2 SAMUEL 8 - WUKE SUSI WATTI'U AL᷊AL᷊USASSA

Manga auntunganni Daud sulal᷊ummu pangalo

¹ Manga pira tempo wua'udde, i Ratu Daud namangalote taumatan Filistin apia. I tou namaddon mangitou wuṛṛu nangaṛṛo leta'i mangitou.

² I Daud lai namaddon taumatan Moab. I tou nandolokki mangitou iapal᷊allowanga su leta'a, ana see i tou namate ruan katou suwallattu suapan siri tallu su atoune. Nariaddi, taumatan Moab nassuṛṛubbawa si Daud wuṛṛu mammaekka wose si tou.

³ Wua'udde i Daud namaddon Ratu Hadadezer ana'i Rehob apan mammarenta su Zoba, eteudde sambau araratuanna maranin Damsyik. Sutempo udde i Hadadezer tantal᷊anna sulal᷊ummu amatanna inai mamelengngu araratuanne su wageangngu leta'u ul᷊une su Sal᷊ukku Efrat.

⁴ I Daud naasametta 1.700 su atoune tantara uasa'e awal᷊o wuṛṛu 20.000 su atoune tantara u'amattu ledda. I tou napaallomen anambon awal᷊o, nallambe sambageanganna, natimu su maṛṛasutta keretan pangalo.

⁵ Taumatan Siria wuassu Damsyik nandolokku tantara iapasumbala si Ratu Hadadezer. Arawe i Daud namaddon mangitou wuṛṛu namate 22.000 su atoune suwallatti mangitou.

⁶ Wua'udde i Daud napararisikku manga paddasanannu tantara sulal᷊ummu wageangngu leta'i mangitou, ne i mangitou uasuṛṛubbawate lapiddu mammaekka wose si Daud. Mawu napauntungngi Daud su al᷊awo'u tampa i tou mapapangalo.

⁷ Manga allungnga wul᷊awanna apan nipaattu tantaran Hadadezer niaṛṛon Daud wuṛṛu niapidda su Yerusalem.

⁸ Waine lai wua'udde i Daud nanganu atta'a manambo atonna wuassu Betah wuṛṛu Berotai, manga soa apan dorone paparentanni Hadadezer.

⁹ I Ratu Tou wuassu Hamat naaringikka manungku i Daud buatte namaddon anambon tantaran Hadadezer.

¹⁰ Ne i tou nandolokki Yoram anangnge esakka inai niapawal᷊on tabbea si Ratu Daud wuṛṛu wisarane sal᷊amatta su auntunganne udde, ana waugu i Hadadezer masokkate mapapangalon Tou. I Yoram nirumanta ringanni Daud ringannu uaapiddu manambo aonggolla wuassu wul᷊awanna, sal᷊a'a wuṛṛu witu'a.

^11-12 I Ratu Daud nangonggollu anambon aonggolla su Mawu apan ipaatta sulal᷊ummu darohan patataṛṛamawu. Aroddi lai niolangnge su manga saranapa wul᷊awanna wuṛṛu sal᷊a'a apan buatte niaṛṛone wuassi Hadadezer wuṛṛu manga walahanna apan niawaddone, eteudde walahannu Edom, Amon, Filistin wuṛṛu Amalek.

¹³ Aranni Daud nabbal᷊i tinumelengnga lai sutempo i tou nabelengnga wua namate 18.000 taumatan Edom su Wawal᷊annu Asin.

¹⁴ I tou napararisikku manga paddasanannu tantara su ahewallu Edom, wuṛṛu manga taumatan Edom udde uasuṛṛubbawate si tou. Mawu nangonggollu auntunganna si Daud suapan tampa i tou mapapangalo.

¹⁵ Etearoddi i Daud namarenta ahewallu Israel wuṛṛu uariaga tadea'u tumanangnge sidutu paparentanna ringannu atatul᷊idda wuṛṛu apapia.

^16-17 Eteindi arannu manga mammamanaran araratuanna apan atanggaṛṛanne nipilen Daud: Tembonannu tantara; i Yoab ana'i Zeruya; Mamamoṛṛettu araratuanna: Yosafat ana'i Ahilud; Manga imam: i Zadok ana'i Ahitub, wuṛṛu i Ahimelekh ana'i Abyatar, Mamamoṛṛettu wanua: i Seraya

¹⁸ Tembonannu mandariaga ratu; i Benaya ana'i Yoyada; Manga imam su wal᷊en araratuanna: manga esakka ana'i Daud.