o su tonnane.

² Asa naal᷊uassa naungngu Mawu Ruatane ringannu na'ola'a atatul᷊idda wuṛṛu apapia.

³ I tou nanggohakku manga mezbah walahanna waine wuṛṛu manga tampa passubbanna paal᷊uanna. Manga wal᷊en monganna niṛṛimunsa'a, wuṛṛu manga diṛṛin paal᷊uannu Monganni Asyera niṛṛaane.

⁴ Tumana'u Yehuda nirolokke mabbiakka tumuṛṛuttu apulun Mawu, Ruatan al᷊amonan mangitou, wuṛṛu maddaringikka manga al᷊aṛṛang-Nge wuṛṛu manga parenta-Ne.

⁵ Anambon tampa passubbanna paal᷊uanna wuṛṛu tampa panambunannu amania niingkatta wuassu manga soan Yehuda. Ne matammudde araratuanna udde su al᷊ungngu parentane,

⁶ na'oman sara i tou wotongnge napa'ola'a tanda'a watu su manga soan Yehuda. Manga pira tonna al᷊annune tawe nariaddi pangalo ana waugu Mawu nangonggolu paddarame si tou.

⁷ Asa nabbisara su tumana'u Yehuda, “Mappianne i ite manohassa manga soa ringannu ma'ola'a tanda'a watune ipamal᷊iwutta wuṛṛu manga candi see lai ngara mal᷊oangnga ringannu manga alu papal᷊ene. I ite buatte napangaṛṛo wanua indi ana waugu i ite buatte tinumuṛṛutta apulun Mawu Ruatan kite. I Tou nappadul᷊i si ite wuṛṛu ual᷊u'adda wanuan kite.” Ne i mangitou nanattakke mammangunna wuṛṛu mangnginsue manara udde ringannu mapia.

⁸ Tantaran Ratu Asa nipile wuassu 300.000 taumatan Yehuda ahidde allungnga wuṛṛu wangkau, wuṛṛu 280.000 taumatan Benyamin ahidde allungnga, papiti'a wuṛṛu anaanna. I mangitou sarangkanambone tantara apan waṛṛani wuṛṛu ninumarampe.

⁹ Su sambau tempo sangkatou taumatan Sudan aranne i Zerah namangalo Yehuda ringannu tantarane 1000.000 su atoune wuṛṛu 300 keretan pangalo. I mangitou niumamatta araune naddatingngu Maresa.

¹⁰ Ne i Asa sinumabbangke sinumaruanna si Zerah, ne tarua itarua nangatokku warisanne sambau-sambau su Wawal᷊annu Zefata maranin Maresa.

¹¹ Ana see i Asa inumal᷊iomanna su Mawu Ruatane, “Mawu tumba'u I'o apan wotongnge massumbala sisai lome apan uasaruanna sisai apan matohassa. Ontol᷊ewe yami orassa indi, oh Mawu Ruatan kami! Tumba'u Si'o yami uaantimma wuṛṛu sulal᷊ummu arannu yami sumabbangnga mapapangalo mando'appa tantara apan manambo indi. Mawu, Tumba'u I'o Mawu Ruatan kami. Ariewe pabbala'a I'o iawaddon taumata.”

¹² Ana'i Asa wuṛṛu tantaran Yehuda namangalote tantaran Sudan. Mawu namaddon tantaran Sudan na'oman sara i mangitou tinumal᷊angngu watanganne.

^13-14 Asa wuṛṛu tantarane nangenggenna si mangitou araune naddatingngu Gerar. Su samba'a tantaran Sudan manambo atonna nate na'oman sara tantaran mangitou nallomete ana waugu niawaddon Mawu wuṛṛu tantaran Yehuda nangaṛṛo lai manambo manga darotongngi mangitou. Wua'udde tantaran Yehuda naṛṛimunsa'e manga soa apan uaal᷊indongannu Gerar, ana waugu Mawu na'ola'a tumanangnge nabbal᷊i matta'utta. Tantaran Yehuda nangaṛṛo anambon soa udde wuṛṛu naasomba manambo atonna saranapa.

¹⁵ I mangitou lai namangalo paddasanannu mandariaga winatangnga, wuṛṛu nallurannu manambo domba wuṛṛu unta. Wua'udde i mangitou nabelengke watukku Yerusalem.