2 MARARATU 5 - WUKE SUSI WATTI'U AL᷊AL᷊USASSA

I Naaman niapapia

¹ I Naaman eteudde sangkatou tembonannu tantaran ara'e pangliman Siria apan lembon arangnguanna wuṛṛu a'adatannu ratun Siria. Ana waugu ete wuassi Naaman, Mawu buatte nangonggolu auntunganna su tantaran Siria. I Naaman sangkatou tembonannu tantara ara'e panglima apan matohassa, arawe i tou pia radda'a su pisi apan ma'ata'utta.

² Sutempo sambau taumatan Siria namangalo wanuan Israel. Sulal᷊ummu pangalo udde sangkatou ana'a wawinen Israel niasametta, wua'udde niapidda, ana see niola'a allangu awingi Naaman.

³ Su allo sambau allanga udde nabbisarate mawune, “Mama, amungkangu i Tuanga inai maisasomban nabi apan uatana'a su Samaria, nabi udde sarun mapapian tuanga.”

⁴ Sutempo i Naaman naaringikka watti'a udde, i tou inaite ringannu ratu wuṛṛu nabatti'u apa apan niwal᷊on ana'a wawine udde.

⁵ Ratu nabbisara, “Ore roote ringannu ratun Israel. I ya'u sarun mamoṛettu suratta si tou.” Ne i Naaman inaite ringannu uaapiddu 30.000 roitta sal᷊a'a wuṛṛu 6.000 roitta wul᷊awanna, wuṛṛu 10 parassa laubba mangkapia.

⁶ Suratta apan niapidda tingikke arendi: “Wuassu suratta indi ya'u mamasingkattu tembonannu tantara'u, i Naaman, si Tuanga tadea'u i Tuanga mangapia si tou wuassu raddange.”

⁷ Napawe ratun Israel naawasan suratta udde, i tou nanggesa'a launge ana waugu sussinggawanga, lapiddu nabbisara, “Nasilakate, anio ratun Siria udde madoronga i ya'u mangundamma taumata indi? I ya'u wal᷊ine Ruata apan uatahuanna taṛṛino mapawiakka ara'e mamate taumata! Asinungka ratun Siria udde tumba'u maddea'a ngal᷊e si ya'u!”

⁸ I Nabi Elisa naaringikka olange udde, lapiddu nananata su ratun Israel, “Anio sussinggawanga? Doloṛṛa'a taumata udde inawarendi ringangku tadea'u i tou maasingkatta manungku su Israel indi pia sangkatou nabi!”

⁹ Ana waugu udde i Naaman inaite ringannu uasa'e keretan awal᷊o watukku wal᷊en Elisa, wuṛṛu natta'ale su saruannu ngara.

¹⁰ I Elisa nandolokku sangkatou allanga iapawisara arendi si Naaman, “Roote i Tuanga pandeno paapitu su Sal᷊ukku Yordan, ne i Tuanga sarun mapiate atonna.”

¹¹ Naaringikka udde i Naaman nasa'u wuṛṛu nabbisara, “Su ṛingi'uwe i tou sumabbanga sassane maisasomba'u, wuṛṛu umal᷊iomanna su Mawu, Ruatane, lapiddu mangagassa wageangngu wadangku apan maradda'a indi ana see i ya'u mapiate.

¹² Sal᷊ukku Abana wuṛṛu Parpar su Damsyik mappianne marau wuassu al᷊awo'u sal᷊ukka su Israel! I ya'u wotongnge mandeno poiaroddi wuṛṛu wotongnge lai mapia!”

¹³ Arawe manga allange nangundanin Naaman wuṛṛu nabbisara, “i Tuanga, unnu wisara i Tuanga irolokka iapaola'a sambau manara apan masahadda, i Tuanga sarun mammanara. Apa lai indi tumba'u nandolokki Tuanga mandeno tadea'u mapiate radda'a!”

¹⁴ Ana waugu udde i Naaman inaite watukku Sal᷊ukku Yordan, ana see tinumumpa wuṛṛu nallakkummu watanganne sulal᷊ummu sal᷊ukka udde paapitu ere buatte nirolokki Elisa. Ne i Naaman napiate. Waddange tate raddange ere waddangu taumata saṛentumuwo.

