2 TAWARIKH 12 - WUKE SUSI WATTI'U AL᷊AL᷊USASSA

Mesir namangalo Yehuda

¹ Napawe pamamarentan Rehabeam naola'a sangkatou ratu matohasse, i tou wuṛṛu tumana'u Israel sarangkanambone tate tumuṛṛutta titan Mawu,

² wuṛṛu tate maddaringikka si Tou. Ana waugu udde Mawu nakkuumanni mangitou. Su tonna al᷊imane i Rehabeam uaparenta, Sisak ratun Mesir namangalo Yerusalem

³ ringannu 1.200 keretan pangalo, 60.000 tantara uasa'e awal᷊o, wuṛṛu manambo lai tantara apan tate iareengnga, nasutta lai tantaran Libia, Suki wuṛṛu Sudan.

⁴ I tou nangaṛṛo manga soa apan pia tanda'a watune su Yehuda ana see sinumutta su Yerusalem.

⁵ Sutempo udde i Ratu Rehabeam wuṛṛu manga piaṛṛa'u Yehuda uaammule su Yerusalem ana waugu tinumal᷊angngi Sisak. Nabi Semaya nirumanta ringanni mangitou wuṛṛu nabbisara, “Arendi wisaran Mawu, ‘I yamiu buatte nanantang-Ku, nariaddi orassa indi Ya'u lai manantangngi yamiu na'oman sara i yamiu massuṛṛubawa si Sisak.’ ”

⁶ Ratu wuṛṛu piaṛṛangnge naatutukke manungku i mangitou narosate. I mangitou nabbisara, “Apa apan niola'u Mawu udde naṛṛino.”

⁷ Napawe Mawu naasilo manungku i mangitou niuma'ukku'u watanganne, i Tou nabbisara apia si Semaya, wisara-Ne, “Ana waugu i mangitou nanga'u rosan mangitou, ne i Ya'u tawe mamate si mangitou. I Ya'u sarun mal᷊ihakka mamallossi mangitou; Yerusalem tawe maṛṛimunsa'a. Salaiwe aroddi, i Sisak

⁸ sarun mamarenta si mangitou, tadea'u i mangitou masingkattu ereapa paṛṛalane mattaṛṛamawu si Ya'u, wuṛṛu mattaṛṛamawu tembonannu runia.”

⁹ Ne i Ratu Sisak nirumantate namangalo soan Yerusalem wuṛṛu nangaṛṛo manga saranapa maarega sulal᷊ummu Wal᷊en Mawu wuṛṛu su wal᷊en araratuanna, see lai manga allungnga wul᷊awanna apan nilanginni Ratu Salomo.

¹⁰ Maola'a lal᷊annangnge i Rehabeam nallanginnu manga allungnga witu'a, wuṛṛu tinantilla su manga piaṛṛa'u tantara apan uariaga ngara wahewalla su wal᷊en araratuanna.

¹¹ Suapan ratu inai watukku Wal᷊en Mawu, manga mandariaga uaapiddu manga allungnga udde, wua'udde iwelengnga apia su wabboa'a pandariaganna.

¹² Ana waugu ratu niuma'ukku'u watanganne su saruannu Mawu, wuṛṛu lai ana waugu ta'e pia manga inolaanna apan mapia su Yehuda ne asasa'u Mawu si Rehabeam nompo'e wuṛṛu tate mamate si tou.

Auttu watti'u pamamarentan Rehabeam

¹³ Rehabeam namarenta su Yerusalem wuṛṛu taṛṛinone mangke wahewalla. Uukki Rehabeam 41 su tonnane sutempo i tou naola'a ratu, wuṛṛu i tou namarenta 17 su tonnane al᷊annune su Yerusalem, soa apan wuassu anambon leta'u Israel nipilem Mawu apan maola'a tampa patataṛṛamawuanna si Tou. Inangngi Rehabeam eteudde Naama wuassu wanua Amon.

¹⁴ Rehabeam na'ola'a al᷊al᷊eo ana waugu tawe mappaamattu apulun Mawu.

¹⁵ Watti'a su ola'i Rehabeam wuassu panattaṛṛanne naddatingngu panguddusanne wuṛṛu pangangawanne niwoṛṛetta sulal᷊ummu wuke Watti'i Nabi Semaya wuṛṛu sulal᷊ummu wuke Watti'i Nabi Ido. Suwallati Rehabeam wuṛṛu Yerobeam sidutu maddiadi pangalo.

¹⁶ Rehabeam nate wuṛṛu nilabbinga su labbingu manga ratu su Soan Daud. Abia anangnge naola'a ratu nallol᷊ossa si tou.