2 SAMUEL 6 - WUKE SUSI WATTI'U AL᷊AL᷊USASSA

Wantallu Paaire niapidda watukku Yerusalem

¹ Wua'udde i Daud namaggo apia manga tantara apan apianne su Israel tadea'u ma'ammulla, sarangkanambone 30.000 su atoune.

² I mangitou niapidda mattudda watukku Baale-Yehuda, inai mangal᷊appa wua poiaroddi Wantallu Pa'aire apan isassaggo ringannu arannu Mawu Lembontaṛṛino apan ua'ianna su wowon manga kerub.

³ Wantallu Pa'aire udde nial᷊appa wuassu wal᷊en Abinadab su wowon buidda wuṛṛu niluranna sulal᷊ummu roda apan wakku. Ana see i Uza wuṛṛu i Ahio, manga ana'i Aminadab uatantalongnga roda udde; i Uza u'amatta su sandiṛṛanne,

⁴ wuṛṛu i Ahio u'amatta su saruanne.

⁵ I Daud wuṛṛu anambon walahannu Israel niumamatta su saruannu Wantalla udde lapiddu massal᷊aingnga nallassa auatanna wuṛṛu mangngantari maddalo Mawu. I mangitou mannalangnga kecapi, gambus, rebana, kelentingan wuṛṛu simbal.

⁶ Napawe i mangitou na'omate sutampa pakkindanna gandumma pussa'a Nakhon, manga sapi apan uawol᷊engnga roda udde nitara, ana see i Uza nagul᷊ukku limane wuṛṛu nangagassa Wantallu Paaire udde tadea'u tawe manawo.

⁷ Orassa udde lai Mawu Ruata nasa'u si Uza, ana waugu inolaanne udde naola'a sambau aal᷊uandaga su Mawu. I Uza nipate-Ne sutampa udde, maranin Wantallu Pa'aire.

⁸ Ne nanattakka orassa udde tampa udde nisaggo Peres-Uza. I Daud nasa'u ana waugu Mawu namate si Uza.

⁹ Arawe i Daud matta'uttu Mawu lai wuṛṛu nabbisara, “Orassa indi ereapate Wantallu Pa'aire udde wotongnge ta'u iaapidda?”

¹⁰ Ana waugu udde i tou maddirite mangapiddu Wantallu Paaire udde watukku Yerusalem, ewe'e sinahipunte su wal᷊en Obed-Edom taumatan Gat.

¹¹ Wantallu Pa'aire uaraddo isudde tallu wul᷊anna al᷊annune, ne Mawu nangal᷊amatta si Obed-Edom wuṛṛu amonanne.

¹² I Ratu Daud naaringikka manungku Mawu nangal᷊amatta amonanni Obed-Edom wuṛṛu anambon pussaane ana waugu Wantallu Paaire udde. Ne i tou inaite watukku wal᷊en Obed-Edom, nangal᷊appa Wantalla udde wuṛṛu niingkatta watukku Yerusalem ringannu ramea apan bahewalla.

¹³ Sutempo manga taumata apan uapasanna Wantallu Pa'aire udde nilumempangke paiannumma, i Daud napata'alli mangitou. Wua'udde i tou nangonggollu sasamba su Mawu, eteudde sapi esakka wuṛṛu ana'u sapi apan buatte niapaatawa.

¹⁴ Wua'udde i Daud massal᷊aingke ringannu naungnga mal᷊uassa su ipangaddatta Mawu. Su orassa udde i tou tumba'u ual᷊uṛṛen nasa linen ma'autta wuṛṛu nireṛṛotta su tapanangnge.

¹⁵ Etearoddi i Daud wuṛṛu tumana'u Israel sarangkanambone nangingkattu Wantallu Pa'aire udde watukku Yerusalem, tatantalongannu hio wuṛṛu tingikku trompeta.

¹⁶ Sutempo Wantalla udde tantal᷊anna ia'apidda sumutta sulal᷊ummu soa, i Mikhal sinangianni Saul nallinge wuassu sungketa ana see naasilo si Ratu Daud sussolo'a wuṛṛu massal᷊aingnga ipangaddatta Mawu, ne i Mikhal maddantinna ma'asilo si Daud.

¹⁷ Wantallu Pa'aire udde niaddo su tampane sulal᷊ummu rasanna apan buatte niola'i Daud pangaddoannu Wantalla udde. Wua'udde i Daud nangonggollu sasamba itattambunna wuṛṛu sasamban paddarame su Mawu.

¹⁸ Ana see i tou nangal᷊amatta tumana'u Israel ringannu arannu Mawu Apan Lembontaṛṛino.

¹⁹ Wua'udde nattahia anna si mangitou sarangkanambone. Suapan taumata isudde mawae ete esakka ara'e wawine nionggol᷊annu sanduru ṛemessa apan buatte nitapa, roti wuṛṛu kukisse kismis. Wua'udde i mangitou sarangkanambone napul᷊ete su wal᷊ene sangkatou-sangkatou.

²⁰ Sutempo i Daud napul᷊ete su wal᷊en araratuanne mangonggollu tabea su lal᷊oṛṛon bal᷊ene, i Mikhal sinumabbangnga naisasomban Daud wuṛṛu nabbisara, “Allo indi ratun Israel atonna-tonna na'ola'a watanganne a'addatanna! I tou buatte tinumantol᷊e naal᷊ihidda taumata longonna apan wagga masili su saruannu manga allangnga wawine tatahuanannu manga mamanaran araratuanna!”

²¹ I Daud sinumimbakka, “I ya'u massal᷊aingnga ana waugu mangngaddatta Mawu, apan buatte nanol᷊a'u iamangngu wuṛṛu amonanne, ana see namile si ya'u maola'a piaṛṛa'u Israel, al᷊aṛṛanang-Nge. Ana waugu udde i ya'u sidutu massal᷊aingnga ipangaddatta Mawu.

²² Ewe'e lai ya'u mal᷊uassa al᷊uandahanna nangillembo lai wuassu tanginna. I'o wotongnge ma'ellega si ya'u mawawo, arawe manga allangnga apan nisaggonu tanginna, sarun mangaddatta si ya'u!”

²³ I Mikhal, sinangianni Saul udde tawe naasomba ana'a su al᷊o'engngu pabbiaṛṛanne.