2 MARARATU 19 - WUKE SUSI WATTI'U AL᷊AL᷊USASSA

Ratu naddorongnga tatantiro wuassi Nabi Yesaya

¹ Sutempo i Ratu Hizkia naaringikka aalae wuassu siri tallu udde, i tou nanggesa'a launge wuṛṛu nalluṛṛen nasa karonga tatialan massusa, ana see i tou inaite watukku Wal᷊en Mawu.

² Wua'udde i tou nandolokki Elyakim, tembonannu wal᷊en araratuanna, i Sebna mamamoṛṛettu wanua, wuṛṛu manga imam apan timmadete, iapasasomban Yesaya ana'i Amos. I mangitou nalluṛṛen nasa karonga.

³ Eteindi tanatan Hizkia apan niapasingkati mangitou si Yesaya, “Allo indi allo lullal᷊o; i ite niṛṛuumanna wuṛṛu nilobbosa. I ite naal᷊ihidda wawine apan mangunsiwete arawe niasueannu ikkata.

⁴ Ratun Asyur buatte nandolokku sangkatou tembonannu tantara atanggaṛṛanne niapal᷊obbosa Ruata apan biakka. Isai masingkata Mawu Ruatanu naaringikke lal᷊obbosa udde, wuṛṛu sarun makkuumanni mangitou apan nabbisara! Ana waugu udde a'al᷊iomante su Ruata hunan manga taumatan kite apan ta'e wiakka.”

⁵ Napawe naasengkamma tanata wuassi Ratu Hizkia udde,

⁶ i Yesaya nandolokku manga daroloṛṛanna udde niapawal᷊on sasimbakke indi, “Mawu nabbisara, i Tuanga arie paata'utta maaringikka wisaran manga allangi ratun Asyur udde manungku Mawu tawe mamallossi tou.

⁷ Mawu sarun ma'ola'a ratun Asyur mangimanna watti'u manu'u salleanna ma'oman sara i tou mabelenga watukku wanuane sassane, wuṛṛu poiaroddi i tou sarun pateanna.”

Taumatan Asyur nangirimmu wawansaga waine

⁸ Perwiran Asyur naaringikka watti'a manungku ratune nanantangken Lakhis wuṛṛu tantal᷊anna uapapangalo mando'appa soan Libna, tawe marau wua isudde. Ne perwira tantara udde inaite naisasomban ratune udde.

⁹ Ratun Asyur naaringikke watti'a manungku tantaran Mesir su al᷊ungu piaṛa'i Tirhaka ratun Sudan inawarendite mamangalo si mangitou. Ana waugu udde ratun Asyur nangirimmu suratta si Hizkia ratun Yehuda.

¹⁰ Arendi tingikku suratta udde, “Arie aawusuannu pa'airen Ruatanu apan ipammunganu udde manungku i'o tawe manawo sulal᷊ummu lima'u.

¹¹ I'o naaringikke manungku suapan banua apan nipangaloannu manga ratun Asyur, mangke naṛṛimunsa'a. Arie pappahi i'o wotongnge maal᷊assanga!

¹² Sutempo al᷊amona'u nakkimunsa'a soan Gozan, Haran, wuṛṛu Rezef, lapiddu namate taumatan Eden apan uatana'a su Telasar, tawe saran sangkatou wuassu manga monganni mangitou naasal᷊amatta si mangitou.

¹³ Suapate manga ratun soan Hamat, Arpad, Sefarwaim, Hena, wuṛṛu Iwa?”

¹⁴ I Hizkia nanengkamma suratta udde wuassu manga daroloṛṛanna, ana see i tou nabbasate. Wua'udde i tou inaite su Wal᷊en Mawu, wuṛṛu namilattu suratta udde su saruannu Mawu,

¹⁵ ana see inumal᷊iomanna, wisarane, “Mawu, Ruatan Israel, apan ua'ianna su wowon mala'ekatta, tumba'u I'o sambau Ruata apan uataṛṛino al᷊awo'u araratuanna su wowon dunia. Tumba'u I'o apan nandiadi langitta wuṛṛu runia.

¹⁶ Mawu, doronganna ellehewe sarangkanambone apan tantal᷊anna nariaddi si yami. Daringiṛṛewe anambon lal᷊obbosi Sanherib Si'o, Ruata apan biakka!

¹⁷ Yami sarangkanambone masingkata, Mawu, manungku manga ratun Asyur buatte namate manambo walahanna wuṛṛu nakkimunsa'a manga wanuan mangitou.

¹⁸ Manga monganni mangitou lai tinutunga wuṛṛu nikkimunsa'a, ana waugu manga monganna udde tawe taṛṛinone sarangkadio'a. I mangitou tumba'u paal᷊uanna wuassu alu wuṛṛu watu niola'u taumata.

¹⁹ Ore Mawu, Ruatan kami, pallosaawe yami wuassu manga taumatan Asyur udde, tadea'u al᷊awo'u walahanna su runia masingkata manungku tumba'u I'o Ruata.”