¹⁵ Ana see i tou wuṛṛu anambon mallal᷊aṛenggene nabelengke ringanni Elisa. “Orassa indi ya'u masingkatte,” unni Naaman si Elisa, “manungku su ahewallu runia tumba'u pia sambau Ruata, eteudde Ruata apan sassubbannu taumatan Israel. Ana waugu udde, antimanna i Tuanga manengkamma aonggola wuassia'u.”

¹⁶ I Elisa sinumimbakka, “Ringannu arannu Mawu apan biakka, apan a'imbeangku, i ya'u maddiri manengkamma al᷊awo'u aonggola.” I Naaman mangke mammata'a tadea'u i Elisa manengkamma aonggoli tou, arawe i Elisa sidutu mannol᷊a'a.

¹⁷ Ana see i Naaman nabbisara, “Amungkangu i Tuanga mangke maddiri manengkamma aonggola wuassia'u, wala'ewe i ya'u mapul᷊e mangapiddu leta'a apan wotongnge iapiddu ana'u keledai sampare. Ana waugu manattakka orassa indi, ya'u sarun mangonggolu sasamba tumba'u su Mawu, wuṛṛu tawe su mawu waine.

¹⁸ Amungkangu su allo addantane, i ya'u ṛinone mandinganna ratu inai umal᷊iomanna su wal᷊en Rimon mongannu Siria, antimanna Mawu mangampunga si ya'u.”

¹⁹ I Elisa nabbisara, “Apul᷊ete ringannu sal᷊amatta.” Ana see i Naaman napul᷊ete. Tawe nal᷊annu napawe i Naaman napul᷊ete,

²⁰ I Gehazi allangi Elisa, naṛingidda, “Ah, anio i tou niwala napul᷊e ringannu tawe namaekka? Ṛinone i tuangku manengkamma aonggolu taumatan Siria udde! Ringannu arannu Mawu apan biakka, i ya'u ṛinone inai mangenggena si tou tadea'u maasomba aonggola wuassitou!”

²¹ Ana see i Gehazi nangenggente si Naaman. Napawe i Naaman naasilo pia taumata inawarendi, i tou sinumossokka wuassu kereta wuṛṛu naiwal᷊o, “Pia apa?”

²² I Gehazi sinumimbakka, “Ampunge Tuanga, i ya'u nirolokka niapawal᷊o si Tuanga manungku pia ruan katou nabi dario'a apan nirumanta wuassu panenteannu Efraim. I ya'u sumal᷊ande si Tuanga, tadea'u i Tuanga mangonggolu 3.000 roitta sal᷊a'a wuṛṛu ruan parassa laubba mangkapia ionggola su nabi darua udde.”

²³ “Ore wotongnge!” unni Naaman, wuṛṛu i tou lai namata'i Gehazi tadea'u i tou mangapiddu 6.000 roitta sal᷊a'a. I Naaman nami'unna roitta udde sulal᷊ummu pato'a darua, wuṛṛu nanganu ruan parassa laubba mangkapia. Sarangkanambone udde nionggola su ruan katou allange apan nirolokka niumamatta niapaṛoro si Gehazi.

²⁴ Napawe na'omate su wuidda atatanaanni Elisa, i Gehazi nanganu roitta wuṛṛu laubba wuassu manga allangi Naaman, wua'udde sinahipunna sulal᷊ummu wal᷊en. I tou napapul᷊ete manga allanga udde,

²⁵ ana see i tou sinumutta apia sulal᷊ummu wal᷊en. I Elisa naiwal᷊o, “I'o wuassuapa?” “Tawe wuasuapa-apa, Tua!” sasimbakki Gehazi.

²⁶ Arawe i Elisa nabbisara, “Naungku poiaroddi sutempo i Naaman sinumossoka wuassu keretane naisasombanu. Indi wal᷊inewe tempone maddea'a roitta wuṛṛu mamalli waillu zaitun, waillu anggore, domba wuṛṛu sapi see lai manga allanga!

²⁷ Ana waugu i'o nanengkamma aonggola udde, i'o sarun manengkamma lai radda'i Naaman. Ewe'e lai saran mal᷊annu-l᷊annu, papapulunnu lai sarun maasomba radda'a udde!” Napawe i Gehazi sinumabbanga wua isudde, i tou naasombate radda'a su pisi – pisine nabbal᷊i mawira-wira.