2 SAMUEL 9 - WUKE SUSI WATTI'U AL᷊AL᷊USASSA

I Daud wuṛṛu i Mefiboset

¹ Su allo sambau i Daud naiwal᷊o, “Ta'e pia taumata wiakka wuassu amonanni Saul? Amungkangu ta'e pia, i ya'u maapulu ma'ola'a apapia si tou ana waugu i Yonatan.”

² Amonanni Saul pia allangnga aranne i Ziba, ne i tou nirolokka niapasaruanna si Ratu Daud. Ratu naiwal᷊o, “Ete i'o i Ziba?” “Ore, Tuangnga, ” sasimbakke.

³ Wua'udde ratu naiwal᷊o, “Ta'e pia taumata wiakka wuassu amonanni Saul? I ya'u maapulu ma'ola'a apapia si tou, ere lai i ya'u buatte naddiandi su Ruata.” I Ziba sinumimbakka, “Ta'e pia sangkatou esakka ana'i Yonatan. I tou peṛṛo.”

⁴ “Suapate i tou?” ratu naiwal᷊o. “Su Lodebar, su wal᷊en Makhir ana'i Amiel,” sasimbakki Ziba.

⁵ Ana see i Ratu Daud nandolokka niapawaggo esakka ana'i Yonatan udde.

⁶ Esakka ana'i Yonatan udde aranne i Mefiboset. Sutempo i tou nirumanta, i tou nassubba nangaddatta si Daud. I Daud namo'a si tou wisarane, “Mefiboset,” ne i tou sinumimbakka, “I ya'u, Tuangnga.”

⁷ I Daud nabbisara, “Arie pa'ata'utta. I ya'u marangngu si'o ana waugu i Yonatan iamangngu. Anambon leta'i iupungngu i Saul, sarun ta'u iul᷊e si'o wuṛṛu saran mal᷊annu-l᷊annu i'o wotongnge umanna su wal᷊en araratuanna.”

⁸ I Mefiboset nassubba apia wuṛṛu nabbisara, “Apa hunane allangngu indi! Anio i Tuangnga aroddi apiane su allangngu indi?”

⁹ Ana see ratu namaggo si Ziba allangngi Saul udde, wuṛṛu nabbisara, “Al᷊awo'u pussa'a apan tinantangngi Saul wuṛṛu amonanne ta'u ionggolla su pulunni tuangngu indi.

¹⁰ I'o wuṛṛu al᷊aṛṛanangngu see lai masasumbalanu ṛinone mabbailla su leta'a udde pabbiaṛṛa'a amonanni Saul, wuṛṛu onggol᷊a'e hessin leta'a udde si mangitou panipusa'a hausanni mangitou. Arawe i Mefiboset wotongnge umanna su wal᷊en araratuanna sarangkal᷊o'engnge.” (I Ziba pia ana'a esakka anambone 15 su atoune wuṛṛu 20 su atoune allangnga).

¹¹ I Ziba sinumimbakka ratu, “Anambon parentan Tuangnga sarun manarannu allangngu.” Nariaddi i Mefiboset u'anna suadio'a ringannu ratu, ere lai esakka ana'i Daud sassane.

¹² I Mefiboset pia ana'a esakka aranne i Mikha. Anambon amonanni Ziba naola'a allangngi Mefiboset.

¹³ Etearoddi watti'i Mefiboset apan pia sangkulle su leddane ruan ba'a udde natana'a su Yerusalem wuṛṛu sidutu u'anna su wal᷊en araratuanna.