2 SAMUEL 19 - WUKE SUSI WATTI'U AL᷊AL᷊USASSA

I Yoab napal᷊iatta'u pasasal᷊an Daud

¹ Si Yoab niapasingkatta manungku i Ratu Daud lulluai wuṛṛu lullal᷊on Absalom.

² Ne auntunganna su allo udde nawal᷊u nabbal᷊i asasusa su anambon tantaran Daud ana waugu i mangitou naaringikka manungku ratu lulluain parinsine.

³ Ringannu mal᷊anna-l᷊annabba i mangitou nabelengke watukku soa, naal᷊ihidda tantara apan naapendamma asasili ana waugu tinumal᷊angngu watanganne wuassu pangalo.

⁴ Ratu nattimbuṛṛunna hatine wuṛṛu lulluai ringannu ma'ikkatta, “Oh ana'u! Ana'u Absalom! Absalom, ana'u!”

⁵ I Yoab inaite sinumaruanna ratu wuṛṛu nabbisara, “Su allo indi i Tuangnga namansili tantaran Tuangnga, sumbal᷊i ete i mangitou apan nanal᷊amatta niawan Tuangnga, niawan manga wawine ana'i Tuangnga, awingnga wuṛṛu nia'in Tuangnga.

⁶ I Tuangnga niumakkannu manga taumata apan maddantinni Tuangnga, arawe i Tuangnga maddantinnu manga taumata apan marangngu si Tuangnga! Ringannu masemakka i Tuangnga mammasilo manungku manga piaṛṛa'u tantara wuṛṛu manga tanataran Tuangnga mangke tawe gunane si Tuangnga. Ewe'e lai aellehanna ereola'u i Tuangnga mal᷊uassa amungkangu su allo indi i Absalom ta'e wiakka wuṛṛu yami sarangkanambone nate!

⁷ Ṛinone i Tuangnga mabbuatta wuṛṛu sumabbangnga mapaasunge naungngu tantaran Tuangnga. Allangngu massalu ringannua arannu Mawu, amungkangu i Tuangnga tawe sumabbangnga maisasomban mangitou, ne ṛabbi indi lai taweddu saran sangkatou apan maapulu rumandinganna si Tuangnga. Udde sarun maola'a sambau asasusa apan ahewal᷊anne apan sarun apendamanni Tuangnga su al᷊o'engngu pabbiaṛṛanna.”

⁸ Wua'udde dirumarisikke ratu wuṛṛu sinumabbangke su liudde, wuṛṛu niuma'ianna maranin ngara passallanganna. Tantarane naaringikka manungku i tou isudde, ne i mangitou sarangakanambone nirumanta sinumaruanna. Tantal᷊anna udde anambon tantaran Israel tinumal᷊angke, wuṛṛu napul᷊ete su wal᷊en sambau-sambau.

I Daud nabelengnga su Yerusalem

⁹ Su pattangngannu anambon walahannu Israel nariaddite patatatiakka. I mangitou mabbisara, “i Ratu Daud buatte nanal᷊amatta si ite wuassu taṛṛinon taumatan Filistin wuṛṛu namallossi ite wuassu manga seetta waine, arawe orassa indi i tou tinumal᷊angngi Absalom wuṛṛu nanantangngu wanua indi.

¹⁰ I Absalom nitenegi ite naola'a ratu, arawe orassa indi natete sulal᷊ummu pangalo. Anio tawe saran sangkatou apan maṛṛingidda mangapiddi Ratu Daud mabbelengnga?”

¹¹ Manga wisara udde niaringiṛṛanni Ratu Daud lai. Ana waugu udde i tou nandolokki Imam Zadok wuṛṛu Imam Abyatar niapaiwal᷊o su piaṛṛa'u Yehuda arendi, “Anio i yamiu nabbal᷊i asal᷊immurianne nanal᷊oho wuṛṛu nangammungnga ratu nabelengnga watukku wal᷊en araratuanne?

¹² Wal᷊inewe i yamiu tuṛṛangku wuṛṛu hawe'u? Tawe mariaddi yamiu sal᷊immurine naddorongnga tadea'u i ya'u mapul᷊e?”

¹³ I Daud nandolokki mangitou lai niapawal᷊o si Amasa arendi, “Wal᷊inewe i'o hawe'u? Manattakka orassa indi ya'u mamile si'o maola'a tembonannu tantara ipallol᷊ossa si Yoab. Antimanna Mawu mamate si ya'u amungkangu olangnge indi tawe niola'u!”

