2 MARARATU 25 - WUKE SUSI WATTI'U AL᷊AL᷊USASSA

Yerusalem nanawote

¹ Wua'udde i Zedekia namangalote si Nebukadnezar ratun Babel. Ana waugu i Nebukadnezar ringannu anambon tantarane nirumanta wuṛṛu namangalo Yerusalem su allo appul᷊one wul᷊anna appul᷊one sulal᷊ummu tonna assione su tempo i Zedekia uaparenta. I mangitou napararisikku wal᷊en tantara su liuddu soa, napararisikku tanda'a watu pamangaloanna,

² wuṛṛu sidutu uapal᷊iwutta soa naddatingu tonna appul᷊o assane sutempo i Zedekia uaparenta.

³ Su allo assione wul᷊anna aiappane tonna udde lai ṛutumma aroddite ahewalle na'oman sara tumanange tate maasomba anna sarangkadio'a,

⁴ tanda'a watu su soa nihohakku seetta. Ṛabbi udde, salaiwe taumatan Babel tantal᷊anna ual᷊iwunna soa udde, anambon tantaran Yehuda tinumal᷊anga nattudda Wawal᷊annu Yordan. I mangitou nanganu lal᷊anna sumabbi kintallu wal᷊en araratuanna, ana see sinumabbangu ngara passallanganna apan uasampa'u tanda'a watu darua su tampa udde.

⁵ Arawe tantaran Babel nangenggena si Ratu Zedekia, wuṛṛu nisametta su leta'u Yerikho. Anambon tantarane tinumal᷊anga nanantangi tou.

⁶ Wua'udde i Ratu Zedekia niapidda ringanni Ratu Nebukadnezar su soa Ribla, ana see niṛṛuumanna.

⁷ Al᷊aṛṛanange nipate aellehanni Zedekia sassane. Wua'udde matan Zedekia niloetta, ana see nimantunga wuṛṛu niapidda watukku Babel.

Wal᷊en Mawu nihohakka

⁸ Su allo appitune wul᷊anna al᷊imane sulal᷊ummu tonna mapul᷊o sio i Nebukadnezar ratun Babel uaparenta, nirumantate su Yerusalem sangkatou aranne i Nebuzaradan. I tou udde mananantiro wuṛṛu tembonannu tantaran Nebukadnezar.

⁹ I Nebuzaradan nanutunga Wal᷊en Mawu, wal᷊en araratuanna, wuṛṛu wal᷊en anambon taumata atumannaṛṛane su Yerusalem.

¹⁰ Ana see anambon tantarane napaaṛṛa'an manga darandungu soa udde.

¹¹ Wua'udde manga tumanange apan ta'e uatana'a su soa,eteudde ingana'a pande su manara apan lambene, manga taumata asiangnga wuṛṛu manga taumata apan buatte tinumal᷊anga nanamba'a taumatan Babel, sarangkanambone niapiddi Nebuzaradan watukku Babel.

¹² Arawe sambageanganna wuassu tumanange apan tumaniten asiangnga wuṛṛu tawe darotongnge tinantanga su Yehuda wuṛṛu niapamanara waillu anggore wuṛṛu manga wawail᷊anna waine.

¹³ Manga diṛṛi witu'a wuṛṛu manga kereta su Wal᷊en Mawu susambau ringannu wensada witu'a nipesangngu taumatan Babel, ana see anambon witu'a niapidda watukku wanuan mangitou.

¹⁴ I mangitou lai nallurannu manga saranapa indi: manga sasikopo, tampan awu wuassu mezbah, saranapan sasol᷊oanna, manga mangko ipannal᷊uga daṛṛan binatangnga apan ṛatanna olaanna sasamba, manga mangko panutunganna amania, wuṛṛu anambon saranapa witu'a waine apan ipappaata su ipallaghu patataṛṛamawu.

¹⁵ Manga wul᷊awanna wuṛṛu sal᷊a'a, manga mangko maradio'a wuṛṛu manga lama'a pangadoannu waṛṛa, niapiddi Nebuzaradan sassane.

