2 MARARATU 16 - WUKE SUSI WATTI'U AL᷊AL᷊USASSA

I Ahas ratun Yehuda

¹ Su tonna pitun pul᷊o sutempo i Ratu Pekah ana'i Remalya uaparenta su Israel, i Ahas ana'i Yotam naola'a ratun Yehuda.

² Sutempo udde uukki tou 20 su tonnane wuṛṛu i tou namarenta su Yerusalem 16 su tonnane al᷊annune. I tou tawe nangaṛṛussa pallal᷊agu apan mapia wuassi Ratu Daud, al᷊amonane, ewe'e inolaane tawe maal᷊uassa naungngu Mawu, Ruatane.

³ I tou mabiakka ere manga ratun Israel, manungku mangonggolu parinsine sassane maola'a sasamba su monganna, tumuṛṛuttu anaramanna lal᷊eo wuassu manga taumata apan bautte nilimbuaṛṛannu Mawu wuassu wanua Kanaan sutempo taumatan Israel namanuate su wanua udde.

⁴ I Ahas nangonggolu sassamba wuṛṛu nanambunnu amania su manga tampa pasasubbanna monganna su manga wowone su al᷊ungu manga aaluanna apan masindumunna rongngane.

^5-6 Sutempo udde ratun Edom nangagasse apia soan Elat wuṛṛu nallimbuakka manga taumatan Yehuda apan uatana'a isudde. Taumatan Edom wua'udde nirumanta wuṛṛu namanua su soa udde na'oman sara allo indi. Sutempo udde lai i Rezin ratun Siria wuṛṛu i Pekah ratun Israel namangalo wuṛṛu nalliwunna Yerusalem, arawe tawe naawaddon Ahas.

⁷ I Ahas nandolokku daroloṛṛanna inai ringanni Tiglat-Pileser ratun Asyur ringannu tanata indi, “I ya'u allangu apan matuṛṛutta; ana waugu udde, i ya'u sumal᷊ande, rantate wuṛṛu ontol᷊ete i ya'u wuassu ratun Siria wuṛṛu ratun Israel apan tantal᷊anna mammangalo si ya'u.”

⁸ I Ahas nanganu lai wul᷊awanna wuṛṛu sal᷊a'a wuassu Wal᷊en Mawu, see lai saranapan su wal᷊en araratuanna, wua'udde niirimma maola'a aonggola si ratun Asyur udde.

⁹ I Ratu Tiglat-Pileser naddaringikka sasal᷊anden Ahas, ana see namangalo wuṛṛu nangaṛṛo Damsyik. Tumanange apan niawawi niapidde watukku Kir, wuṛṛu ratune, eteudde i Ratu Rezin, apan nipatene.

¹⁰ Sutempo i Ratu Ahas ianite watukku Damsyik naisasomban Ratu Tiglat-Pileser, i tou naasilo mezbah su soa udde. Ana see i tou nangirimma si Ratu Uria su Yerusalem ola'u mezbah udde, wuṛṛu ringannu uuṛanne apan naṛṛino wuṛṛu natal᷊a'a.

¹¹ Ne i Uria napararisikku sambau mezbah uasul᷊ungu hambaranna wuṛṛu uuṛṛanne apan nisengkammi tou udde, wuṛṛu niinsue tantal᷊anna i Ahas taambe nawelenga.

¹² Napawe na'omate wuassu Damsyik, i Ahas naasilo manungku mezbah udde buatte niola'a.

¹³ Ana see su wowon mezbah udde i tou nangonggolu sasamba winatanga see lai sasamba ganduma. I tou lai nallal᷊innu sasamba anggore wuṛṛu daṛṛa wuassu sasamban paddarame su wowon mezbah udde.

¹⁴ I Ahas naasilo manungku mezbah witu'a apan niṛṛae su Mawu udde addone suwallatu Wal᷊en Mawu wuṛṛu mezbane apan wakku. Ana waugu udde mezbah witu'a udde niingkatta wuassu saruannu Wal᷊en Mawu su samba'a sawannakku mezbane apan wakku udde.

¹⁵ Wua'udde i tou nabbisara si Uria, “Paata'e mezba'u apan wahewalla indi panambunannu sasamba marua allo wuṛṛu sasamba ṛabbi apan ionggolu ratu wuṛṛu tumanange, ana see lal᷊ina'e isudde sasamba anggore wuassu tumanange. Lal᷊ina'e lai su wowon mezbah udde daṛṛan anambon binatangnga apan niongola. Wuṛṛu mezbah witu'a apan tabbe udde walate i ya'u mappaatta ipadorongnga tatantiro wuassu manga ghaṛṛaho.”

¹⁶ I Uria napaamattu parentan datu.

¹⁷ Wua'udde i Ahas nanggohakku manga kereta witu'a apan nipaatta su Wal᷊en Mawu, wuṛṛu nallasso'a manga wensada wuassu manga kereta udde. Wensada witu'a wahewalla apan uarandanga su liuddu mapul᷊o dua sapi witu'a, udde nianun tou wuṛṛu niandanga su wowon apampakke watu.

¹⁸ Ana see tadea'u ipanganu naungngu ratun Asyur, i Ahas nanggohakku pa'ammulannu ratu su Wal᷊en Mawu, wuṛṛu nakkuudu ngara sasuttannu ratu.

¹⁹ Watti'a waine su ola'i Ratu Ahas niwoṛetta sulal᷊ummu wuke Watti'u Mararatun Yehuda.

²⁰ I Ahas natete wuṛṛu nilabbinga su labbingu mararatu su soan Daud. I Hizkia anangnge naola'a ratu nallol᷊ossa si tou.