¹⁴ Etearoddi i Daud naapanganu naungngu anambon taumatan Yehuda na'oman sara i mangitou napaapiddu tanata su ratu tadea'u iapawelengnga su wal᷊en araratuanna suadio'a ringannu manga mammamanaran araratuanna.

¹⁵ Ana see ratu inaite wuṛṛu na'omate su Sal᷊ukku Yordan, tantal᷊anna udde manga taumatan Yehuda na'omate su Gilgal inai manal᷊oho ratu wuṛṛu mandiaga si tou tumumbe sal᷊ukka udde.

^16-17 I Simei ana'i Gera, taumatan Benyamin udde uaapiddu saṛṛiwu su atoune ruanganni Benyamin wuṛṛu mal᷊iha-l᷊ihakka nirumanta suadio'a ringannu taumatan Yehuda udde manal᷊oho ratu. Aroddi lai i Ziba allangngu amonanni Daud, su sambau ringannu siri mapul᷊o l᷊ima anangnge esakka wuṛṛu ruan pul᷊o suatoune allangnge; i mangitou tinumumbete Sal᷊ukku Yordan tantal᷊anna ratu taambe na'oma.

¹⁸ I mangitou mallal᷊ima amonannu ratu udde tinumumbe wuṛṛu mammanara al᷊awo'a apan nirolokku ratu si mangitou. Sutempo ratu tumumbete sal᷊ukka, i Simei niumal᷊intudda su saruanne wuṛṛu nabbisara,

I Daud nandangngu si Simei

¹⁹ “Allangngu sumal᷊ande, antimanna i Tuangnga tawe mangantimma manungku allangngu indi sidutu nassal᷊a. Doronganna i Tuangnga maabul᷊i inolannu allangngu sutempo i Tuangnga manantangngu Yerusalem.

²⁰ Allangngu naatutukke, manungku allangngu buatte na'ola'a rosa, ne ana waugu udde, suwallattu manga walahanna apan uatana'a su wageangnge samba'a sawannakka, ete allangngu apan paarorone nirumanta manal᷊oho si Tuangnga su allo indi.”

²¹ Naaringikka udde i Abisai ana'i Zeruya nabbisara, “i Simei wotongngete iṛṛuumanna pateanna ana waugu i tou buatte nantal᷊an ratu apan nipilen Mawu.”

²² Arawe i Daud nabbisara si Abisai wuṛṛu si Yoab iaangnge, “Ariete pallo'a su hatto indi. Anio i yamiu mapasusa'u? Su allo indi ya'u naola'e ratu apia su Israel, wuṛṛu tate wotongnge pia taumatan Israel apan iṛṛuumanna pateanna.”

²³ Wua'udde ratu nassalute si Simei, “I ya'u maddiandi manungku i'o tawe iṛṛuumanna pateanna.”

I Daud nandangngu lai si Mefiboset

²⁴ Ana see lai i Mefiboset pulunni Saul, nirumanta nanal᷊oho ratu. I tou tawe nangukkassa leddane, tawe nangiṛṛi omengnge, wuṛṛu tawe nabbansalla laungnge ro'en i Ratu Daud nanantangngu Yerusalem na'oman sara i tou nabbelengnga ringannu sal᷊amatta.

²⁵ Sutempo i Mefiboset nirumanta wuassu Yerusalem inai manal᷊oho ratu, ratu nabbisarate si tou, “Mefiboset, anio i'o tawe tinumantalongnga si ya'u su orassa udde?”

²⁶ I tou sinumimbakka, “Apan Mawantuga, Tuangnga masingkatta manungku allangngu indi peṛṛo. Allangngu nandolokku mangangimben allangngu niapasaddia keledai apan botongnge sa'eannu allangngu tumantalongnga si Tuangnga. Arawe allangnga nial᷊uandahannu mangangimbe udde.

²⁷ Ewe'e lai allangngu nilobbosanne su saruanni Tuangnga. Arawe i Tuangnga naal᷊ihidda mala'ekattu Ruata. Ana waugu udde ola'e sarangkanambone apan tumuṛṛutti Tuangnga udde mapia.

²⁸ Anambon ṛuanganna amonannu iamangngu allangngu ṛinone iṛṛuumanna pateanni Tuangnga, arawe allangngu indi buatte niwalan Tuangnga umanna su wal᷊en araratuanna. Orassa indi allangngu tate waṛṛani lai maddorongnga al᷊awo'a wuassi Tuangnga.”

