2 PETRUS 2 - WUKE SUSI WATTI'U AL᷊AL᷊USASSA

Manga huru awusu

¹ Su tempo apan nal᷊iu su wallatu walahannu Ruata suete nirumanta manga nabi awusu. Aroddi lai su wallatti yamiu sarun rumanta lai manga huru awusu. I mangitou sarun mangaṛṛa'u manga al᷊aṛṛa'a nassal᷊a, apan maapate taumata. Wuṛṛu i mangitou sarun maddandilu Tembonanne apan suete namallosi mangitou. Ringannu aroddi mangitou nandantan papate su watanganni mangitou sassane, apan sarun maṛṛia'a si mangitou ringannu mal᷊ihakka.

² Salaiwe aroddi, manambo taumata sarun tumantalongnga ola'u wiakku manga huru awusu udde apan tataṛṛinoannu apulu naungngi mangitou. Wuṛṛu inolaannu manga huru udde sarun mamol᷊engnga manambo taumata mangal᷊uandaga Lal᷊anna Naṛṛino mattuda Duata.

³ Ana waugu i mangitou masaṛṛia'u, ne manga huru awusu udde sarun mabatti'a si yamiu manga watti'a iaaṛṛangnge sassane ana see maasomba auntunganna wuassi yamiu. Arawe pamamarikisanna apan maṛṛuumanni mangitou mal᷊annute nissaddia, wuṛṛu papate apan suete nitantuna si mangitou tantal᷊anna uaraṛṛaddo si mangitou.

⁴ Manga mala'ekatta apan marosa lai tawe iwalan Duata mal᷊iu wuassu ṛuumanna, ewe'e iramme sulal᷊ummu naraka. I mangitou iwontola sulal᷊ummu rampissa apan maranduma wuṛṛu taṛṛanganna poiaroddi madatingngu Allo Pamarikisanna.

⁵ Aroddi lai runia su tempo rorone Ruata tawe namalan tou mal᷊iu wuassu ṛuumanna. Ruata napaarantan manawangnga wahewalla su runian manga taumata lal᷊eo su tempo udde. Tumba'u Nuh su sambau ringannu siri pitu waine apan niapaasal᷊amatta, ana waugu Nuh namasingkattu watti'a su ola'u wiakka apan maal᷊uassa naungngu Ruata.

⁶ Uasul᷊ungnga lai ere Sodom wuṛṛu Gomora: Ruata nanutungnga manga soa udde ringannu putungnga tadea'u maola'a tul᷊ada su ola'u apa apan sarun mariaddi su manga taumata lal᷊eo.

⁷ Arawe Lot nipaasal᷊amatta, ana waugu i tou tinumuṛṛuta apulun Duata; i tou lembon natataṛṛanga ana waugu pallal᷊agu tawe matataṛṛino wuassu manga taumata lal᷊eo.

⁸ Su pattangannu manga taumata udde, Lot apan mapia udde mabbiakka ringannu naungnga susa, ana waugu miallo-miallo i tou maasilo wuṛṛu maaringikka pallal᷊agu mangitou apan lal᷊eo.

⁹ Nariaddi, Mawu masingkatta ereapa manal᷊amatta manga taumata tuttuṛṛuta apulu-Ne su tempo i mangitou uasaruanna manga wawono'a. Wuṛṛu Mawu masingkata ereapa manahipunna manga taumata lal᷊eo udde sansaranna su Allo Pamarikisanna,

¹⁰ lembonete su manga taumata apan tuttuṛṛuta apulun naungngi mangitou apan lal᷊eo wuṛṛu mangal᷊uandaga taṛṛinon Duata. Aroddi awaṛṛanine wuṛṛu awungane manga huru awusu udde na'oman sara i mangitou tawe go'ane mangal᷊uandaga manga riaddianna apan mawantuga sara lai su surga!

¹¹ Arawe manga mala'ekatta apan mattohasanna marau wuṛṛu lembon taṛṛino wuassu manga huru awusu udde, tawe mangansila manga riadianna apan mawantuga udde ringannu wisara aal᷊uandaga su saruannu Mawu.

