2 SAMUEL 22 - WUKE SUSI WATTI'U AL᷊AL᷊USASSA

Aantari al᷊al᷊uassi Daud

¹ Napawe Mawu buatte nanal᷊amatta si Daud wuassu taṛṛinon Saul wuṛṛu wuassu al᷊awo'u seenne waine, i Daud nangantarin aantari indi su Mawu: [

² I ya'u marangngu Si'o, oh Mawu, ete I'o atatoha'u.]

³ Mawu naal᷊ihidda tanda'a watu apan matohassa. Tampa pasasirungangku. Naal᷊ihidda allungnga i Tou uataappa si ya'u, wuṛṛu ual᷊u'adda tadea'u i ya'u sidutu mal᷊angnganna.

⁴ I ya'u sussal᷊ande su Mawu apan ṛinone raloanna, i Tou namallo'u wuassu anambon seetta.

⁵ I ya'u papal᷊iwutannu asasilakan papate wuṛṛu uaṛṛammo su manawangngu papate.

⁶ I ya'u papal᷊iwutannu asasilaka papate, seddan papate udde su saruangku.

⁷ Sulal᷊ummu asasusa'u i ya'u sussal᷊ande Si'o Mawu, i ya'u mangngintul᷊i su Ruata'u maddorongnga aontolla. Wuassu Wal᷊en-Ne i Tou naaringikka tingi'u wuṛṛu naddaringikka sasal᷊ande'u.

⁸ Ana see runia niumio'a wuṛṛu nangindo, manga rapappakku wowone naṛṛa'a nangiladda ana waugu asasa'un Duata!

⁹ Timbulla sussal᷊oi wuassu loṛṛangngu ngirun-Ne, putungnga wuṛṛu waṛṛa sinumabbangnga wuassu moṛṛong-Nge.

¹⁰ I Tou nama'a langitta, ana see sinumossokke i Tou, ringannu winabbawa marandumma su al᷊ungngu ledda-Ne.

¹¹ I Tou tinumalla'a ringannu uasa'e mala'ekatta; i Tou tuttalla'a su wowon papaiddu anginna.

¹² I Tou nangoossa watangan-Ne ringannu ararandumma; rallamma apan maappalla uapal᷊iwutta si Tou.

¹³ Wuassu sawallo su saruan-Ne, sinumabbangke winabbawa, uranna eisse wuṛṛu putungnga.

¹⁴ Ana see Mawu nirumallu'a winalanganna, Apan Atanggaṛṛanne napararingikku tingik-Ke.

¹⁵ I Tou namiti'u manga anaan-Ne, wuṛṛu nanal᷊iawukku seetta. I Tou namaṛṛassu sawallo masokka-sokka, wuṛṛu naatal᷊angngi mangitou.

¹⁶ Wantan tahal᷊oangnga nawu'essa wuṛṛu rapappakku runia nawu'a, sutempo Mawu nandona seen-Ne ringannu nasa'u.

¹⁷ Wuassu atanggaṛṛanne Mawu nangul᷊ukku lima-Ne; i Tou nangaggassa si ya'u wuṛṛu niwol᷊engnga wuassu ua'e apan malal᷊umma.

¹⁸ I Tou nanal᷊amatta si ya'u wuassu seetta apan matohassa wuṛṛu wuassu manga taumata apan maddantingku ana waugu i mangitou tumaniten matohassa su saruangku.

¹⁹ I mangitou namangalo si ya'u sutempo i ya'u niaṛṛiaannu asasusa arawe Mawu naola'a matatul᷊ungku.

²⁰ I Tou nalliu'u wuassu asasilaka wuṛṛu nanal᷊amatta si ya'u ana waugu i Tou marangngu si ya'u.

²¹ Mawu nabbal᷊issa inolaangku apan mapia; i Tou nangal᷊amatta si ya'u ana waugu i ya'u tawe sal᷊ane.

²² I ya'u tuttuṛṛutta parentan Mawu, wuṛṛu tawe tumal᷊iudda Ruata'u.

²³ Anambon tita-Ne ta'u raddaringiṛṛanna manga parenta-Ne tawe abbul᷊ianangku.

²⁴ I Tou masingkatta manungku i ya'u tawe sal᷊ane wuṛṛu naparaun batangangku wuassu pasasal᷊a.

²⁵ Ne Mawu nabbal᷊issa inolaangku apan mapia ana waugu i Tou masingkatta i ya'u tawe sal᷊ane.

