2 MARARATU 13 - WUKE SUSI WATTI'U AL᷊AL᷊USASSA

I Yoahas ratun Israel

¹ Su tonna aruam pul᷊o tallune su pamarentan Yoas ana'i Ahazia Yehuda, Yoahas ana'i Yehu naola'a ratun Israel, wuṛṛu i tou uaparenta su Samaria mapul᷊o pitu su tonnane al᷊annune.

² Ere lai i Ratu Yerobeam apan uaparenta dorone wuassitou, Yoahas na'ola'a rosa lai su Mawu wuṛṛu naaola'a taumatan Israel narosa lai. I tou tawe nanantangu manga inolaanne apan dal᷊eo.

³ Ana waugu udde Mawu nasa'u su Israel, na'oman sara i Tou namalan Hazael ratun Siria wuṛṛu i Benhadad anangnge, masokka-sokka namaddon Israel.

⁴ Ana see i Yoahas niumal᷊iomanna su Mawu, ne Mawu naddaringikka aal᷊iomanne udde, ana waugu Mawu na'ellega aroddi al᷊aṛṛage ratun Siria mammarenta taumatan Israel.

⁵ Mawu nangonggola su taumatan Israel sangkatou piaṛṛange apan mamallossi mangitou wuassu taṛinon Siria na'oman sara i mangitou mabbiakka matammudda ere lai dorone.

⁶ Salaiwe aroddi taumatan Israel sidutu ma'ola'a rosa apan tinattakka wuassi Ratu Yerobeam. I mangitou sidutu ma'ola'a rosa udde, wuṛṛu namalan paal᷊uannu monganni Dewi Asyera sidutu sasahipunanni mangitou su Samaria.

⁷ Wuntuannu pangalon Israel buatte niṛṛamunsa'u ratun Siria na'oman sara i Ratu Yoahas tumba'u pia 50 tantaran awal᷊o, 10 keretan pangalo, wuṛṛu 10.000 su atoune tantara.

⁸ Watti'a waine su ola'i Ratu Yoahas wuṛṛu anambon sahaddu awawaṛṛanine niwoṛṛotta sulal᷊ummu wuke Watti'u mararatun Israel.

⁹ I tou nate wuṛṛu nilabbinga su Samaria. I Yoas anangnge naola'a ratu nallol᷊ossa si tou.

I Yoas ratun Israel

¹⁰ Su tonna atallum pul᷊o pitune i Ratu Yoas uaparenta su Yehuda, i Yoas ana'i Yoahas naola'a ratu su Israel wuṛṛu namarenta su Samaria 16 su tonnane al᷊annune.

¹¹ I tou lai na'ola'a rosa su Mawu ana waugu nangaṛṛussa al᷊al᷊eon Datu Yerobeam apan naaola'a taumatan Israel narosa.

¹² Watti'a waine su ola'i Ratu Yoas, nasutta lai awawaṛṛanine sulal᷊ummu pangalo nando'appa si Amazia ratun Yehuda, niwoṛetta sulal᷊ummu wukem Watti'u mararatun Israel.

¹³ I Yoas nate wuṛṛu nilabbinga su labbingu mararatu su Samaria. Yerobeam II anangnge, naola'a ratu nallol᷊ossa si tou.

Papaten Elisa

¹⁴ Sutempo sambau i Nabi Elisa maradda'a mawakkata, wuṛṛu i Ratu Yoas nirumanta mattembo si tou. Napawe i tou naasilo si Elisa maraniten mate, ratu udde nilumuai wuṛṛu nabbisara, “Papa'u, Papa'u, mananahekku Israel apan bahewalla!”

¹⁵ “Anute papiti'a wuṛṛu anaanne!” parentan Elisa si tou. I Yoas nanganute,

¹⁶ ana see i Elisa nandolokki tou niapariahi papiti'a. Ratu nandiahite, wuṛṛu i Elisa nangadon limane su wowon liman datu.

¹⁷ Ana see wuassu parentan nabi udde, ratu namu'a sungketa ara'e sungketa apan uasaruanna watukku Siria. “Pallosa'e anaannu!” parentan Elisa. Tawe nal᷊annu napawe ratu namallossu anaanna udde, nabi niumui, “Ete i'o anaannu Mawu. Ringannu anaanna udde Mawu sarun mamaddon Siria. I'o sarun mapapangalo mando'appa taumatan Siria su Afek ma'oman sara i'o maawaddon mangitou.”

¹⁸ I Elisa nandolokki Ratu Yoas nanganu manga anaanne waine wuṛṛu nipappa'a su leta'a. Ratu namappa'a paatallu, ana see naddote.

¹⁹ I Elisa nasa'u wuṛṛu nabbisara, “Ṛinone i'o mamappa'a ma'oman sara paal᷊ima ara'e paiannuma, ne i'o wotongnge mapakkimunsa'a walahannu Siria. Arawe orassa indi tumba'u paatallu i'o mamaddon mangitou.”

²⁰ Tawe nal᷊annu wua'udde i Elisa natete ana see nilabbinga. Sutempo udde manga gorombolanna ara'e ammul᷊annu tantara lal᷊eo wuassu Moab inanaramanne mammangalo wanuan Israel santonna paassa.

²¹ Su allo sambau napawe sira pira taumata tantal᷊anna malabbingu taumata nate, inaṛṛombanganne i mangitou naasilo ammul᷊annu tantaran Moab nirumanta. I mangitou lapiddu namareta manga winal᷊unanna udde sulal᷊ummu labbingi Elisa ana see tinumal᷊angnga. Aroddi asuangnga udde naṛe'etta su duṛṛin Elisa, asuangnga udde nabiakka apia ana see dirumarisikka.

Pangalon Israel wuṛṛu Siria

²² Su al᷊o'engu tempo i Yoas uaparenta, i Hazael ratun Siria mangngallanga taumatan Israel.

²³ Arawe Mawu marangnge walahan-Ne wuṛṛu nangampunga si mangitou. I Tou maddiri mamalan mangitou pateanna, arawe nangontolla si mangitou, ana waugu pa'aire-Ne si Abraham, si Ishak wuṛṛu si Yakub. Na'oman sara orassa indi i Tou tawe maabul᷊in walahan-Ne.

²⁴ Wua'udde i Hazael ratun Siria natete, wuṛṛu i Benhadad anangnge naola'a ratu.

²⁵ Ana see i Yoas ratun Israel namaddon Benhadad pa'atallu wuṛṛu nangul᷊e apia manga soa apan buatte niaṛṛon Benhadad sutempo Ratu Yoahas iamangi Yoas uaparenta.