2 MARARATU 2 - WUKE SUSI WATTI'U AL᷊AL᷊USASSA

I Elia nasengkenga watukku surga

¹ Nia'omante tempone Mawu manengkengi Elia watukku surga ringannu nappaattu anginna al᷊isusu. Sutempo udde i Elia wuṛṛu i Elisa inumamatte wuassu Gilgal,

² wuṛṛu su tangngan dal᷊anna i Elia nabbisara si Elisa, “Atana'e isindi. Atana'e isindi. I ya'u nirolokku Mawu inai watukku Betel.” Arawe i Elisa sinumimbakka, “Ringannu arannu Mawu apan biakka wuṛṛu ringannu niawan Papa, i ya'u tawe manantangngi Papa.” Nariaddi itarua inaite su sambau nanassukku amatanna naddatingngu Betel.

³ Sangkammul᷊anna nabi apan uatana'a isudde inaite naisasomban Elisa wuṛṛu naiwal᷊o, “Masingkatewe i'o manungku su allo indi i'o sarun itantangu tuangu ana waugu i tou sarun iapaasengkengu Mawu?” “Ore, i ya'u masingkatta,” sasimbakki Elisa. “Arawe uddita'e, ariete i ite maggahatton udde.”

⁴ Wua'udde i Elia nabbisara si Elisa, “Atana'e isindi, ya'u nirolokku Mawu inai watukku Yerikho.” Arawe i Elisa sinumimbakka, “Ringannu arannu Mawu apan biakka wuṛṛu ringannu niawan Papa, i ya'u tawe manantangngi Papa.” Nariaddi itarua nanassukku amatanna watukku Yerikho.

⁵ Sangkammul᷊anna nabi apan uatana'a isudde inaite naisasomban Elisa wuṛṛu naiwal᷊o, “Masingkatawe i'o manungku su allo indi i Tuangngu sarun iapaasengkengu Mawu wuṛṛu manantangngu?” “Ore, i ya'u masingkatta,” sasimbakki Elisa. “Arawe uddita'e, ariete i ite maggahatton udde.”

⁶ Wua'udde i Elia nabbisarate si Elisa, “Atana'e isindi. I ya'u nirolokku Mawu inai watukku Sal᷊ukku Yordan.” Arawe i Elisa sinumimbakka, “Ringannu arannu Mawu apan biakka wuṛṛu ringannu niawan Papa, i ya'u maddiri manantangngi Papa.” Ne itarua nanassukku amatanna naddatingngu Sal᷊ukku Yordan,

⁷ wuṛṛu liman pul᷊o su atoune nabi uatantalongnga sitarua. Ana see i Elia wuṛṛu Elisa natta'ala su wiwikku sal᷊ukka, wuṛṛu siri liman pul᷊o nabi udde uarisikka tawe marau wua isudde.

⁸ I Elia namallossu jubane, ana see nilul᷊unna wuṛṛu niwal᷊atta su ua'en sal᷊ukka udde. Ne ua'en sal᷊ukka udde natahia darua, na'oman sara itaruan Elisa wotongnge naamatta su mamaranne.

⁹ Napawe na'omate su sambaane, i Elia nabbisara si Elisa, “Paddorongke apa ipaapulunu wuassia'u tantal᷊anna i ya'u taambe niapaasengkengu Mawu wuṛṛu manatangngu!” I Elisa sinumimbakka, “Tantil᷊a'e taṛṛinon Papa si ya'u, tadea'u i ya'u wotongnge mallol᷊ossa si Papa.”

¹⁰ “Uare, masahadda atonna udde,” sasimbakki Elia. “Arawe amungkangu i'o maasilo si ya'u sutempo i ya'u iapaasengkengu Mawu, darorongngu udde sarun suunganna. Amungkangu i'o tawe naasilo si ya'u, darorongngu sarun ito'e.”

¹¹ Itarua u'amaatta lapiddu uahahatto. Inaṛombanganne sambau kereta pia putungnge apan wawollengannu awal᷊o pia putungnge nirumanta napaṛṛaen tarua ana see i Elia niapaasengkengu anginna al᷊isusu watukku surga.

