2 SAMUEL 24 - WUKE SUSI WATTI'U AL᷊AL᷊USASSA

I Daud na'ola'a pandareengnga

¹ Mawu nasau apia su Israel, ana see i Daud nisal᷊ong-Nge ringannu pandumanna mandatan asasusa su walahanna udde. Mawu nabbisara si tou, “Pa'ola'e pandareengnga su Israel wuṛṛu Yehuda.”

² Ana see i Daud nabbisarate si Yoab tembonannu tantarane, “Roote suadio'a ringannu manga piaṛṛa'u tantaranu su anambon walahannu Israel su ahewallu wanua wuṛṛu pa'ola'e pandareengnga. I ya'u mappulu maasingkatta anambon mangitou.”

³ Arawe i Yoab nabbisara ratu, “Antimanna Mawu Ruatan Tuangnga mapaanambon tumana'u Israel ma'oman sara paaṛṛasutta wuassu anambon mangitou orassa indi, wuṛṛu doronganna i Tuangnga ta'e wiakka, tadea'u wotongnge maasilo udde. Arawe ipa'ura i Tuangnga ma'ola'a pandareengnga indi?”

⁴ Arawe ratu sidutu uaagassa parentane udde. Nariaddi i Yoab wuṛṛu manga piaṛṛa'u tantarane inaite nandeengngu walahannu Israel.

⁵ Napawe tinumumbete Sal᷊ukku Yordan, i Yoab wuṛṛu tantarane naddasante su samba'an timukku Aroër, sambau soa su pattangngannu wawal᷊anne su wageangngu leta'u Gad. Wua' isudde i mangitou inaite watukku sawannakka, su Yaezer,

⁶ ana see nasal᷊a watukku Gilead wuṛṛu Kades su wageangngu leta'u taumatan Het. Wua'udde i mangitou inaite watukku Dan, ana see wuassu Dan nabbeṛṛo watukku waṛṛatta, su Sidon.

⁷ Wua' isudde i mangitou inaite watukku timukka su Tirus soa apan pia tanda'a watune udde. Ana see i mangitou inaite watukku anambon soan taumatan Hewi wuṛṛu taumatan Kanaan, wuṛṛu panginsueanne su Bersyeba, su samba'an timukku wageangngu Yehuda.

⁸ I mangitou namal᷊intaddu ahewallu wanua sulal᷊ummu tempo sio wul᷊anna ruan pul᷊o su allone. Wua'udde i mangitou nabbelengke watukku Yerusalem

⁹ wuṛṛu namasingkatta ratu hessin manaran pandareengnga udde. Reengannu esakka apan botongnge maola'a tantara 800.000 su atoune su Israel wuṛṛu su Yehuda 500.000 su atoune.

¹⁰ Arawe napawe i Daud buatte nandeengngu walahanna udde, i tou naapendamma pasasal᷊a, wua'udde i tou nabbisarate Mawu, “Oh Mawu, i ya'u tumaniten marosa! Ampungewe i ya'u, ana waugu inolaangku udde tumaniten longonna.”

^11-12 Mawu nabbisara si Nabi Gad apan naola'a pal᷊elene si Daud wuṛṛu su Mawu, “Roote wuṛṛu wal᷊oa'a si Daud manungku i Ya'u mangonggollu tatallu iapapile si tou. Suapawe nipilen tou sarun Ta'u olaanna.” Tiṛṛabbine marua'allo, napawe i Daud napu'ote wua natiilla,

¹³ i Gad nirumanta sinumaruanna wuṛṛu namasingkatta si tou parentan Mawu udde, wisarane, “Suapa apan pileanni Tuangnga: Wanua indi aṛṛiaannu elessa al᷊annune tallu tonna, ara'e i Tuangnga tumal᷊angnga a'enggenannu seetta al᷊annune tallu wul᷊anna, ara'e wanua indi rantannu radda'a al᷊annune tallu allo? Ṛawesa'e orassa indi suapane apan sarun ta'u iapasingkatta su Mawu.”

¹⁴ I Daud sinumimbakka, “Uare! Nasilakate i ya'u! Arawe wuassu i ya'u iṛṛuumannu taumata, mappianne i ite sarangkanambone iṛṛuumannu Mawu, ana waugu wahewalla darangngu-Ne.”

¹⁵ Ne Mawu nandantan radda'a su taumatan Israel nanattakka wuassu marua'allo udde naddatingngu tempo apan buatte nitantun-Ne. Su ahewallu Israel 70.000 suatoune nate.

¹⁶ Mala'ekattu Mawu apan uaapiddu papate na'omate su tampa pakkindanna gandumma tatahuananni Arauna, taumatan Yebus. Sutempo Mawu naasilo manungku mala'ekatta udde nasaddiate manginsue Yerusalem, Mawu namal᷊u laṛṛawen-Ne, ne mala'ekatta udde naddote nakkuumannu walahanna udde. Wisara-Ne su mala'ekatta udde, “Wotongngete! Addote!”

¹⁷ I Daud naasilo mala'ekatta apan tantal᷊anna mammate tumanangnge udde, ana see i tou nabbisara Mawu, “Ete i ya'u apan marosa ana waugu i ya'u apan na'ola'a pasasal᷊a udde. Arawe apate pasasal᷊an walahanna nasusa udde? Ṛuumana'e i ya'u wuṛṛu amonangku!”

¹⁸ Su allo udde lai i Gad nirumanta sinumaruanna si Daud wuṛṛu nabbisara si tou, “Ṛinone i Tuangnga umawitta su tampa pakkindanna gandumma tatahuannanni Arauna, wuṛṛu mapararisikku mezbah su Mawu.”

¹⁹ Ne i Daud inaite uasul᷊ungngu parentan Mawu apan niapasingkatti Gad si tou.

²⁰ Nassuhanne lai i Arauna tantal᷊anna mangngintanno, ne i tou naasilo ratu wuṛṛu mallal᷊aṛenggenne matuddan tou. I Arauna nassubba su saruanni Daud,

²¹ wuṛṛu naiwal᷊o, “Apa pandumannu darantan Tuangnga?” I Daud sinumimbakka, “Mamalli tampan pakkindanna gandumma indi, ya'u mapararisikku mezbah su Mawu isindi, tadea'u radda'a indi umaddote.”

²² I Arauna nabbisara, “Anute Tuangnga, wuṛṛu onggol᷊a'e su Mawu sarangkanambone apan tumuṛṛutti Tuangnga mapia. Indi lai manga sapi ola'e sasamba itattambunna wuṛṛu alune ipanambunna i Tuangnga wotongnge manganu pul᷊on pajeko wuṛṛu manga pappalla pakkindanna.”

²³ I Arauna nangonggollu sarangkanambone udde su ratu, lapiddu nabbisara, “Doronganna Mawu Ruatan Tuangnga manengkamma aonggolli Tuangnga.”

²⁴ Arawe ratu sinumimbakka, “Arie! Tampa indi ta'u wallianna. I ya'u maddiri mangonggolla su Mawu Ruata'u sambau saranapa apan niasombanganna ringannu tawe sahadde.” Ana see i Daud namallite tampa pakkindanna gandumma wuṛṛu manga sapi udde ringannu aregane liman pul᷊o roitta sal᷊a'a.

²⁵ Ana see i Daud napararisikku mezbah Mawu isudde wuṛṛu nangonggollu sasamba itattambunna see lai sasamba paddarame. Mawu naddaringikka aal᷊iomanni Daud, ana see nasuete radda'a udde su Israel.