²⁹ Ratu sinumimbakka, “Ariete i'o mabbisara manambo. I ya'u buatte nakkawessa mangonggollu anambon pa'a'alan Saul; si'o wuṛṛu si Ziba.”

³⁰ Ana see i Mefiboset sinumimbakka, “Wala'e i Ziba manganu sarangkanambone udde. Allangngu mal᷊uasse ana waugu i Tuangnga napul᷊ete ringannu sal᷊amatta.”

I Daud nandangngu lai si Barzilai

³¹ Ana see lai i Barzilai taumatan Gilead udde nirumanta wuassu Rogelim inai makkundinganna ratu tumumbe Sal᷊ukku Yordan.

³² I Barzilai timmadete, uukke ual᷊ote pul᷊o su tonnane. I tou tumaniten ala wuṛṛu su al᷊annune i Ratu Daud uatana'a su Mahanaim dorone, ete i Barzilai apan mannaddia wiakku ratu.

³³ Ratu nabbisara si tou, “Tantalongke si ya'u watukku Yerusalem, sarun ta'u utunganna al᷊awo'u apa apan ipaapulunu poiaroddi.”

³⁴ Arawe i Barzilai sinumimbakka, “Allangngu tate lai mabbiakka mal᷊annu. Nariaddi apa hunane allangngu tumantalongnga si Tuangnga watukku Yerusalem?

³⁵ Uukku allangngu ual᷊ute pul᷊o su tonnane wuṛṛu tate lai apan botongnge mangonggollu al᷊al᷊uassa su allangngu. Allangngu tate lai maapendamma temangngu anna ara'e ua'e wuṛṛu tate lai maaringikka tingikku taumata mangngantari. Allangngu tumba'u maola'a winabbawan Tuangnga.

³⁶ Allangngu tate su tampane manengkamma lal᷊antakke ahewalle udde. Allangngu tumba'u mappulu umamatta piran kal᷊empangnga manguntuddi Tuangnga su samba'an Sal᷊ukku Yordan.

³⁷ Wua'udde wala'e allangngu mapul᷊e su wal᷊e'u wuṛṛu mate maranin labbingngu hagurangngu allangngu, arawe indi ana'u allangngu i Kimham. Wala'awe i tou tumantalongnga si Tuangnga wuṛṛu ola'awe tumuṛṛuttu su aellegi Tuangnga udde mapia.”

³⁸ Ratu sinumimbakka, “i Kimham sarun ta'u iapidda wuṛṛu ta'u paddul᷊iananna ere su apulunu, wuṛṛu anambon darorongngu si ya'u sarun tipusanna.”

³⁹ Wua'udde i Daud wuṛṛu anambon tantarane tinumumbete Sal᷊ukku Yordan. Ana see i Daud nangari'a si Barzilai wuṛṛu itarua nattal᷊ei. Wua'udde i Barzilai napul᷊ete su wal᷊ene.

Yehuda wuṛṛu Israel natatiakka su ola'u ratu

⁴⁰ Anambon tantaran Yehuda wuṛṛu mattangnga wuassu tantaran Israel uatantalongnga ratu tinumumbe sal᷊ukka. Wua'udde ratu nasal᷊ate watukku Gilgal, wuṛṛu i Kimham uarundinganna si tou.

⁴¹ Wua'udde nirumantate anambon taumatan Israel sinumaruanna ratu wuṛṛu nabbisara si tou, “Tuangnga, anio tuṛṛangngi yami manga taumatan Yehuda udde massunna manungku ete i mangitou apan botongnge manal᷊oho wuṛṛu mandiaga si Tuangnga suadio'a ringannu amonanna wuṛṛu tantaran Tuangnga tumumbe Sal᷊ukku Yordan?”

⁴² Ana see taumatan Yehuda sinumimbakka, “Etearoddi, ana waugu ratu udde tuṛṛangngi yami. Anio i yamiu massa'u? Apa hausanni yami tatanggumannu ratu, ara'e i tou buatte nangonggolu lal᷊antakke si yami?”

⁴³ Taumatan Israel sinumimbakka, “Taṛṛinon kami su ratu paapul᷊o maggewal᷊anne wuassu taṛṛinon kamiu, salaiwe ratu udde tuṛṛangngi yamiu. Anio i yamiu mangngaddio'a si yami? Arie pa'abul᷊iane manungku ete yami apan paarorone atonna naddorongnga tadea'u ratu iapidda mabbelengnga!” Arawe taumatan Yehuda maattiṛṛanna wuassu taumatan Israel wuṛṛu maddiri iawaddo.