2 SAMUEL 5 - WUKE SUSI WATTI'U AL᷊AL᷊USASSA

I Daud naola'a ratu su Israel wuṛṛu su Yehuda

¹ Wua'udde anambon piaṛṛa'u manga ruanganni Israel nirumantate ringanni Daud su Hebron wuṛṛu nabbisara si tou, “Yami indi tuṛṛangngi Tuangnga.

² Ro'en dorone, ewe'e lai sutempo i Saul ta'e uaparenta si yami, masokka lai i Tuangnga mamiaṛṛa'u tantaran Israel napawe inaite mapapangalo, see lai Mawu buatte naddiandi si Tuangnga manungku ete i Tuangnga apan mamiaṛṛa'u al᷊aṛṛanang-Nge wuṛṛu maola'a ratun mangitou.”

³ I Daud na'ola'a paaire ringannu manga piaṛṛa'u Israel udde, ana see i mangitou nanenegi Daud naola'a ratu Israel.

⁴ Uukki Daud tatallu pul᷊o su tonnane sutempo i tou naola'a ratu, wuṛṛu i tou namarenta appattu pul᷊o su tonnane al᷊annune.

⁵ Su Hebron i tou namarenta Yehuda al᷊annune pitu tonna mattangnga, wuṛṛu su Yerusalem i tou uaparenta ahewallu Israel wuṛṛu Yehuda al᷊annune tatallu pul᷊o tallu su tonnane.

⁶ Su allo sambau i Ratu Daud wuṛṛu tantarane inaite namangalo Yerusalem. Taumatan Yebus tumana'u soa udde, massunna manungku i Daud tawe maapamaddon Yerusalem. Ana waugu udde i mangitou nabbisara si tou, “I'o tawe maasutta inawarendi; manga taumata wuta wuṛṛu manga taumata peṛṛo wotongnge mallimbuakka si'o.”

^7-9 I Daud nabbisara tantarane, “Isindi pia lai taumata apan maddantinnu taumatan Yebus ere lai ya'u maddantinni mangitou? Tumaniten maddantinna i tou na'oman sara i tou ma'apulu atonna mamate si mangitou? Amungkangu aroddi, suttate su loṛṛangnga aamatannu ua'e wuṛṛu pangaloite manga taumata peṛṛo wuṛṛu wuta apan ia'arantingku udde.” (Ana waugu udde taumata mabbisara, “Taumata wuta wuṛṛu taumata peṛṛo tawe wotongnge sumutta su Wal᷊en Mawu.”) I Daud naapangaṛṛo tanda'a watu su Sion wuṛṛu natana'a isudde. Soa udde nisaggone “Soan Daud”. Soa udde niolangnge uapal᷊iwutta tanda'a watu udde, manattakka wuassu samba'a ra'in buidda apan niomboannu leta'a.

¹⁰ I Daud mallannu lembon mattohassa, ana waugu Mawu, Ruata Apan Lembontaṛṛino nantul᷊ungnge.

¹¹ I Ratu Hiram wuassu wanua Tirus nandolokku manga tembonanne inai ringanni Daud, see alu cemara wuassu Libanon wuṛṛu manga wasen kalu see lai manga wasen batu inai mapararisikku wal᷊en araratuanna.

¹² Ana waugu udde i Daud lembon mangngimanna manungku Mawu buatte nanenegi tou naola'a ratu su Israel, wuṛṛu nanohassa araratuanne sarangkanambone tumba'u maola'a hunan al᷊aṛṛana'u Mawu.

¹³ Wua'udde i Daud nangingkatta wuassu Hebron watukku Yerusalem, i tou naawingngu manga pira wawine wuṛṛu nanganu manga pira lai wawine niola'a nia'i ne niatambante manga anangnge esakka wuṛṛu wawine.

¹⁴ Manga anangnge esakka apan niasungkanga su Yerusalem eteudde; i Syamua, i Sobab, i Natan, i Salomo,

¹⁵ i Yibhar, i Elisua, i Nefeg, i Yafia,

¹⁶ i Elisama, i Elyada wuṛṛu i Elifelet.

Naauntungnga su taumatan Filistin

¹⁷ Sutempo taumatan Filistin naaringikka manungku i Daud naola'e ratu su Israel, i mangitou nirumanta pandumanne manametta si Daud. Arawe i Daud naaringikka olangnge udde, ana see i tou inaite watukku tanda'a watu.

¹⁸ Taumatan Filistin na'omate su Wawal᷊annu Refaim wuṛṛu namanuate isudde.

¹⁹ I Daud naiwal᷊o Mawu, “Apa ṛinone i ya'u mamangalo taumatan Filistin udde? Apa I'o mangonggollu auntunganna si ya'u?” “Pangaloite!” sasimbakku Mawu. “I ya'u sarun mangonggollu auntunganna si'o!”

²⁰ Wua'udde i Daud inaite watukku Baal-Perasim wuṛṛu isudde tantaran Filistin udde niwaddone. Ana see i tou nabbisara, “Mawu buatte nanggohakku bentengu see'u, naal᷊ihidda manawangnga nanggohakku al᷊awo'a sulal᷊ummu sangkaṛṛondappa.” Ana waugu udde tampa udde nisaggo Baal-Perasim.

²¹ Tantaran Filistin tinumal᷊angnga ringannu tawe nangapiddu manga paal᷊uanna sassubbanni mangitou. Manga paal᷊uanna udde nianun Daud wuṛṛu tantarane.

²² Tawe nal᷊annu wua'udde taumatan Filistin nirumanta apia namanua su Wawal᷊annu Refaim.

²³ Paassa lai i Daud naddorongnga tatantiro wuassu Mawu. Mawu sinumimbakka, “Arie pamangalo si mangitou wua isindi, arawe amatte pamal᷊iwutta wuṛṛu pangaloite i mangitou wuassu liudde, maranin manga punnu alu murbei.

²⁴ Napawe i'o maaringikka ere lempangngu taumata mabbarissa su oto'u manga aaluanna udde, ne amatte, ana waugu i Ya'u sarun umamatta su saruanni yamiu mamaddon taumatan Filistin.”

²⁵ I Daud tinumuṛṛutta parentan Mawu, ne i tou naapallimbuakka taumatan Filistin wuassu Geba naddatingngu Gezer.