2 PETRUS 3 - WUKE SUSI WATTI'U AL᷊AL᷊USASSA

Paaire su ola'u daranta Mawu

¹ Manga tuṛṛangnga apan arangnguanna! Ete indi sura'u aruane si yamiu. Sulal᷊ummu suratta darua indi, ya'u mangke mappandumma mapaasabangu manga ṛingiranna apan mapia si yamiu.

² I ya'u mandolokka tadea'u i yamiu mannaungnga manga wisara apan rorone suete niwisara manga nabi Ruata, wuṛṛu parentan Mawu. Ratum Punnu Sal᷊amatta apan niapassingkatu manga rasul si yamiu.

³ Paarorone, i yamiu ṛinone masingkatta manungku su allo-allo pangudusanne, sarun rumanta manga taumata apan pabbawiakke paparentannu apulu naungngi mangitou sassane. I mangitou sarun mangal᷊uandaga si yamiu,

⁴ ringannu mabbisara arendi, “Anaudde Mawu na'ire rumanta! Orassa indi suapa i Tou? Manga iamangngu al᷊amonang kite natete arawe al᷊awo'a mangke uasul᷊ungnga ere ro'en runia indi niriaddi!”

⁵ I mangitou atonna tawe manga'u manungku su al᷊amonane Ruata nandiaddi langitta wuṛṛu runia wuassu ṛengtan-Ne. Runia niriaddi-Ne wuassu ua'e, wuṛṛu ringannu ua'e;

⁶ wuṛṛu ringannu ua'e lai – eteudde ua'e manawangnga wahewa – runiang kal᷊amona udde nihohakka.

⁷ Arawe langitta wuṛṛu runia apan sara orassa indi, nipadul᷊ianannu ṛengetannu Ruata udde lai, ana see tutungannu putungnga su tempo addantane. Orassa indi langitta wuṛṛu runia ta'e papadul᷊iananna ma'oman sara allo manga taumata apan lal᷊eo udde iṛṛuumanna wuṛṛu pateanna.

⁸ Arawe manga tuṛṛangku, hatto sambau indi arie paabbul᷊iane: manungku su aellegu Mawu, allo massallo tawe paṛṛalane ringannu saṛṛiwu su tonnane – itarua udde nassul᷊ungnga si Tou.

⁹ Mawu tawe mal᷊iwue mangonggolu apa apan suete nipa'ire-Ne, salaiwe piaddu massunna aroddi. Arawe i Tou masabare si yamiu, ana waugu i Tou maddiri pia sangkatou apan mate. I Tou maapulu tadea'u anambon taumata mawal᷊u wuassu manga rosane.

¹⁰ Arawe Allo darantan Mawu sarun rumanta ere darantan taṛṛa ta'o. Su Allo udde langitta sarun mawul᷊i ringannu tingikka ruddallu'a, wuṛṛu manga saranapa su langitta sarun masue matutungnga, wuṛṛu runia ringannu al᷊awo'u lal᷊oṛṛone sarun mawul᷊i.

¹¹ Ana waugu sarangkanambone udde sarun ṛimunsaanna ringannu olangnge apan aroddi, ereapate ṛinone i yamiu mabbiakka? I yamiu mabbiakka susi wuṛṛu hunane tumba'u su Ruata sassane,

¹² tantal᷊anna i yamiu uaraṛṛaddo wuṛṛu luṛṛintulu darantan Allon Ruata. Su Allo udde langitta sarun masue matutungnga, wuṛṛu ana waugu sal᷊ihangnge, ne manga sarannapa su langitta sarun monossa.

¹³ Arawe i ite uaṛṛaddo apa apan suete pina'iren Duata, eteudde langitta wakku wuṛṛu runia wakku, isudde mangke pia atatul᷊idda.

¹⁴ Ana waugu udde, manga tuṛṛangnga apan arangnguanna, tantal᷊anna i yamiu uaṛṛaddo Allo udde, pappandumpe atonna-tonna mabbiakka susi wuṛṛu tawe pasassal᷊a su saruannu Ruata. Wuṛṛu paddul᷊ianete paa'aukka apan mapia ringannu Ruata.

¹⁵ Pendamete manungku asasabbare Mawun kite maola'a sambau tempo apan nionggoli Tou si yamiu tadea'u wotongnge masal᷊amatta. Paulus, tuṛṛangi ite apan arangnguanna, suete namoṛṛeta aroddi lai si yamiu. I Tou namoṛṛetu udde ringannu apande apan nionggolu Ruata si tou.

¹⁶ Sulal᷊ummu anambon suranne, Paulus siddutu mammoṛṛetu ola'u hatto udde. Atonna pia manga pira hatto apan masahadda passunnanne sulal᷊ummu manga suratti tou udde. Wuṛṛu wageangnge udde iwabal᷊elongngu manga taumata apan waggan apa-apa wuṛṛu apan lome pangangimanne. Olangnge udde tawe maatiangnga, ana waugu manga wageangnge waine wuassu Wuke Susi a'olaanni mangitou aroddi lai. Apa apan a'olaanni mangitou udde tumba'u manongkaki mangitou sassane.

¹⁷ Arawe i yamiu manga tuṛṛangku apan arangnguanna, maasingkatte olangnge udde. Ana waugu udde, paatehamma, arie i yamiu iawol᷊engnga sulal᷊ummu ararandumu manga taumata lal᷊eo, ma'oman sara i yamiu manawo wuassu tampa dararisiṛṛanu apan matohassa.

¹⁸ Ṛinone i yamiu lembon maapendamma al᷊amattu Mawu Yesus Kristus, Mawu wuṛṛu Punnu Sal᷊amatti ite, wuṛṛu ṛinone i yamiu lai lembon maaillal᷊a si Tou. Daralo si Tou, orassa indi wuṛṛu ma'oman sara mal᷊annu-l᷊annu! Amin. Tabea wuassi yami, Petrus