¹² Arawe manga huru udde wal᷊ine hampa! I mangitou ere winatanga niasungkanga see sametanna wuṛṛu pateanna. I mangitou tawe maṛṛingidda, arawe tumba'u mammanara tuttuṛṛuta apulun naungnga, na'oman sara i mangitou mando'appa manga hatto apan tawe iasunna mangitou ringannu manga wisara aal᷊uandaga. Ana waugu udde wuassu manga pallal᷊agu mangitou sassane, i mangitou sarun mate ere manga winatangnga mal᷊aṛṛaga.

¹³ Maola'a wawal᷊issu asasusa apan suete niola'i mangitou, i mangitou sarun matataṛṛanga susa. Inolaanna apan maal᷊uassa naungngi mangitou eteudde ma'ola'a al᷊awo'u inolaanna su allo allattune maddea'a mapaawusan apulun wadangi mangitou. Amungkangu i mangitou uaianna su sambau ringanni yamiu sulal᷊ummu andeangngu anna, pallal᷊agu mangitou maarantinna ana waugu i mangitou niwu'annu apulu naungngi mangitou.

¹⁴ I mangitou tawe illol᷊one ma'ola'a rosa, wuṛṛu al᷊utuanni mangitou ma'ellega wawine masandaga. Wuṛṛu taumata apan wakku mangngimanna wuṛṛu ta'e matul᷊u pangangimanne, wal᷊onotanni mangitou. Naungngi mangitou ninumarampen awawal᷊iu. Ete i mangitou udde taumata apan niawontohante!

¹⁵ Ana waugu i mangitou maddiri umamatta su lal᷊anna matul᷊ida, ne i mangitou nial᷊iwune. I mangitou niumamatta su lal᷊anni Bileam ana'i Beor dorone. Bileam indi mangke maapulu maasomba roitta wuassu inolaanne apan lal᷊eo.

¹⁶ Arawe i tou naasomba tatagu su inolaane apan lal᷊eo udde, su tempo keledaine nabbisara ringannu tingikku taumata. Ne nabi udde niwata'a mangillol᷊on pallal᷊agune apan naal᷊ihida ere wewa udde.

¹⁷ Manga huru awusu udde nal᷊ihida ere al᷊imatan kua'e apan namara wuṛṛu naal᷊ihida ere rallamma nitiuppu anginna al᷊isusu. Ruata suete nanaddia tampane, sambau tampa apan tumaniten maranduma.

¹⁸ I mangitou na'ola'a manga papasingkata apan napenen papal᷊onotta wuṛṛu tawe loṛṛone; apulune sussandaga iapaati mangitou ipangal᷊iwu manga taumata apan wakku napallosa wuassu tampan taumata apan mabbiakka su al᷊al᷊eo.

¹⁹ Manga huru awusu udde naddiandin apapalossa su manga taumata udde, arawe i mangitou sassane niallangngu manga inanaramanna apan mandal᷊eo taumata. Ana waugu amungkangu taumata tawe naaroappa wawono'a, ne i tou maola'a allangngu alal᷊eo udde.

²⁰ Taumata apan maaillal᷊a Mawu wuṛṛu Punnu Sal᷊amatti ite Yesus Kristus, napallose wuassu taṛṛinon runia apan maal᷊uhuda taumata. Arawe amungkangu sal᷊imurine i tou niasametta apia na'oman sara tawe naaroapa manga taṛṛino udde, ne ola'u taumata udde panginsueanne maddal᷊eoanne lai wuassu paarorone.

²¹ Mappianne manga taumata ereudde tawe saran paassa naasingkata lal᷊annu apapian Duata, wuassu i mangitou masingkata, arawe wua'udde maddiri tumuṛṛutta manga parenta apan nionggolu Ruata si mangitou.

²² Apa apan a'olaanni mangitou napal᷊iatta'u sasanato'a indi, “Asu sarun umanna apia anna apan buatte nimutane,” wuṛṛu “Wawi apan buatte nireno, sarun mabelengnga apia tumal᷊inggi su tona.”