2 SAMUEL 10 - WUKE SUSI WATTI'U AL᷊AL᷊USASSA

I Daud namaddon taumatan Amon wuṛṛu taumatan Siria

¹ Manga pira tempo wua'udde i Nahas ratun Amon natete, ne i Hanun anangnge esakka naola'a ratu.

² Ana see i Ratu Daud nabbisarate, “Nahas udde hawe'u apan matuṛṛuta. Nariaddi ya'u ṛinone lai sarun maggawen Hanun anangnge.” Ana waugu udde i Daud nandolokku daroloṛṛanna inai watukku wanua Amon iapal᷊uassa si Hanun ana waugu apapaten iamangnge.

³ Napawe i mangitou na'omate su Amon, manga piaṛṛa'u wanua udde nabbisara si Ratu Hanun, “Arie i Tuangnga maṛṛingidda manungku i Daud nandolokku daroloṛṛanna udde ana waugu i tou maapulu mangaddatta iamangngi Tuangnga! I tou nandolokku manga taumata udde inawarendi naola'a matataṛṛaso'o iapaparikissa soa indi, tadea'u i mangitou wotongnge maapangaṛṛo soa indi.”

⁴ Ana see i Hanun nanametta manga daroloṛṛanni Daud udde, nangiṛṛi omengngi mangitou samba'a, namonggo'a laubbi mangitou aaunne sara tapanna'a ana see nandolokki mangitou niapaapul᷊e.

⁵ Arawe i mangitou massili mapul᷊e su wanuan mangitou. Napawe olangnge udde niapasingkatta si Daud, i tou nannanata tadea'u manga daroloṛṛanna udde atana'e su Yerikho ma'oman sara omengngi mangitou tumuwote apia.

⁶ Wua'udde taumatan Amon naatutukka manungku inolaanni mangitou udde naaola'a si Daud naisaseetti mangitou. Ana waugu udde i mangitou nanewa 20.000 su atoune tantaran Siria apan uatana'a su Bet-Rehob wuṛṛu Zoba, see lai 12.000 su atoune tantara wuassu Tob, see lai ratu wuassu wanua Maakha ringannu 1.000 su atoune tantarane.

⁷ Napawe i Daud naaringikka olangnge udde, i tou nandolokki Yoab ringannu tantarane inai mapapangalo mando'appa seetta.

⁸ Taumatan Amon sinumabbangnga wuṛṛu nangatokku barisanne su saruannu ngara pasallangannu su soan mangitou Raba, arawe, taumatan Siria, taumatan Tob wuṛṛu Maakha nangatokku barisanni mangitou su wadda'a.

⁹ I Yoab naasilo manungku i tou niapal᷊iwutanten tantaran seetta su saruanne wuṛṛu su liudde. Ana waugu udde i tou namile tantaran Israel apan apianne wuṛṛu niapasaruanna tantaran Siria.

¹⁰ Ingana'a lambene tantaran Israel nitantilli tou si Abisai tuarine, apan nangatokku barisanni mangitou uasasaruannu tantaran Amon.

¹¹ Yoab nabbisara tuarine udde, “Napawe i ya'u tate maatottola sumaruanna tantaran Siria, paal᷊ihakka mangontola si ya'u; see lai napawe i'o tate lai maasaruanna mando'appa tantaran Amon, i ya'u sarun dumanta massumbala si'o.

¹² Paatammudda! Wette i ite mapapangalo ringannu waṛṛani hunan walahanni ite wuṛṛu manga soan Ruatan kite. Doronganna Mawu ma'ola'a sarangkanambone apan ipaapulu-Ne.”

¹³ I Yoab wuṛṛu tantarane inaite namangalo, na'oman sara tantaran Siria nampattal᷊angnga.

¹⁴ Napawe taumatan Amon naasilo tantaran Siria tinumal᷊angnga, i mangitou lai tinumal᷊angngi Abisai wuṛṛu sinumoṛṛotte sulal᷊ummu soa. Napawe buatte namangalo taumatan Amon, i Yoab napul᷊ete su Yerusalem.

¹⁵ Taumatan Siria naatutukke manungku i mangitou buatte niwaddon taumatan Israel, ana waugu udde i mangitou namaggo anambon tantarane tadea'u maammulla apia.

¹⁶ Ana see i Ratu Hadadezer nandolokku taumata niapawaggo taumatan Siria su samba'a ra'in Sal᷊ukku Efrat, ne i mangitou nirumantate su Helam su al᷊ungngu piaṛṛa'i Sobakh, tembonannu tantaran Ratu Hadadezer wuassu Zoba.

¹⁷ Naaringikka olangnge udde i Daud lapiddu nangammullu anambon tantaran Israel, ana see tinumumbete Sal᷊ukku Yordan, wua'udde inaite watukku Helam. Isudde taumatan Siria nangatokku barisanni mangitou ana see inaite namangalo tantaran Daud.

¹⁸ Arawe tantaran Israel nallimbuakka tantaran Siria. I Daud wuṛṛu tantarane namate 700 su atoune makakusiri keretan pangalo, wuṛṛu 40.000 su atoune tantara uasa'e awal᷊o; see lai i Zobakh tembonannu tantaran seetta nal᷊essa wahewalla na'oman sara nate su tampa papangaloanna.

¹⁹ Sutempo manga ratu apan paparentanni Hadadezer naatutukka manungku i mangitou nawaddote su tantaran Israel, i mangitou naddorongnga paddarame ana see nassuṛṛubbawate tantaran Israel. Nanattakka orassa udde taumatan Siria tate waṛṛani mallal᷊ima taumatan Amon.