2 SAMUEL 20 - WUKE SUSI WATTI'U AL᷊AL᷊USASSA

I Seba namangalo

¹ Su soan Gilgal pia sangkatou taṛṛa sal᷊asa'a aranne i Seba. I tou ana'i Bikri, wuassu ruanganni Benyamin. Sutempo taumatan Daud nangelekka nirumanta, i Seba nattiuppa trompetta wuṛṛu nangintul᷊i, “I ite tawe paa'aukka ringanni Daud. Ipa'ura i ite tumantalongnga si tou? Ei taumatan Israel, wette i ite mapul᷊ete!”

² Ana see manga taumatan Israel udde inaite nanantangngi Daud wuṛṛu tinumantalongnga si Seba. Arawe manga taumatan Yehuda sidutu matuṛṛutta wuṛṛu uatantalongnga si Daud wuassu Sal᷊ukku Yordan naddatingngu Yerusalem.

³ Napawe i Daud na'omate su wal᷊en araratuanne su Yerusalem, siri mapul᷊o nia'i apan nitantangnge iapariaga wal᷊en araratuanna, niapatana'i tou su wal᷊en apan lal᷊u'arannu mandariaga. Hausanni mangitou mangke nisuungnganna, arawe tawe saran paassa i Daud natiilla ringanni mangitou. Nariaddi i mangitou udde niṛṛambatta wuṛṛu i mangitou mabbiakka ere wawine wal᷊u ma'oman sara mate.

⁴ Ratu namarenta si Amasa, “Ammul᷊a'a taumatan Yehuda wuṛṛu rantate su sambau ringanni mangitou sulal᷊ummu tallu allo.”

⁵ Ana see i Amasa inaite nangammulli mangitou, arawe i tou tawe naawelengnga sutempo apan buatte tinantunnu ratu.

⁶ Wua'udde ratu nabbisarate si Abisai, “i Seba udde tumaniten mapaasusan kite maddal᷊eoanna wuassi Absalom. Ana waugu udde apira'e tantara'u wuṛṛu enggenete i tou, tadea'u arie ma'oman sara i tou maapamanua su soa apan pia tanda'a watune, wuṛṛu maatal᷊angnga wuassi ite.”

⁷ Ne su al᷊ungngu piaṛṛa'i Abisai, tantaran Yoab wuṛṛu tantara mandariaga ratu wuṛṛu manga tantara waine lai inaite wuassu Yerusalem nangenggenna si Seba.

⁸ Sutempo i mangitou na'omate su watu wara'a su Gibeon, i Amasa nirumanta naisasomban mangitou. I Yoab sutempo udde ual᷊uṛṛen laubbu pangalo ringannu hal᷊ele pia papaṛṛanganne apan uapeta su lawanne. Napawe i tou inaite niumamatta, papaṛṛanganne napallossa na'oman sara hal᷊ele na'ingkatta su limane aiṛṛi.

⁹ I Yoab nabbisara si Amasa, “Ereapate watti'a, hawe?” lapiddu nangagassa omengngi Amasa ringannu limane aikkatanna ere ola'u mangari'a si tou.

¹⁰ I Amasa tawe naasilo hal᷊ele su lima aiṛṛin Yoab. Inaṛṛombanganne i Yoab nangusu'u hal᷊ele su tianni Amasa, na'omna sara lal᷊oṛṛon tianne nassal᷊iawukka su leta'a. I tou nate su orassa udde lai, na'oman sara i Yoab salaiwe tate mangusu'a apia. I Yoab wuṛṛu i Abisai tuarine, sidutu mangngenggenna si Seba.

¹¹ Sangkatou tantaran Yoab uarisikka maranin winal᷊unanni Amasa wuṛṛu nangintul᷊i, “Isai apan uasamba'a si Yoab wuṛṛu si Daud, tantalongke si Yoab!”

