2 MARARATU 14 - WUKE SUSI WATTI'U AL᷊AL᷊USASSA

I Amazia ratun Yehuda

¹ Su tonna aruane i Yoas ana'i Yoahas uaparenta Israel, i Amazia ana'i Yoas naola'a ratun Yehuda.

² Sutempo udde uukke ruan pul᷊o l᷊ima su tonnane, wuṛṛu i tou uaparenta su Yerusalem ruan pul᷊o sio su tonnane al᷊annune. Inangnge Yoadan wuassu Yerusalem.

³ I Amazia pallal᷊agune ma'al᷊uassa naungngu Mawu, arawe i tou ere i Daud, al᷊amonane. Nangaṛṛussa iamange,

⁴ i tou lai tawe nanggohakku manga manga tampa pasasubbanna monganna, na'oman sara tumanange sidutu mangngonggolu sasamba wuṛṛu mannutunga amania poiaroddi.

⁵ Tawe nal᷊annu, napawe matohasse araratuanne, i Amazia namate manga mammamanaran araratuanna apan namate iamange.

⁶ Arawe al᷊aṛṛana'u manga mammamanaran araratuanne udde tawe nipate, ana waugu i tou uaringikka parentan Mawu sulal᷊ummu Wuke Musa tingikke arendi, “Imbaṛṛangnga mamate hagurange ana waugu al᷊al᷊eo apan niola'u anangnge, wuṛṛu imbaṛṛangnga mamate al᷊aṛṛana'a ana waugu al᷊al᷊eo apan niola'u hagurangngi mangitou. Suapan taumata tumba'u wotonge pateanna ana waugu al᷊al᷊eo apan niolange sassane.”

⁷ Sulal᷊ummu sambau pangalo, Amazia namate 10.000 su atoune tantaran Edom su Wawal᷊annu Asin, wuṛṛu nangaṛṛo Soa Sela. Soa udde nisagon tou Yokteel. Na'oman sara orassa indi soa udde aranne ta'e Yokteel.

⁸ Wua'udde i Amazia nandolokku daroloṛṛanna inai ringanni Yoas ratun Israel iapawal᷊o tanne maapulu mando'appa si tou mapapangalo.

⁹ Arawe i Ratu Yoas nangirimmu sasimbakke indi, “Susambau tempo nannal᷊o ṛoaanna wuassu Panenteannu Libanon nangirimmu watti'a indi su alu cemara, “Ei alu cemara, onggol᷊a'e anangngu maṛṛuala su ana'u tadea'u maola'a awinge.” Arawe wua'udde sinumabbite isudde sambau winatangu ahuranganna wuṛṛu nakkinda nannal᷊o ṛoaanna udde.

¹⁰ I'o, Amazia, nabbal᷊ite mawunga, ana waugu i'o buatte namaddon taumatan Edom. Ne wal᷊inewe auntunganna udde wotongngete? Mappianne i'o paatana'e su wal᷊en! Ipa'ura maddea'a hatto tumba'u manilaka watangannu wuṛṛu tumana'u soanu?”

¹¹ Arawe i Amazia ratun Yehuda tawe naddaringikka manga wisaran Yoas ratun Israel. Ana waugu udde Ratu Yoas ringannu tantarane inaite watukku Bet-Semes su Yehuda wuṛṛu napapangaloten Amazia poiaroddi.

¹² Tantaran Yehuda narugite wuṛṛu anambon tantarane tinumal᷊angke napul᷊e watukku wal᷊en sambau-sambau.

¹³ I Yoas nanametta si Amazia, ana see inaite watukku Yerusalem wuṛṛu nanggohakku darandungu soa udde al᷊o'engnge iraṛṛangngo rua ṛasutta su meterene, manattakka wuassu Ngaran Efraim naddatingu Ngara Pasallanganna Wuune.

¹⁴ Anambon bul᷊awanna wuṛṛu sal᷊a'a see lai anambon saranapa apan niasombanganna su Wal᷊en Mawu, wuṛṛu lai anambon saranapan wal᷊en araratuanna, suadio'a ringannu manga pira taumata niasametta, niapiddi Yoas watukku Samaria.

¹⁵ Watti'a waine su ola'i Ratu Yoas, nasutta lai awawaṛanine nando'appa si Amazia ratun Yehuda nawoṛṛette sulal᷊ummu wuke Watti'u mararatun Israel.

¹⁶ I Yoas natete wuṛṛu nilabbinga su labbingu manga ratu su Samaria. Yerobeam II anangnge naola'a ratu nallol᷊ossa si tou.

Papaten Amazia ratun Yehuda

¹⁷ Napawe i Yoas ratun Israel natete, i Amazia ratun Yehuda, ta'e nabiakka 15 su tonnane lai.

^18-21 Su Yerusalem pia ammul᷊anna apan ma'apulu mamate si Amazia. Ana waugu udde i tou tinumal᷊anga watukku Lakhis, arawe manga seenne nangenggena si tou poiaroddi wuṛṛu namate si tou. Winal᷊unanne niluranna su awal᷊o watukku Yerusalem, ana see nilabbinga su labbingu mararatu su Soan Daud. Ne tumana'u Yehuda nanenegi Uzia, ana'i Amazia, naola'a ratun mangitou. Sutempo udde uukki Uzia wakkute 16 su tonnane. Watti'a waine su ola'i Ratu Amazia niwoṛṛetta sulal᷊ummu wuke Watti'u mararatun Yehuda.

²² Napawe iamange natete, i Uzia nangaṛṛo apia soa Elat wuṛṛu niapararisikki tou apia.

I Yerobeam II ratun Israel

²³ Su tonna mapul᷊o l᷊ima i Amazia ana'i Yoas uaparenta su Yehuda, i Yerobeam II ana'i Yoas naola'a ratun Israel, wuṛṛu namarenta su Samaria 41 su tonnane al᷊annune.

²⁴ I tou na'ola'a rosa su lantakku hatin Mawu, ana waugu nangaṛṛussa al᷊al᷊eon Ratu Yerobeam I apan naaola'a taumatan Israel narosa.

²⁵ Ete i Yerobeam II indi apan nangaṛṛo apia anambon wageangu leta'u Israel, wuassu lal᷊anna watukku Hamat su sawannakka naddatingngu Tahal᷊oanga Nate su timukka. Udde ere buatte pina'iren Mawu, Ruatan Israel, su allang-Nge, Nabi Yunus ana'i Amitai taumatan Gat-Hefer.

²⁶ Mawu naasilo aroddi asahadde taumatan Israel, taweddu sangkatou apan maatul᷊ungi mangitou.

²⁷ Mawu tawe tudda makkimunsa'a Israel sarangkal᷊o'enge, ana waugu i Tou nantul᷊ungi mangitou sulal᷊ummi Ratu Yerobeam II.

²⁸ Watti'a waine su ola'i Ratu Yerobeam II, su ola'u awawaṛṛanine sulal᷊ummu manga pangalo wuṛṛu ereapa i tou nangaṛṛo apia Damsyik wuṛṛu Hamat wuassu Yehuda hunan Israel, sarangkanambone niwoṛṛetta sulal᷊ummu wuken Watti'u mararatun Israel.

²⁹ Yerobeam II natete wuṛṛu nilabbinga su labbingu mararatu. I Zakharia anangnge naola'e ratu nallol᷊ossa si tou.