¹² I Elisa naasilo si tou, ana see nangintuli, “Elia, Papa'u! Papa'u! Mallal᷊u'addu Israel apan matohassa! Papa napul᷊ete!” Ne i Elia nawul᷊ite wuassu aellegi Elisa. Ringannu massusa i Elisa nanggesa'a jubane natahia darua,

¹³ ana see namurutta juban Elia apan nanawo. Wua'udde i tou nabelengnga wuṛṛu dirumarisikka apia su wiwikku Sal᷊ukku Yordan,

¹⁴ ana see juban Elia udde niwal᷊atta su ua'e lapiddu nabbisara, “Suapate Mawu, Ruatan Elia udde?” Napawe i tou buatte namal᷊attu juba su ua'en sal᷊ukka udde, ua'e udde natahia darua wuṛṛu i tou niumamatte su samba'a.

¹⁵ Siri liman pul᷊o nabi su Yerikho naasilo si tou ana see nabbisara, “Taṛṛinon Elia naal᷊inte si Elisa!” I mangitou nirumanta ringanni Elisa ana see niumal᷊intudda su saruanne

¹⁶ wuṛṛu nabbisara, “Yami indi liman pul᷊o su atoune, sarangkanambone mangkatohassa. Ana waugu udde, wette i ite inai maddea'a si Elia mawunu. Asinungka Ghaṛṛahon Duata buatte nangapiddi tou watukku wowone ara'e wawal᷊anne ana see nanantangngi Elia isudde.” “Lasa'e!” sasimbakki Elisa.

¹⁷ Arawe i mangitou sidutu mammata'a na'oman sara i tou nappulute. Ne siri liman pul᷊o nabi udde inaite naddea'a si Elia al᷊onnune tallu allo, arawe i mangitou tawe naasomba.

¹⁸ Ana see i mangitou nabelengke ringanni Elisa apan tantal᷊anna ual᷊aṛaddo su Yerikho. “Wal᷊inewe i ya'u buatte nabbisara manungku i yamiu lasa'e padea'a?” unni Elisa si mangitou.

Manga al᷊aṛindu'a apan niola'i Elisa

¹⁹ Manga piran katou wuassu Yerikho nirumanta ringanni Elisa wuṛṛu nabbisara, “Papa, ere lai aellehanni Papa sassane, soa indi mapia, arawe ua'ene lal᷊eo wuṛṛu ana see wawine pia illoṛṛone aanawoanna.”

²⁰ “Anue'o mangko apan ta'e wakku,” unni Elisa, “wuṛṛu lo'aiten asimma sulal᷊umme.” Ne i mangitou nangapiddu apa raddoronganne udde si tou.

²¹ Ana see i Elisa inaite watukku al᷊imatan kua'e wua'udde nanuntungu asimma sulal᷊ummu ua'e wuṛṛu nabbisara, “Eteindi apan niapasingkattu Mawu: ‘Ta'u iapaatilangnga ua'e indi tadea'u tate lai maapate wuṛṛu maanawo wawine apan pia illoṛo!’ ”

²² Nanattakka orassa udde ua'e natilangke ere su wisaran Elisa.

²³ Wua'udde i Elisa inaite wuassu Yerikho watukku Betel. Su pattangngannu lal᷊anna pia ammul᷊annu al᷊aṛṛana'a sinumabbanga wuassu soa wuṛṛu mangangal᷊uandaga si tou. “Ei, lol᷊okka, lol᷊okka pangingkatta wua isindi!” aintul᷊in mangitou.

²⁴ I Elisa nanaile wuṛṛu nanutudda si mangitou ana see nantal᷊an mangitou ringannu arannu Mawu. Orassa udde lai darua beruanga wawine sinumabbanga wuassu mahurange wuṛṛu namaṛṛu wadangu appatu pul᷊o dua su atoune al᷊aṛṛana'a wuassu wallattu manga al᷊aṛṛana'a udde.

²⁵ I Elisa nanassukke amatanne watukku Wowon Karmel, wua'udde nabelengke watukku Samaria.