¹² Winal᷊unanni Amasa apan napenen daṛṛa udde uatal᷊alladda su tangngan dal᷊anna. Tantaran Yoab tanginna naasilo manungku anambon taumata apan sussabbi mattaalla isudde. Ana waugu udde i tou namol᷊engnga winal᷊unanna udde su wailla wuṛṛu tinaapannu nasa.

¹³ Napawe winal᷊unanna udde niaddote marau wuassu lal᷊anna, anambon taumata nanassukken amatanne tinumantalongnga nangenggenna si Seba.

¹⁴ I Seba buatte namal᷊intaddu ahewallu wageangngu leta'u walahannu Israel, ana see na'omate su soan Abel-bet-Maakha tatantalongannu anambon taumata wuassu alahanni Bikri.

¹⁵ Tantaran Yoab naaringikka manungku i Seba uatana'a isudde, ne i mangitou namal᷊iwutte soa udde. I mangitou nangombon leta'a uapal᷊iwutta tanda'a watu su liudde wuṛṛu na'al᷊ite leta'a su al᷊ungngu tanda'a watu udde tadea'u maṛṛa'a.

¹⁶ Su soa udde pia sangkatou wawine apan pande, ne i tou uarisikka su wowon tanda'a watu udde wuṛṛu niumal᷊iata, “Paddaringikka! Paddaringikka! paddorongke tadea'u i Yoab rumanata inawarendi; ya'u maapulu maggahatto tou.”

¹⁷ Ana see i Yoab nirumantate, wuṛṛu wawine udde naiwal᷊o, “Ete i Tuangnga aranne i Yoab?” “Ore,” sasimbakki Yoab. Wawine udde nabbisara, “Daringiṛṛewe wisara'u indi, Tuangnga.” “Ore, i ya'u maddaringikka,” sasimbakki Yoab.

¹⁸ Wawine udde nabbisara, “Dorone manga taumata inanaramanne mabbisara arendi, ‘Amungkangu i'o mappandumma tatantiro, roote watukku soan Abel’ – wuṛṛu eteudde apan olaanni mangitou.

¹⁹ Soan kami Abel indi wahewalla, sambau soa apan matammudda wuṛṛu matuṛṛutta su leta'u Israel. Anio i Tuangnga pia pandumma mankkimunsa'a soa udde? i Tuangnga maapulu manggohakka leta'a pussa'an Mawu?”

²⁰ “Tawe!” sasimbakki Yoab, “i ya'u saran addio'a tawe pandumma manggohakka ara'e makkimunsa'a soanu!

²¹ Udde wal᷊ine ṛiinni yami. Arawe sangkatou aranne i Seba ana'i Bikri, apan darantane wuassu leta'u panenteannu Efraim, buatte namangalo si Ratu Daud. Tantil᷊a'e i tou, ana see i ya'u manantangngu soa indi.” Wawine udde nabbisara, “Puan taumata udde sarun ituntungngi yami si Tuangnga wuassu tanda'a watu indi.”

²² Ana see i tou inaite, wuṛṛu ringannu apandene namasingkattu pandumanne su tumana'u soa. Wua'udde puan Seba niponggo'a ana see niwareta si Yoab. Wua'udde i Yoab nattiuppa trompetta ne tantarane nanantangken soa udde ana see napul᷊ete su wal᷊ene sambau-sambau. I Yoab napul᷊ete lai watukku Yerusalem sinumaruanna ratu.

Manga mamanaran Daud

²³ Eteindi manga mamanara atanggaṛṛanne apan nipilen Daud; Tembonannu anambon tantara: i Yoab. Piaṛṛa'u tantara mandariaga si Daud: i Benaya ana'i Yoyada.

²⁴ Tembonannu manaran hamente: i Adoram. Mangangagassa roittu araratuanna: i Yosafat ana'i Ahilud.

²⁵ Mamamoṛṛettu araratuanna: i Seya. Imam: i Zadok wuṛṛu i Abyatar.

²⁶ Imam su wal᷊en araratuanna; i Ira wuassu soan Yair.