²⁶ Mawu, I'o mararingikka su taumata apan matuṛṛutta, wuṛṛu mapia su taumata apan mapia.

²⁷ Su saruannu taumata susi I'o napal᷊iatta'u watangan-Nu susi, arawe taumata apan dal᷊eo paisaseetan-Nu.

²⁸ Taumata apan naungnge mawawo niapasal᷊aman-Nu; arawe taumata mawunga niṛṛuuman-Nu.

²⁹ I'o nande'omma sasol᷊oangku; Mawu Ruata'u nanemakka ararandungku.

³⁰ I'o nanohassa si ya'u ipamate seetta; ringannu sasumbala Mawu Ruata'u ta'u nihohakka tanda'a watu mangitou.

³¹ Inolaannu Ruata nasuungnga, paairen Mawu wotongnge apangimananna! I Tou naal᷊ihidda allungnga su sarangkanambone apan uasirungnga si Tou.

³² Ana waugu tumba'u Mawu udde Ruata; tumba'u Ruata apan uasamba'a si ite.

³³ Ete i Tou Ruata apan nanohassa si ya'u wuṛṛu na'ola'a lal᷊angku mal᷊angnganna.

³⁴ I Tou nanohassa ledda'u ere leddan rusa, wuṛṛu nallu'adda asasal᷊ama'u su panenteanna.

³⁵ I Tou nangaṛṛa'a si ya'u mapapangalo, na'oman sara i ya'u wotongnge mangannatta al᷊ati'anna apan atohasanne.

³⁶ Mawu, I'o uasirungnga wuṛṛu nanal᷊amatta si ya'u, wuṛṛu uatumpilla si ya'u ringannu taṛṛino-Nu wuṛṛu nabbal᷊i apianne ana waugu inolaan-Nu.

³⁷ I ya'u rariagan-Nu tadea'u i ya'u tawe iasametta wuṛṛu i ya'u tawe manawo saran paassa.

³⁸ I ya'u nangenggenna seetta wuṛṛu ta'u niwaddo i mangitou, wuṛṛu i ya'u tawe sumuṛṛotta ma'oman sara i mangitou mate.

³⁹ I mangitou ta'u niwal᷊atta na'oman sara tate maararisikka apia, i mangitou naṛṛa'a niasueannu ikanne su saruannu ledda'u.

⁴⁰ I'o nangonggollu atatohassa si ya'u iapappangalo, wuṛṛu auntunganna su manga see'u.

⁴¹ I'o na'ola'a see'u tinumal᷊angnga wuassi ya'u; manga taumata apan maddantingku ta'u nipate.

⁴² I mangitou mangngintul᷊i, arawe taweddu umontolla, i mangitou sussal᷊ande Mawu, arawe i Tou tawe sumimbakka.

⁴³ I mangitou ta'u niṛṛimunsa'a naal᷊ihidda awu apan nassal᷊iawukka, wuṛṛu ta'u nialassa naal᷊ihidda labbo su lal᷊anna.

⁴⁴ I'o namallo'u wuassu ṛuanganna apan lal᷊eo, wuṛṛu na'ola'a si ya'u uataṛṛino manga walahanna; walahanna apan awaganangku naola'a allangku.

⁴⁵ Manga taumata raho uasuṛṛubbawa si ya'u, wuṛṛu tuttuṛṛutta napawe maaringikka parenta'u.

⁴⁶ Awawaṛṛanin mangitou nawul᷊ite; i mangitou mangngindo wuṛṛu sinumabbangnga wuassu pa'imbunianne.

⁴⁷ Mawu udde wiakka! Daralo su mananahe'u! Pamantuge ahahewallu Ruata, mananal᷊ama'u!

⁴⁸ I Tou nangonggollu auntunganna wuassu see'u, manga walahanna niwaddo-Ne su saruangku,

⁴⁹ I Tou nanal᷊amatta si ya'u wuassu manga see'u. Mawu, I'o nangonggollu si ya'u auntunganna su see'u, I'o nanirungnga si ya'u wuassu taumata apan maṛṛagissa.

⁵⁰ Ne i ya'u naddalo Si'o suwallattu manga walahanna, wuṛṛu i ya'u nangantarin daralo Si'o.

⁵¹ Ruata nangonggollu auntunganna apan bahewalla su ratu apan nitene-Ge, I Tou sidutu marangngu taumata apan nipile-Ne, eteudde i Daud wuṛṛu papapulunne saran mal᷊annu-l᷊annu.