2 MARARATU 24 - WUKE SUSI WATTI'U AL᷊AL᷊USASSA

¹ Sutempo i Ratu Yoyakim uaparenta, i Nebukadnezar ratun Babel namangalo wuṛṛu namaddon Yehuda. Tallu tonna al᷊annune Yoyakim uasuṛṛubbawa si Nebukadnezar, arawe wua'udde i tou namangalo.

² Mawu nandolokku manga tantaran walahannu Babel, Siria, Moab wuṛṛu Amon niaparo'appa si Yoyakim wuṛṛu niapaṛṛimunsa'a Yehuda nassul᷊ungu ere buatte nipasingkatu Mawu su manga nabi allang-Nge.

³ Olangnge udde sarun mariaddi, ana waugu Mawu buatte nabbisara manungku walahannu Yehuda sarun iramme wuassu wanua apan nionggolu Mawu si mangitou. I mangitou niramme ana waugu al᷊awo'u rosa apan niola'i Ratu Manasye;

⁴ nangillembo lai ana waugu anambon pamamate apan niolangnge su saruannu manga taumata apan tawe sal᷊ane. Mawu maddiri mangampunga si Manasye ana waugu inolaane udde.

^5-7 Anambon banua, wuassu Sal᷊ukku Efrat maddatingu passarannu Mesir samba'an sawannaka apan nasutta su parenta ratun Mesir, niawaddon ratun Babel. Ana waugu udde ratun Mesir tate sumabbanga lai wuassu wanuane inai mapapangalo. Watti'a waine su ola'i Ratu Yoyakim niwoṛṛetta sulal᷊ummu wuke Watti'u Mararatun Yehuda. Napawe i Yoyakim natete, anangnge aranne i Yoyakhin naola'a ratu nallol᷊ossa si tou.

I Yoyakhin ratun Yehuda

⁸ I Yoyakhin uukke 18 su tonnane, sutempo i tou naola'a ratun Yehuda, wuṛṛu i tou namarenta su Yerusalem tallu wul᷊anna al᷊annune. Inangnge aranne i Nehusta ana'i Elnatan, wuassu Yerusalem.

⁹ Ere lai iamange, i Yoyakhin na'ola'a rosa su Mawu.

¹⁰ Sulal᷊ummu tempo i Yoyakhin uaparenta, tantaran Babel ipappiaṛṛa'u manga tembonannu tantaran Nebukadnezar, inaite namangalo Yerusalem, wuṛṛu nalliwunna soa udde.

¹¹ Tantal᷊anna soa udde tatalliwunanna, i Nebukadnezar sassane nirumanta su Yerusalem,

¹² ana see i Ratu Yoyakhin wuṛṛu inangnge, al᷊aṛṛanangnge, manga tembonannu tantarane, see lai mammamanaran araratuanne nassuṛṛubawate si Nebukadnezar. Ana see i Yoyakhin nisamette. Olange udde nariaddi su tonna aual᷊une sutempo i Nebukadnezar uaparenta.

¹³ Anambon saranapa wul᷊awanna apan niola'i Ratu Salomo su Wal᷊en Mawu, nihohakki Nebukadnezar. Ana see anambon saranapa maarega apan sasahipunanna su Wal᷊en Mawu wuṛṛu wal᷊en araratuanna niapidda watukku Babel. Sarangkanambone nariaddi nassul᷊ungu apa apan buatte niapasingkatu Mawu paarorone.

^14-16 I Ratu Yoyakhin, inangnge, manga awingnge, manga mammamanaran araratuanne, wuṛṛu manga piaṛa'u Yehuda – sarangkanambone 7.000 su atoune atummanaṛṛane – niasametta wuṛṛu niapidda watukku Babel. See lai mapapande manara wuṛṛu manga mananassala anambone 1.000 su atoune, sarangkanambone taumata matatohassa wuṛṛu waṛṛani mapapangalo. Manga taumata pallal᷊awannu ratu, wuṛṛu manga taumata atumannaṛṛane lai niapidda watukku tampa pamamuanganna – sarangkanambone 10.000 su atoune. Maranin nasaggo tumana'u Yerusalem niapidda; natantanga tumba'u ingana'a asiangnga.

¹⁷ Wua'udde i Nebukadnezar, nanenegi Matanya, tuṛṛangu iamangi Yoyakhin, naola'a ratun Yehuda, wuṛṛu namal᷊u aranne nabbal᷊i i Zedekia.

I Zedekia ratun Yehuda

¹⁸ I Zedekia uukke 21 su tonnane sutempo i tou naola'a ratun Yehuda. I tou namarenta su Yerusalem 11 su tonnane al᷊annune. Inangnge aranne i Hamutal, ana'i Yeremia, wuassu soan Libna.

¹⁹ Ere lai i Ratu Yoyakim, i Ratu Zedekia lai na'ola'a rosa su Mawu.

²⁰ Mawu mangke nasa'u atonna su tumana'u Yerusalem wuṛṛu su manga taumatan Yehuda na'oman sara i Tou tate lai mannaunga si mangitou.