2 SAMUEL 23 - WUKE SUSI WATTI'U AL᷊AL᷊USASSA

Wisaran Daud apan panginsueanne

¹ I Daud ana'i Isai nipile naola'a ratu wuṛṛu niola'u Ruatan Yakub taumata apan a'addatanna. Ete i tou apan nangarangngu manga aantari hunan Israel. Eteindi wisaran Daud apan panginsulanne;

² Ghaṛṛahon Mawu buatte nabbisara si ya'u; tanata wuṛṛu ṛengetan-Ne indi su wiwi'u.

³ Ruatan Yakub buatte nabbisara; ete si ya'u mallal᷊u'addu Israel nabbisara: “Ratu apan uaparenta tumanangnge ringannu atatul᷊idda apan uapiaṛṛa'a ringannu tatuṛṛutta su Mawu,

⁴ I Tou naal᷊ihidda semakku matannallo lullansiangnga sutempo marua'allo napawe langitta matilangnga. I Tou naal᷊ihidda semakku matannallo napawe wua nanguranna napangelomma nannal᷊o maṛṛansangnga lullendappa.”

⁵ Aroddi lai papapulungku nial᷊amatannu Ruata, pa'aire-Ne si ya'u, tawe mawal᷊u, pa'aire-Ne udde mal᷊annu-l᷊annu wuṛṛu nasuungnga, mangke sidutu uaatokka su sarangkanambone. Ruata uariaga auntungangku wuṛṛu nangutungngu al᷊awo'u apulun naungku.

⁶ Arawe manga taumata apan tawe tumuṛṛutta Mawu naal᷊ihidda ṛoa'a apan niramme. Liman taumata tawe maagassa;

⁷ tawe saran sangkatou apan mappulu mangindingnga si tou amungkangu tawe a'oenne wuassu alu ara'e atta'a. Manga taumata udde nasue niepoddu putungnga.

Manga tantaran Daud apan tinumelengnga

⁸ Eteindi arannu manga piaṛṛa'u tantaran Daud apan tinumelengnga; Paarorone eteudde i Ishbaal, taumatan Hakhmoni, piaṛṛa'u “Ammul᷊annu Tatallu” (Triwira). Buatte su sambau pangalo i tou nando'appa ual᷊u ṛasutta su atoune wuṛṛu namate si mangitou ringannu sambeangnge.

⁹ Taumata aruane sulal᷊ummu Triwira eteudde i Eleazar ana'i Dodo wuassu amonanni Ahohi. I Tou uarundinganna si Daud sutempo i mangitou sinumaruanna taumatan Filistin apan buatte naammulla inai mapapangalo. Ana see sutempo udde taumatan Israel sinumoṛṛotta.

¹⁰ I Eleazar sidutu mammangalo wuṛṛu namate taumatan Filistin na'oman sara i tou tumaniten nal᷊otakka. Limane namantikka na'oman sara i tou tawe maapamallosu hal᷊elene. Su allo udde Mawu nangonggollu auntunganna apan bahewalla su Israel Tantaran Israel apan sinumoṛṛotta tanginna nabelengke su tampan Eleazar uapapangalo, ana see nalluatta laubbu manga winal᷊unanna isudde.

¹¹ Taumata atallune sulal᷊ummu Triwira eteudde i Sama ana'i Age wuassu Harari. Su paassa taumatan Filistin uaammulla su Lehi, su sambau wailla apan napenen tambue, tantaran Israel tinumal᷊angngu taumatan Filistin.

¹² Arawe i Sama sidutu uapapangalo, namate wuṛṛu namaddon taumatan Filistin, na'oman sara naataṛṛangnga wawail᷊anna udde. Etearoddi Mawu nangonggollu auntunganna apan wahewalla.

^13-14 Su allo waine maṛṛangattu tempo pangitinganna, siri tallu wuassu siri 30 piaṛṛa'u tantaran Daud apan apianne sinumossokka su Liangngu Adulam. Sutempo udde i Daud sulal᷊ummu tanda'a watu su liangnga udde. Taumatan Filistin naddasanna su Wawal᷊annu Refaim, wuṛṛu sambageanganna wuassi mangitou naapangaṛṛo Betlehem.

