2 MARARATU 6 - WUKE SUSI WATTI'U AL᷊AL᷊USASSA

Wal᷊iunga apan niasombanganna apia

¹ Su allo sambau manga nabi apan nitantiroanni Elisa, nassal᷊uane si tou. I mangitou nabbisara, “Tampa atatanaanni ite tumaniten maṛiputta!

² Wala'ewe yami manuwanga alu maranin Sal᷊ukku Yordan, wuṛṛu ma'ola'a wal᷊en kite poiaroddi.” “Ore,” sasimbakki Elisa.

³ Sangkatou suwallati mangitou mangke mammata'a tadea'u i Elisa tumantalonga si mangitou. I Elisa nappulu,

⁴ ana see i mangitou inaite suadio'a. Napawe na'omate su winggin Sal᷊ukku Yordan, i mangitou mannattake mannuwanga alu.

⁵ Inaṛombanganne matan bal᷊iunga suwallatu sangkatou wuassi mangitou nanawo sulal᷊ummu ua'e. “Uare, Papa!” aintul᷊ine si Elisa, “Udde wal᷊iunga niwallasanna!”

⁶ “Nanawo suapa?” aiwal᷊on Elisa. Taumata udde namantingiddu tampane, ana see i Elisa nangatibba alu sampoto wuṛṛu niwareta su tampa udde. Ne matan bal᷊iunga udde nilumattote su wowon ua'e.

⁷ I Elisa nabbisara, “Anute!” Taumata udde nangul᷊ukku limane ana see nanganute wal᷊iunga udde.

Tantaran Siria niwaddo

⁸ Su sambau tempo Siria napapangalon Israel. Napawe manga tembonannu tantarane buatte na'ire, ratun Siria nanantunna suapa ṛinone i mangitou maddasanna.

⁹ Arawe i Elisa napaapiddu watti'a su ratun Israel mapanaungngi tou tadea'u arie inai watukku tampa udde, ana waugu manga taumatan Siria inanaramanne u'amatta su lal᷊anna udde.

¹⁰ Nariaddi ratun Israel napanaungnga lai manga taumata maranine isudde tadea'u paatehamma. Etearoddi i Elisa masokka mapanaungngui ratu.

¹¹ Olangnge udde mangke ma'al᷊al᷊eo naungngu ratun Siria, na'oman sara i tou namago manga tembonannu tantarane wuṛṛu naiwal᷊o, “Atonna, suwallati ite indi piaddu mandal᷊eo. Isai taumatane? Otte pasingkata'e!”

¹² Sangkatou wuassu tembonannu tantara udde sinumimbakka, “Tawe saran sangkatou, Tuanga. Ete i Nabi Elisa apan naola'a piaṛangnge! Ete i tou apan namasingkatta su ratun Israel wisaran Tuanga, salaiwe udde niwisara sulal᷊ummu wabbo'a atatiil᷊anna.”

¹³ “Inuddaite ara'e parikise'o suappa i tou, ” parentan datu, “tadea'u i ya'u wotongnge manametta si tou.” Taumata namasingkatta si tou manungku i Elisa poi su Dotan.

¹⁴ Ana see ratun Siria nandolokka inaiaroddi sambau ammul᷊annu tantara apan manambo ana see lai awal᷊o wuṛṛu keretan pangalo. I mangitou na'oma su soa udde sutempo ṛabbite ana see lapiddu namangalo.

¹⁵ Tiṛabbine, marua allo atonna sutempo allangi Elisa napu'o wuṛṛu sinumabbanga, i tou naasilo tantaran Siria uapal᷊iwutta soa udde nasuunga ringannu awal᷊o wuṛṛu keretan pangalon mangitou. Ne i tou nabelengke ringanni Elisa wuṛṛu nabbisara, “Nasilakate i ite, Tua! Apa ṛinone olaanni ite?”

¹⁶ “Arie pa'ata'utta,” sasimbakki Elisa. “Taumata uasamba'a si ite mannamboanne wuassu uasamba'a si mangitou.”

¹⁷ Ana see i Elisa niumal᷊iomante, “Mawu, doronganna I'o mamu'a matan allangku tadea'u i tou maasilo!” Mawu naddaringikka aal᷊iomanni Elisa na'oman sara napawe allange udde nanaile, i tou naasilo su wowone mangke napenen awal᷊o wuṛṛu kereta pia putungnge uapal᷊iwutta si Elisa.

