2 TAWARIKH 13 - WUKE SUSI WATTI'U AL᷊AL᷊USASSA

I Abia wuṛṛu i Yerobeam napapangalo

¹ Sutonna mapul᷊o ual᷊u sutempo i Ratu Yerobeam uaparenta su Israel, Abia naola'e ratun Yehuda,

² wuṛṛu namarenta tallu tonna al᷊annune su Yerusalem. Inangngene eteudde i Mikhaya ana'i Uriel wuassu soa Gibea. Wua'udde napesangke pangalo suwallatti Abia wuṛṛu i Yerobeam.

³ Abia nandolokku 400.000 tantara, wuṛṛu lai i Yerobeam nandolokku 800.000 su atoune tantara.

⁴ Ammul᷊annu tantara darua udde uasasaruante su panenteannu Efraim. Abia sinuma'a watukku Wowon Zemaraim ana see nangintul᷊i si Yerobeam wuṛṛu taumatan Israel, “Paddaringikka!

⁵ I yamiu masingkatta manungku, Mawu, Ruatan Israel, buatte naddiandi si Daud, manungku i tou wuṛṛu papapulunne sarun mamarenta Israel sarangkal᷊o'engnge. Riandi udde tawe wotongnge mawal᷊u.

⁶ Salaiwe aroddi, Yerobeam ana'i Nebat udde namangalo si Salomo, ratune.

⁷ I tou nangammulu manga taumata lal᷊eo wuṛṛu namata'u apulun mangitou si Rehabeam ana'i Salomo, apan sutempo udde ta'e saṛṛen tumuwo tawe asingkatta manal᷊are.

⁸ Orassa indi yamiu massunna wotongnge mando'appa taṛṛino apan nionggolu Mawu su papapulunni Daud, ana waugu ammul᷊annu tantaranu manambo wuṛṛu i yamiu pia manga sapi wul᷊awanna apan ṛatanganni Yerobeam niola'a monganni yamiu.

⁹ Wal᷊inewe manga imam su Mawu eteudde papapulunni Harun wuṛṛu manga taumatan Lewi, sarangkanambone buatte nilimbuaṛanni yamiu? Maola'a hahantine walate isai maapulu maola'a imam, sawal᷊iate i tou mangapiddu sapi sambau ara'e domba pitu, apan pileanni yamiu maola'a imam wal᷊inewe Ruata, ana waugu etearoddi ola'u manga walahanna waine manenegu imammi mangitou. Arawe inolaanni yami wal᷊inewe ereudde.

¹⁰ Yami sidutu massubba Mawu Ruatan kami wuṛṛu tawe manantangngi Tou. Manga imam si yami sidutu wuassu papapulunni Harun, wuṛṛu manga taumatan Lewi sidutu uasumbala si mangitou.

¹¹ Suapan marua allo wuṛṛu wawallo i mangitou mannambunnu amania wuṛṛu mangonggollu sasamba itattambunna su Mawu, lapiddu mangngatokku roti ia'imbe. Suapan maṛṛabbi i mangitou mande'omma manga sol᷊o su leddan sol᷊o wul᷊awanna. Yami sidutu uararingikka manga parentan Mawu, arawe i yamiu buatte nanantangngu Mawu.

¹² Piaṛṛa'i yami eteudde Ruata sassane wuṛṛu manga imammu Mawu lai isindi. I mangitou uasaddiate mattiuppa trompeta maola'a sambau tatiala si yami inaite mamangalo si yamiu. Ei taumatan Israel, ariete lumawangnga Mawu, Ruatan al᷊amonanu! I yamiu tawe maauntungnga!”

¹³ Tantal᷊anna udde i Yerobeam nandolokku sambageanganna wuassu tantarane iapaampangnga tantaran Yehuda wuassu liudde, wuṛṛu sambageanganna lai sinumomba si mangitou wuassu saruanne.

¹⁴ Napawe tantaran Yehuda naasilo manungku i mangitou nipangaloante, i mangitou nangintul᷊i maiontolla su Mawu. Manga imam nattiuppa trompetta,

¹⁵ ana see tantaran Yehuda hinumio uuim pangalo wuṛṛu inaite namangalo ringannu nipiaṛṛa'i Abia. Tantal᷊anna i mangitou sussal᷊ande, Ruata namaddon Yerobeam wuṛṛu tantaran Israel,

¹⁶ na'oman sara i mangitou tinumal᷊angnga. Ruata napa'untungngu taumatan Yehuda wuassu taumatan Israel.

¹⁷ Tumaniten manambo arugianna apan niola'i Abia wuṛṛu tantarane su taumatan Israel; 500.000 tantaran mangitou apan apianne nate.

¹⁸ Taumatan Yehuda naauntungnga, ana waugu i mangitou mangngasakku Mawu, Ruatan al᷊amonan mangitou.

¹⁹ Sutempo i Abia mangngenggenna tantaran Yerobeam, i tou nangaṛṛo manga pira soa ringannu manga pira ampungnga maranine. Manga soa udde eteudde Betel, Yesana wuṛṛu Efron.

²⁰ Su al᷊o'engngu i Abia uaparenta, Yerobeam tawe napamelengngu araratuanne. Panginsueanne i tou nipaten Mawu.

²¹ Arawe nawal᷊i'a i Abia lembon aatambanna taṛṛinone. Awingnge siri 14 su atoune, 22 ana'a esakka wuṛṛu 16 ana'a wawine.

²² Watti'a waine su ola'i Abia, wuṛṛu su ola'u anambon wisara wuṛṛu inolaanne buatte niwoṛṛetta sulal᷊ummu wuken Watti'i Nabi Ido.