2 MARARATU 22 - WUKE SUSI WATTI'U AL᷊AL᷊USASSA

I Yosia ratun Yehuda

¹ I Yosia uukke ual᷊u tonna sutempo i tou naola'a ratun Yehuda, wuṛṛu i tou namarenta su Yerusalem 31 su tonanane al᷊annune. Inang aranne i Yedida ana'i Adaya, wuassu Bozkat.

² I Yosia pallal᷊agune maal᷊uassa naungngu Mawu. I tou nangaṛṛussa pallal᷊agun Ratu Daud al᷊amonane, wuṛṛu mappaamattu titan Duata ringannu ahewallu naungnge.

Wuke manga titan Mawu

^3-4 I Ratu Yosia pia sangkatou mamamoṛṛettu araratuanna aranne i Safan ana'i Azalya, pulunni Mesulam. Su tonna apul᷊o i Ratu Yosia uaparenta, ratu nangonggolu parenta indi su mamamoṛṛettu udde, “Roote ringanni Imam Wahewa i Hilkia su Wal᷊en Mawu, wuṛṛu sal᷊andete si tou tadea'u mamasingkattu anambon doitta apan buatte niammulu manga imam apan mammanara su ngara sasuttanna su Wal᷊en Mawu.

⁵ I tou doloṛṛa'a paonggol᷊a'u roitta su manga mandariaga mammamanara mangangapia Wal᷊en Mawu. I mangitou ṛinone mappaattu roitta ipamaekka lal᷊antakku

⁶ manga basen kalu, basen bal᷊e, basen meselle, wuṛṛu pamallia'a alu see lai watu apan pappandumanna.

⁷ Manga mandariaga manara udde tawe awusune, nariaddi salaiwe tawe madorongnga reengannu roitta wuassi mangitou.”

⁸ I Safan namasingkattu parentan datu si Hilkia, ana see i Hilkia nabbatti'a si Safan manungku i tou buatte naasomba wuke manga titan Mawu su Wal᷊en Mawu. I Hilkia nangonggolu wuke udde si Safan, ne i Safan nabbasate.

⁹ Wua'udde i Safan nabelenga ringannu ratu wuṛṛu namasingkatta manungku roitta apan sasahipunanna su Wal᷊en Mawu nianute wuṛṛu tinantillu manga allangu ratu su manga mandariaga manara mangngapia Wal᷊en Mawu.

¹⁰ Wua'udde i Safan nabbisara, “i Hilkia nangonggolu wuke indi si ya'u.” Ana see i Safan nabbasaten buke udde niapararingikka su ratu.

¹¹ Naaringikka lal᷊oṛṛon buke udde, ratu nanggesa'a launge ana waugu masusa.

¹² Ana see ratu nangonggolu parenta indi si Imam Hilkia, si Ahikam ana'i Safan, si Akhbor ana'i Mikha, si Safan mamamoṛṛettu araratuanna, wuṛṛu si Asaya mandariaga ratu:

¹³ “Roote paiwal᷊o Mawu su ereapa i ya'u wuṛṛu anambon tumana'u Yehuda su ola'u lal᷊oṛṛon buke indi. Mawu nasa'u si ite ana waugu al᷊amonan kite tawe mapaamattu manga parenta apan uawoṛṛetta sulal᷊umme.”

¹⁴ Ne inaite i Hilkia, i Ahikam, i Akhbor, i Safan wuṛṛu i Asaya nadoronga tatantiro su sangkatou wawine aranne i Hulda. I tou sangkatou nabi apan uatana'a su ampunga wakku su Yerusalem. Awingnge aranne i Salum ana'i Tikwa, pulunni Harhas; i tou mallal᷊u'adda laubbu patataṛṛamawu su Wal᷊en Mawu. Napawe i Hulda naaringikka watti'i mangitou,

¹⁵ i tou napawelengi mangitou ringannu ratu wuṛṛu namasingkatu

¹⁶ wisaran Mawu indi: “I Ya'u sarun makkuumannu Yerusalem wuṛṛu anambon tumanange nassul᷊ungu uawoṛṛetta sulal᷊ummu wuke apan wakkute niwasan datu.

¹⁷ I mangitou buatte nanantangku wuṛṛu nangonggolu sasamba su manga mawu waine. Sarangkanambone apan niola'i mangitou naal᷊al᷊eo naung-Ku. I Ya'u nasa'u si Yerusalem, wuṛṛu asasa'u-U tawe al᷊imbatanna.

¹⁸ Arawe su ola'i Ratu Yosia, eteindi tanata-U, Mawu Ruatan Israel, ‘Napawe i'o naaringike sarangkanambone apan uawoṛṛetta sulal᷊ummu wuke udde,

¹⁹ i'o sumassilla wuṛṛu sumallungu watangannu su saruang-Ku. I Ya'u buatte namansaga makkuumannu Yerusalem wuṛṛu tumanange. I Ya'u sarun ma'ola'a soa udde sambau tampa aellehanna wuṛṛu ma'ata'utta, wuṛṛu aranna Yerusalem sarun maola'a aranna awawontoga. Arawe sutempo i'o naaringikka i Ya'u mammansaga udde, i'o nilumuai wuṛṛu nanggesa'a laungu tatialan massusa. I Ya'u buatte naddaringikka aal᷊iomannu,

²⁰ ana waugu udde ṛuumanna su Yerusalem tawe Ta'u iema'a amungkangu i'o ta'e wiakka. I'o sarun mate ringannu paddarame.’ ” Ne manga daroloṛṛanna udde nabelengke ringannu ratu wuṛṛu namasingkattu tanata udde.