¹⁶ Manga saranapa witu'a apan niola'i Ratu Salomo apan ipappaata su Wal᷊en Mawu, eteudde ruan bua diṛṛi, manga kereta wuṛṛu wensada wahewalla, sarangkanambone aroddi awakkanne na'oman sara tawe niatimbanga.

¹⁷ Darua diṛṛi witu'a udde uasul᷊unga; sambua-sambua atanggake 8 metere ringannu sambau puan diṛṛi wuassu witu'a atanggake 1.3 metere. Uapal᷊iwutta suapan puan diṛṛi udde pia lal᷊ogakke wuan delima nianamma wuassu witu'a.

Taumatan Yehuda niapidda su Babel

^18-19 Waine lai wua'udde, i Nebuzaradan nanametta lai Imam Bahewa i Seraya, Sefanya imam masasumbalane, siri tallu mandariaga ngaran Wal᷊en Mawu, siri lima mananantiro ratu apan ta'e su soa, panglima ara'e tembonannu tantara, tepellu tembonannu tantara apan mammoṛṛettu arannu tantara, wuṛṛu 60 taumata tembonanne waine.

²⁰ Anambon taumata udde niapiddi tou ringanni Ratu Nebukadnezar su soa Ribla,

²¹ su wageangu leta'u Hamat. Poiaroddi i mangitou nisansara wua'udde nipate. Etearoddi manga taumatan Yehuda niṛoota wuassu wanuan mangitou wuṛṛu niapidda watukku leta'a pamamuanganna.

I Gedalya gubernuren Yehuda

²² Wua'udde i Ratu Nebukadnezar namile si Gedalya ana'i Ahikam wuṛṛu pulunni Safan, naola'a gubernure su Yehuda iapaparenta anambon taumata apan ta'e uatana'a poiaroddi.

²³ Napawe manga prajuritta ara'e tembonannu tantara wuṛṛu tantaran Yehuda apan tawe nassuṛubawa su Babel naaringikka su ola'u pamamile udde, i mangitou sarangkanambone nirumanta ringanni Gedalya su Mizpa. Manga tembonannu tantara eteudde Ismael ana'i Netanya, i Yohanan ana'i Kareah, i Seraya ana'i Tanhumet wuassu soa Netofa, wuṛṛu i Yazanya wuassu soa Maakha.

²⁴ I Gedalya nabbisarate si mangitou sarangkanambone, “I yamiu arie pa'ata'utta su manga tembonannu Babel. Atana'e su wanuan kite indi wuṛṛu pattingkaola'e allangu ratun Babel. I ya'u manga'u manungku i yamiu sarun masal᷊amatta.”

²⁵ Arawe su wul᷊anna appitune su tonna udde i Ismael ana'i Netanya wuṛṛu pulunni Elisama apan ta'e lai pallal᷊awannu ratu, inaite suadio'a ringannu siri 10 su atoune watukku Mizpa. I mangitou namangalo wuṛṛu namate si Gedalya suadio'a ringannu taumatan Yehuda, wuṛṛu taumatan Babel apan susampunna ringanni Gedalya isudde.

²⁶ Ne anambon tumana'u Yehuda, mawae ete ala ara'e lai asiangnga, suadio'a ringannu manga perwira ara'e tembonannu tantara tinumal᷊anga watukku Mesir ana waugu matta'utte taumatan Babel.

I Yoyakhin nipallossa wuassu tattupanna

²⁷ Su allo rua pul᷊o pitune wul᷊anna mapul᷊o dua sulal᷊ummu tonna tallun pul᷊o pitu, napawe i Yoyakhin buatte niapidda watukku panamuanganna, i Ewil-Merodakh naola'a ratun Babel. Su tonna udde lai i tou napal᷊iatta'u darangngune si Yoyakhin, wuṛṛu namallosi tou wuassu tattupanna,

²⁸ wuṛṛu na'ola'a si tou ringannu mapia. I Yoyakhin nionggol᷊annu manarane apan mattanggaṛṛane wuassu manga ratu waine apan niramme lai watukku Babel.

^29-30 I Yoyakhin tate lai nalluṛṛen laubbu tattupanna wuṛṛu u'ante su wal᷊en araratuanna wuṛṛu lai nionggol᷊annu roitta ipabbiakke.