Tanatan Yesaya su ratu

²⁰ Wua'udde i Yesaya nangirimmu tanata si Ratu Hizkia maola'a sasimbakku aal᷊iomannu ratu,

²¹ Mawu nabbisara, “Soan Yerusalem lullage wuṛṛu mangngal᷊uandaga si'o, Sanherib.

²² Masingkate i'o manungku isai apan lallelanna wuṛṛu lallobbosannu udde? I Ya'u, Ruatan Israel, Ruata apan susi! I'o tumaniten mawunga su saruang-Ku.

²³ I'o nandolokku daroloṛṛanna iapaawusu manungku ringannu anambon keretan pangalonu, i'o buatte naasa'a manga wowone atanggaṛṛanne su Libanon. I'o mammunga manungku i'o nanuwangnga manga alu cemara apan atanggaṛṛanne wuṛṛu aṛṛamahanne wuṛṛu namal᷊appidu manga mahurangnge ma'appala.

²⁴ I'o lai namarabunga manungku i'o na'al᷊i paṛṛihi wuṛṛu na'inumma su manga wanua waine, wuṛṛu manungku manga tantaranu nakkinda Sal᷊ukku Nil na'oman sara namara.

²⁵ Apa i'o taambe naaringikka manungku sarangkanambone udde buatte Ta'u nihol᷊aga ro'en paarorone? Wuṛṛu orassa indi Ya'u buatte na'ola'a. Ete i Ya'u apan nagonggolu taṛṛino si'o ipakkimunsa'a manga soa pia tatandange watu ete nallambe manga tuidde.

²⁶ Manga taumata apan uatana'a poiaroddi tawe naal᷊ore; i mangitou niṛumindu'a wuṛṛu nata'utta. I mangitou naal᷊ihidda nannal᷊o apan tinumuwo su atuppu wal᷊en, mamara amungkangu tiupannu anginna ra'i apan mal᷊oso.

²⁷ Arawe i Ya'u masingkattu al᷊awo'u lal᷊ummu naungngu. I Ya'u masingkattu inolaannu wuṛṛu watukku apa i'o umamatta.

²⁸ I Ya'u masingkatta manungku i'o mangke nasa'u si Ya'u, wuṛṛu i Ya'u naaringikke warabunganu udde. Orassa indi Ta'u iwa'issa aiitta su ngirunnu wuṛṛu ipappiaṛṛa'a su moṛṛongu, tadea'u i'o wol᷊enganna mapul᷊e umamatta sulal᷊anna sutempo i'o nirumanta.”

²⁹ I Yesaya nangirimmu tanata indi lai si Hizkia, “Eteindi apan maola'a tatiala si'o. Tonna indi wuṛṛu tonna su hati taumata sarun umanna ganduma apan tinumuwo sassane. Arawe napawe wua'udde i mangitou wotongngete massuannu ganduma wuṛṛu anggore lapiddu maatemma wuane.

³⁰ Taumatan Yehuda apan ta'e mabbiakka su al᷊al᷊uassa ere sinuananna apan malal᷊umma ṛamunne wuṛṛu napasabbangu wuane.

³¹ Su Yerusalem wuṛṛu su puiddu Wowon Sion sarun pia taumata apan masal᷊amatta, ana waugu Mawu buatte nanantunna manungku olange udde sarun mariaddi.

³² Ete indi niapasingkattu Mawu su ola'u ratun Asyur: ‘I tou sarun tawe maasutta su Yerusalem ara'e maapiti'u anaanna watukku soa udde. Manga tantara apan pia allungnge tawe maapangundani soa udde, wuṛṛu uapal᷊iwutta soa udde tawe iapararisikka tanda'a watu pamangaloanna.

³³ Ratun Asyur sarun mapul᷊e sumabbi lal᷊anna apan niamatanne sutempo i tou nirumanta, ringannu tawe sinumutta su soa udde. I Ya'u, Mawu, buatte nabbisara.

³⁴ Soan Yerusalem sarun Ta'u lu'aranna wuṛṛu riaganna ana waugu arang-Ku sassane wuṛṛu ana waugu pa'aire-U ringannu allang-Ku i Daud.’ ”

³⁵ Ṛabbi udde lai Mala'ekattu Mawu nirumanta su paddasanannu taumatan Asyur, wuṛṛu namate 185.000 su atoune tantara. Tiṛabbine marua allo maṛṛanggapa winal᷊unanni mangitou pasi tal᷊eṛongke.

³⁶ Ne i Sanherib ratun Asyur sinumoṛṛote wuṛṛu napul᷊ete watukku Ninewe.

³⁷ Su allo sambau, sutempo i tou tantal᷊anna mattaṛṛamawu sulal᷊ummu wal᷊en Monganna Nisrokh, i tou nipaten hal᷊elen Adramelekh wuṛṛu Sarezer, manga umbasanne. Wua'udde i mangitou tinumal᷊angke watukku wanua Ararat. Ne i Esarhadon, parinsine waine naola'a ratu nallol᷊ossa si tou.