¹⁸ Sutempo manga taumatan Siria udde namangalo, i Elisa inumal᷊iomanna, “Mawu, pawutaawe matan manga taumata indi!” Mawu naddaringikka aal᷊iomanni Elisa, wuṛṛu i mangitou sarangkanambone nawuta matane.

¹⁹ I Elisa nirumanta ringanni mangitou wuṛṛu nabbisara, “I yamiu nilamammiṛanne. Indi wal᷊ine soa apan raddeaanni yamiu. Wette tantalongke si ya'u, mantewe ta'u iuntudda ringannu taumata apan raddeaanni yamiu.” Ana see i Elisa nanguntuddi mangitou su Samaria.

²⁰ Sutempo i mangitou sumuttate su soa udde, i Elisa inumal᷊iomanna, “Mawu, wu'ate matan mangitou tadea'u i mangitou maasilo.” Mawu naddaringikka aal᷊iomanni Elisa; I Tou namu'a matan manga taumata udde na'oman sara i mangitou tinumiangnga naasilo manungku i mangitou uddete su soan Samaria.

²¹ Napawe ratun Israel naasilo manga taumatan Siria udde, i tou naiwal᷊o, “Elisa, ṛinonewe i ya'u mamate manga taumatan Siria indi?”

²² “Arie,” sasimbakki Elisa. “Ewe'e lai tantara apan niasametti Tuanga sulal᷊ummu pangalo udde tawe pateanni Tuanga, nangillembo lai indi. Onggol᷊eten anna wuṛṛu painuma'e i mangitou, ana see wala'e i mangitou mapul᷊e ringannu ratun mangitou.”

²³ Ne ratun Israel na'ola'a andeangnga wahewalla nipanaru si mangitou. Napawe i mangitou buatte niumanna, i tou nandolokki mangitou niapapul᷊e ringannu ratun Siria. Nanattakka orassa udde manga taumatan Siria tate mamangalo wanuan Israel.

Samaria nilliwunanna

²⁴ Manga pira tempo wua'udde i Benhadad ratun Siria nangapiddu anambon tantarane ipamangalo Israel. I mangitou nalliwunna soan Samaria,

²⁵ wuṛṛu ana waugu udde naola'a ṛutumma apan masaddata sulal᷊ummu soa, na'oman sara puan keledai sambau aregane ual᷊un pul᷊o roitta sal᷊a'a, wuṛṛu darua onsa tain merpati aregane liman bau roitta sal᷊a'a.

²⁶ Su paassa sutempo ratu tantal᷊anna u'amatta su wowo tanda'u watu su soa, sangkatou wawine mangngintul᷊i, “Tuanga, ontol᷊e!”

²⁷ Ratu sinumimbakka, “Amungkangu Mawu tawe mangontola si'o, i ya'u tawe mapangontola si'o! I ya'u tawe ganduma ara'e ua'e anggore!

²⁸ Apate naasahadda si'o?” Wawine udde sinumimbakka, “Hawe'u indi buatte nangahe si ya'u tadea'u iambua uminassa ana'u dorone, ana see tiṛabbine uminassa anangnge.

²⁹ Ana waugu udde iambua nallahate ana'u ana see iambua niumante. Tiṛabbine sutempo i ya'u maddoronga tadea'u iambua mallaha anangnge, anangnge niwunin tou!”

³⁰ Naaringikka udde, ratu nanggesa'a laungnge ana waugu nasusa. Manga taumata apan uarisikka maranin darandunga udde naasilo manungku laubbu lal᷊umme niola'a wuassu karongnga.

³¹ Ratu inumui, “Allo indi i Elisa ṛinone mate. Wala'ewe Ruata makkuumangku mawakka-wakkata amungkangu i ya'u tawe maapate si Elisa!”

³² Ana see ratu nandolokku sangkatou niapal᷊iuṛoro wuassi tou watukku wal᷊en Elisa. Tempo udde i Elisa tantal᷊anna su wal᷊en, wuṛṛu manga pira matatimmadu soa tantal᷊anna mattindaho isudde. Tantal᷊anna daroloṛannu ratu udde taambe na'oma, i Elisa nabbisara su matatimmadu soa udde, “Panutukke! Taṛṛa pate udde udde nandolokku taumata iapapate si ya'u. Amungkangu taumata udde na'omate isindi, ṛuura'a ngara, wuṛṛu i tou arie paasutta'a. Panginsueanne ratu sarun dumanta sassane.”

³³ I Elisa taambe nuddussa mabbisara, ratu na'omate isudde wuṛṛu nabbisara, “Asasusa indi niema'u Mawu si ite! Nariaddi, ipa'ura lai ya'u mangantimma i Tou mangontola?”