2 PETRUS 1 - WUKE SUSI WATTI'U AL᷊AL᷊USASSA

¹ Manga tuṛṛangnga apan atonna-tonna mangngimanna ere i yami! Yesus Kristus, eteuddde Ruata wuṛṛu Ratun Punnu Sal᷊amatti ite, namalan kite mangngimanna si Tou, ana waugu i Tou pia paa'ola'a apan su ṛinone. Suratta indi wuassi Simon Petrus, sangkatou allangnga wuṛṛu rasullu Mawu Yesus Kristus.

² Doronganna Ruata mangonggolu al᷊amatta wuṛṛu paddarame si yamiu ringannu manambo-nambo, ana waugu i yamiu maaillal᷊a Ruata, wuṛṛu Yesus, Mawun kite.

Bawaggo wuṛṛu pamamile Mawu

³ Ruata suete nappaattu taṛṛino-Ne sassane wuṛṛu nangonggolu al᷊awo'u sarannapa si ite apan ipappaatta su patataṛṛamawuanna. Inolaanni Tou indi wuassu apa apan niasingkatanni ite su ola'u Mawu Yesus Kristus, apan suete namaggo si ite mamendamma awawantu-Ge wuṛṛu apapia-Ne.

⁴ Ringannu olangnge udde Ruata nangonggolu manga al᷊amatta apan wahewalla wuṛṛu maarega si ite apan suete pina'iren Tou. Ringannu manga al᷊amatta udde i yamiu wotongnge mal᷊iu wuassu manga apulu lal᷊eo apan manggohakku runia indi, wuṛṛu i yamiu manengkamma pallal᷊agun Duata.

⁵ Ana waugu udde, pattinsahadde atonna-tonna tadea'u i yamiu sidutu mangngimanna Mawu Yesus Kristus wuṛṛu pangangimannu udde rarundinganannu wiakka apan mapia. Su liuddu wiakka apan mapia i yamiu wotonge maola'a taumata pia asingkata,

⁶ wuṛṛu su liuddu pia asingkatta, i yamiu lai wotongnge maaul᷊inna apulu naungngu. Wuṛṛu su liudde maaul᷊inna apulu naungnga, ṛinone lai yamiu mandiagga ririnu ana see masabbare sumaruanna al᷊awo'u manimmala. Su liuddu masabare sumaruanna al᷊awo'u manimmala, i yamiu lai ṛinone mabbiakka tuttuṛṛuta apulun Duata.

⁷ Wuṛṛu mabbiakka tuttuṛṛutta su apulun Duata ṛinone lai suungannu darangngu su manga tuṛṛangnga apan su pangangimanna sambau. Wua'udde ṛinone lai darangngunu su manga tuṛṛangnga pangangimanna sambau suungannu darangngu su anambon taumata.

⁸ Sarangkanambone eteudde manga pallal᷊agu apan pappandumanni yamiu. Amungkangu manga pallal᷊agu udde pia si yamiu ringannu manambo-nambo, i yamiu mabbal᷊i maṛṛimada wuṛṛu pia buane, wuṛṛu maaillal᷊a Yesus Kristus Mawun kite ringannu lembon mapia lai.

⁹ Arawe taumata apan tawe pallal᷊agu ereudde, ṛingiranne maautta; i tou tawe maasilo wuṛṛu i tou naabul᷊i manungku manga rosane apan nal᷊iu suete niwaresi.

¹⁰ Ana waugu udde, manga tuṛṛangnga, pattinsahade lembon maṛṛimadda tadea'u bawago Duata wuṛṛu pamamile-Ne su ririnu udde maola'a lembon matohassa. Amungkangu i yamiu ma'ola'a udde, i yamiu tawe sumoṛṛotta wuassu pangangimannu.

¹¹ Ringanni aroddi yamiu sarun onggol᷊annu taṛṛino sumutta su Araratuanna apan saran mal᷊annu-l᷊annu wuassu Mawu wuṛṛu Ratun Punnu Sal᷊amatti ite Yesus Kristus.

¹² Ana waugu udde, i ya'u siddutu mapaanaungnga si yamiu su olangnge udde, salaiwe i yamiu masingkatte wuṛṛu mangke mangngimanna al᷊aṛṛa'u Ruata apan suete nisengkammi yamiu udde.

¹³ Tantal᷊anna i ya'u ta'e wiakka, i ya'u mangke mapaanaungngi yamiu su olangnge udde.

¹⁴ Ana waugu i ya'u masingkatta manungku tate mal᷊annu lai ya'u sarun manantangngu runia indi, ana waugu Mawun kite Yesus Kristus suete namasingkatta si ya'u ringannu masemakka.

¹⁵ Ne i ya'u sarun mattinsahada tadea'u napawe i ya'u natete lai, yamiu siddutu mannaungnga apia manga inolaanna indi.

Manga taumata apan naasilo awawantugi Kristus

¹⁶ Su tempo i yami namasingkatta si yamiu aroddi awantuge daranta Mawun kite Yesus Kristus, i yami tawe uatundeetta su manga wa'e iaaṛṛa'u taumata. Awawantugi Kristus udde suete niasiloanni ami ringannu matan kami sassane.

¹⁷ I yami poiaroddi su tempo i Tou niaddatanna wuṛṛu niwantuhannu Ruata Iamangnga. Su tempo udde niaringiṛṛana tingikka wuassu Apan Lembon Mawantuga, nabbisara si Tou, “Ete indi Ana'u arangnguang-Ku. I Tou maal᷊uassa naung-Ku!”

¹⁸ I yami sassane naaringikka tingikka udde nirumanta wuassu surga su tempo i yami su sambau ringanni Tou su wowone apan susi udde.

¹⁹ Ana waugu udde i yami lembon mangngimanna lai tanatan Duata apan ipaasingkatu manga nabi. Mappianne i yamiu mangngimanna tanata udde, ana waugu tanata udde ere sol᷊o apan mannemakka tampa marandumma madatingngu matannallo sumabbanga, wuṛṛu semakku aṛṛusuallo manemakka lal᷊ummu naungngu.

²⁰ Lembonete lai yamiu ṛinone mannaungnga indi: Tanatan Duata apan ipappasingkatu manga nabi tawe wotongnge ital᷊a'a tumuṛṛuttu adapannu sassane.

²¹ Ana waugu, tawe saran paassa tanatan Duata ipappasingkata tumba'u ana waugu apulun taumata. Arawe Ghaṛṛahon Duata uataṛṛino su tamuata apan mammasingkatu tanata Ruata sassane.