¹⁵ I Daud naanaungke ampungnga niariadianne udde wuṛṛu nabbisara, “Eh, unnuwisara i ya'u nionggol᷊annu ua'e wuassu paṛṛihi maranin ngara wahewalla su Betlehem!”

¹⁶ Naaringikka udde siri tallu tembonanne udde nalliu paddasanannu taumatan Filistin, ana see naniate ua'e su paṛṛihi udde, wua'udde niapidda ringanni Daud. Arawe i Daud maddiri ma'inumma, ewe'e niwoson tou maola'a sambau aonggolla su Mawu.

¹⁷ I tou nabbisara, “Oh Mawu, i ya'u tawe mappa'inumma ua'e indi! Amungkangu i ya'u ma'inumma, ere lai ya'u na'inumma daṛṛan manga taumata apan buatte nanantillu niawan mangitou!” Nariaddi i Daud mangke maddiri ma'inumma ua'e udde. Eteudde inasaharannu siri tallu taumata waṛṛani apan matohassa udde.

^18-19 Siri tallu pul᷊o piaṛṛa'u tantara apan tinumelengnga udde isassago lai “Tridasawira”. I mangitou ipappiaṛṛa'i Abisai tuarin Yoab, ana'i Zeruya. I tou buatte namate tallu ṛasutta suatoune ringannu sambeangnge. Ana waugu udde i tou tinumelengnga. Arawe i tou tawe ere awawaṛṛanin “Triwira”.

²⁰ Sangkatou piaṛṛa'u tantara apan tinumelengnga waine eteudde i Benaya ana'i Yoyada taumatan Kabzeel. I tou tumaniten baṛṛani. Ruan katou waṛṛanin seetta wuassu Moab buatte nipatene. Buatte su allo sambau, i tou sinumutta su sambau loṛṛangnga, ana see nanametta sambau singa isudde.

²¹ I tou lai buatte namate sangkatou taumatan Mesir, apan matohassa wuṛṛu ahidde sambeangnga. I Benaya sinumaruanna tumba'u uaagassa ta'innaa. Sambeangnga su liman taumatan Mesir udde niaṛṛo ana see nipaata pinamate taumata udde.

²² Eteudde manga inasaharanni Benaya, sangkatou wuassu “Tridasawira”.

²³ Sulalummu ammul᷊anna udde, ete i Benaya apan awaṛṛanianne, arawe i tou tawe mattohasanna wuassu “Triwira”. I Daud namile si tou naola'a tembonannu mandariaga si tou.

^24-39 Manga taumata wuassu “Tridasawira” eteudde: i Asael tuarin Yoab i Elhanan ana'i Dodo taumatan Betlehem i Sama wuṛṛu i Elika taumatan Harod i Heles taumatan Palti i Ira ana'i Ikes taumatan Tekoa i Abiezer taumatan Anatot i Mebunai taumatan Husa i Zalmon taumatan Ahohi i Maharai taumatan Netofa i Heleb ana'i Baana taumatan Netofa i Itai ana'i Ribai taumatan Gibea su leta'u ruanganni Benyamin i Benaya taumatan Piraton i Hidai taumatan manga wawal᷊annu Gaas i Abialbon taumatan Araba i Azmawet taumatan Bahurim i Elyahba taumatan Saalbon i Al᷊aṛṛana'i Yasyen i Yonatan i Sama taumatan Harari i Ahiam ana'i Sarar taumatan Harari i Elifelet ana'i Ahasbai taumatan Maakha i Eliam ana'i Ahitofel taumatan Gilo i Hezrai taumatan Karmel i Paerai taumatan Arbi i Yogal ana'i Natan taumatan Zoba i Bani taumatan Gad i Zelek taumatan Amon i Naharai taumatan Beerot, mangangapiddu lutangngi Yoab i Ira wuṛṛu Gareb taumatan Yetri i Uria taumatan Het. i Sarangkanambone tallun pul᷊o pitu suatoune tantara apan tinumelengnga.