2 SAMUEL 21 - WUKE SUSI WATTI'U AL᷊AL᷊USASSA

Papapulunni Saul niṛṛuumanna pateanna

¹ Sutempo i Daud uaparenta, nariaddite tempon elessa apan al᷊annune tallu tonna nattinggumma. Ana see i Daud naddorongnga tatantiro wuassu Mawu su ola'u arariadianna udde, wuṛṛu Mawu nabbisara, “Elessa indi ana waugu pasasal᷊an Saul wuṛṛu amonanne, i mangitou buatte namate manga taumatan Gibeon.”

² (Manga taumatan Gibeon wal᷊ine taumatan Israel; i mangitou nasutta ammul᷊anna addio'a wuassu taumatan Amon. Manga taumatan Israel buatte naddiandi sarun mallu'adda si mangitou, arawe i Saul buatte naddea'a namate si mangitou ana waugu i tou maṛṛingiddu hausannu taumatan Israel wuṛṛu Yehuda.) Ana see i Daud namaggo manga taumatan Gibeon udde,

³ wuṛṛu naiwal᷊o si mangitou, “Apate apan botongnge ta'u olaanna si yamiu? I ya'u mappulu mamaekka pasasal᷊a apan buatte niola'a si'o, tadea'u i yamiu mangal᷊amatta al᷊aṛṛana'u Mawu.”

⁴ I mangitou sinumimbakka, “Hatton kami wuṛṛu i Saul see lai amonanne tawe wotongnge insueannu sal᷊a'a ara'e wul᷊awanna, arawe yami lai maddiri mamate sangkatou wuassu walahannu Israel.” Ana see i Daud nabbisara, “Amungkangu aroddi, apate ipaapulun kamiu apan ta'u olaanna?”

⁵ I mangitou sinumimbakka, “i Saul ratu nipilen Mawu pia pandumma mamate si yami sarangkanambone ma'oman sara yami mawul᷊i wuassu ahewallu Israel.

⁶ Ana waugu udde, tantil᷊a'e siri pitu su atoune wuassu papapulunne esakka, tadea'u ielen kami su saruannu Mawu su Gibea, soan Ratu Saul sassane.” Ratu sinumimbakka, “Ore, i mangitou sarun ta'u itantilla si yamiu.”

⁷ Arawe ana waugu i Daud wuṛṛu i Yonatan buatte nassalu sangkatou ringannu sangkatou, i Daud tawe nanantilli Mefiboset ana'i Yonatan.

⁸ Apan nial᷊appi Daud eteudde i Armoni wuṛṛu Mefiboset, eteudde ruan katou esakka ana'i Saul apan nisungkangi Rizpa ana'i Aya; see lai siri lima esakka ana'i Merab wawine ana'i Saul, manga ana'a udde niasungkanga wuassi Merab naawingngi Adriel ana'i Barzilai, taumatan Mehola udde.

⁹ I mangitou tinantilla su manga taumatan Gibeon, ana see siri pitu taumata udde nate suadio'a niele su wuidda su saruannu Mawu. Ṛuumanna pateanna udde niapaamatta su panginsueannu tempo rongnga mallal᷊uwo napawe jelai itingante.

¹⁰ Ana see i Rizpa nia'in Saul, namilattu nasa karongnga su wowon batu su tampan manga winal᷊unanna udde uatal᷊owangnga. I Rizpa tawe nanantangngu tampa udde wuassu panattaṛṛannu tempo mangitingnga naddatingngu tempon manguranna su watiannu rongnga manontongnga. I tou tawe namalan winal᷊unanna udde inasannu manga manu'u winalanganna su allo allattune ara'e winatangnga mal᷊aṛṛaga sutempo ṛabbi.

¹¹ Napawe nipasingkatta si Daud apa apan niola'i Rizpa,

¹² i tou inaite nangal᷊appa duṛṛin Saul wuṛṛu Yonatan wuassu tumana'u soa Yabes su Gilead. (Manga taumata udde buatte nanna'o manga duṛṛi wuassu leta'a mal᷊alangngu soa su Bet-San, tampan taumatan Filistin nangelen manga winal᷊unanna udde napawe i Saul nawaddo su wuiddu Gilboa.)

¹³ Manga duṛṛin Saul wuṛṛu Yonatan udde niapidda wua isudde, ana waugu niammulle lai duṛṛin siri pitu taumata apan niele udde.

¹⁴ Wua'udde manga duṛṛin Saul wuṛṛu Yonatan see lai duṛṛin siri pitu taumata udde nilabbinga sulal᷊ummu labbingi Kish iamangngi Saul su Zela su wageangngu leta'i Benyamin. Napawe sarangkanambone buatte nimanara ere su parentan ratu, Ruata naddaringikka aal᷊iomanni mangitou su ipanilla'uppa wanua udde.

Auntunganna napapangalo manga wawalle taumatan Filistin

¹⁵ Suwallattu taumatan Filistin wuṛṛu taumatan Israel napesangke apia pangalo. I Daud wuṛṛu tantarane inaite napapangalo nando'appa taumatan Filistin. Sulal᷊ummu pangalo udde i Daud naapendamma nal᷊otakka.

¹⁶ Ne nirumantate sangkatou wawalla aranne i Yisbi-Benob. Sambeangnge nilanginne wuassu witu'a awakkanne iraṛṛangngo tatallu mal᷊oara su kilone. I tou lai uapitan hal᷊ele apan wakku, wuṛṛu pia antimma wotongnge ma'apate si Daud.

¹⁷ Arawe i Abisai ana'i Zeruya nirumanta nangontola si Daud. I tou nando'appa wawalla udde ana see nipate. Wua'udde tantaran Daud sinumal᷊ande tadea'u i Daud tate lai tumantalongnga sulal᷊ummu pangalo. “I Tuangnga udde pangangantimannu Israel, arie ma'oman sara yami awul᷊ianni Tuangnga,” unni mangitou.

¹⁸ Ne nariaddite lai pangalo nando'appa taumatan Filistin su Gob. Sulal᷊ummu pangalo udde i Sabkhai taumatan Husa namate sangkatou wawalla aranne i Saf.

¹⁹ Sulal᷊ummu pangalo waine ringannu taumatan Filistin su Gob, Elhanan ana'i Yair wuassu Betlehem namate si Goliat wuassu Gat. Pul᷊un sambeangngi Goliat udde naal᷊ihidda asallakku alu ipandadu'a.

²⁰ Nariaddi lai pangalo nando'appa taumatan Filistin su Gat. Isudde pia sangkatou wawalla apan apulune uapapangalo. Tal᷊imaddone annummu wua suapan limane wuṛṛu suapan leddane.

²¹ I tou mangngeetta taumatan Israel, ne ana waugu i tou niapaten Yonatan ana'i Simea, iaangngi Daud.

²² Siri appatta apan niapaten Daud wuṛṛu tantarane udde, eteudde papapulunnu wawalla su Gat.