2 MARARATU 7 - WUKE SUSI WATTI'U AL᷊AL᷊USASSA

¹ I Elisa sinumimbakka, “Paddaringikka apa apan niwal᷊on Mawu! Tiṛabbi, iraṛangngo tempone ereindi lai, ringannu tumba'u sambau roitta sal᷊a'a wotonge maawalli tatallu su kilone ganduma apianne ara'e annumu kilo ganduma lihidde waine.”

² Mandariaga ratu nabbal᷊issa, “Tawe mariaddi! Udde awusu, salaiwe su orassa indi lai Mawu manossokku uranna wahewalla wuassu langitta!” “I'o sarun maasilo olange udde mariaddi, arawe i'o tawe maal᷊ewa anna udde sarangkadio'a,” sasimbakki Elisa.

Tantaran Siria nassal᷊iu

³ Su allo udde siri appata taumata pia raddange su pisi apan maata'utta ua'ianna su liuddu ngara pasallangannu su Samaria. I mangitou uawawisara sangkatou ringannu sangkatou, “Apa hunane i ite ua'ianna isindi ual᷊aṛaddo mate?

⁴ Amungkangu i ite sumutta su soa, i ite sarun nate amal᷊unusanna; wuṛṛu napawe i ite sidutu uatana'a isindi, i ite sarun mate lai. Mappianne i ite inaite watukku paddasanannu taumatan Siria. Asinungka i ite sarun pateanni mangitou. Arawe asinungka lai i mangitou tawema'ola'a apa-apa si ite.”

⁵ Napawe allo mannattake marandumma i mangitou inaite watukku paddasanannu taumatan Siria, arawe i mangitou tawe naasilo saran sangkatou taumata isudde.

⁶ Ana waugu, Mawu buatte na'ola'a taumatan Siria naaringikka ere tingikku pangalon sambau ammul᷊annu tantara apan bahewalla uasa'e awal᷊o wuṛṛu kereta. Manga taumatan Siria udde massunna manungku ratun Israel buatte nanewa ratun Het wuṛṛu Mesir ana see tantarane mamangalo si mangitou.

⁷ Ana waugu udde, ṛabbi udde lai i mangitou tinumal᷊anga manal᷊amatta watanganne, wuṛṛu nanantangu rasanna, awal᷊o, see lai keledain mangitou niwala aroddi su paddasananna.

⁸ Siri appata apan maradda'a pisi udde na'omate su winggin paddasananna, ana see sinumuttate su sambau rasanna. I mangitou inumanna, na'inumma isudde wuṛṛu nanganu wul᷊awanna, sal᷊a'a see lai manga laubba wua'udde inaite niwuni. Wua'udde i mangitou nabelengke apia wuṛṛu sinumuttate su rasanna waine, ana see na'ola'a inolaanna apan uasul᷊unga.

⁹ I mangitou uahahattote, “Inolaanni indi lal᷊eo. Watti'a indi watti'a apan mapia, wuṛṛu ṛinone iapasingkatti ite! Amungkangu i ite maṛaddo sara tiṛabbi, i ite sarun iṛuumanna. Mappianne i ite mamasingkattu olange indi watukku wal᷊en araratuanna.”

¹⁰ Ana waugu udde i mangitou nabelengke watukku Samaria wuṛṛu niumui su mandariagan soa, “Yami buatte wuassu paddasanannu taumatan Siria, ne inauranna tawe taumata poiaroddi. Awal᷊o wuṛṛu keledai mangitou niaratinganni yami ta'e ua'iitta su tampane, wuṛṛu manga rasanna tinantanga niwala aroddi.”

¹¹ Manga mandariaga niumal᷊iata batti'a udde, na'oman sara taumata namasingkatta watukku wal᷊en aṛṛatuanna.

¹² Tempo udde ta'e marandumma, arawe ratu sinumabbanga wuassu wabbo'a atatiil᷊anne wuṛṛu nabbisara su manga mammamanarane, “Paddaringikka! I ya'u masingkattu hol᷊agu manga taumatan Siria udde! I mangitou masingkatta manungku i ite tantal᷊anna mal᷊unussa, ana waugu udde i mangitou nanantangu paddasananna wuṛṛu inaite na'imbuni su wadda'a, ipangawusu si ite tadea'u i ite sumabbanga maddea'a anna. Wua'udde i mangitou manametta si ite wuṛṛu manga ro soa.”

¹³ Sangkatou mammamanaran datu nabbisara, “Tuanga, i ite apan ta'e sulal᷊ummu soa indi, ere lai i mangitou apan natete. Ana waugu udde mappianne i ite mandolokku siri pira taumata iapasa'e lima awal᷊o wuassu manga awal᷊o apan ta'e poiaroddi, wuṛṛu inaite iapaellega sarangkanambone apan buatte nariaddi.”

¹⁴ Ne i mangitou namilete siri pira taumata udde niapasa'e darua keretan pangalo wuṛṛu inaite nanaṛassida sarangkanambone apan buatte nariaddi su taumatan Siria.

¹⁵ I mangitou na'oman sara Sal᷊ukku Yordan. Su al᷊o'engu lal᷊anna i mangitou maasilo laubba wuṛṛu manga saranapa uasal᷊iawukka. Sarangkanambone udde ṛatangannu taumatan Siria walate awaretane sutempo i mangitou tinumal᷊anga. Manga daroloṛannu ratu udde napul᷊ete wuṛṛu nabbal᷊ote ratu.

¹⁶ Ne tumana'u Samaria tinumal᷊angke watukku liuddu soa wuṛṛu nangaṛṛo paddasanannu taumatan Siria. Ereapa buatte niapasingkatu Mawu, manungku tatallu su kilone ganduma apan apianne ara'e annumma su kilone ganduma lihidde waine aregane tumba'u sambau roitta sal᷊a'a.

¹⁷ Nassuhatta sutempo udde mandariaga ratu mammanara uataṛapa ngaran pasallangannu soa. I tou nate isudde laṛindannu tumana'u soa. Olange udde nariaddi uasul᷊ungu ere buatte niwisaran Elisa su ratu, sutempo ratu nirumanta ringanni tou.

¹⁸ I Elisa buatte namasingkatta manungku iraṛṛangngo su orassa ereindi lai tiṛṛabbine, tatallu su kilone ganduma apan apianne ara'e annumma su kilone ganduma lihidde waine sarun iwal᷊u'a su Samaria ringannu aregane sambau roitta sal᷊a'a.

¹⁹ Wuṛṛu sutempo udde mandariaga ratu buatte nabbisara, “Tawe mariaddi! Udde awusu, salaiwe su orassa indi Mawu manossokku uranna apan bahewalla wuassu langitta!” Ana see sinimbaṛṛanni Elisa, “Paṛṛaddote i'o sarun maasilo olangnge udde mariaddi, arawe i'o tawe maal᷊ewa anna udde sarangkadio'a.”

²⁰ Etearoddi nariaddite su taumata udde – i tou nate laṛṛindannu tumana'u soa su ngara pasallangannu soa!