2 MARARATU 12 - WUKE SUSI WATTI'U AL᷊AL᷊USASSA

I Yoas ratun Yehuda

¹ Su tonna appitune i Yehu uaparenta su Israel, i Yoas naola'a ratun Yehuda. I tou uaparenta su Yerusalem 40 su tonnane al᷊annune. Inangnge aranne i Zibya wuassu Bersyeba.

² Wuassu tatantiron Imam Yoyada, i Yoas su al᷊o'engu pabbiaṛṛanne pallal᷊agune ma'al᷊uassa naungngu Mawu.

³ Tumba'u ma'asassilla, i tou tawe nanggohakku tampan pasasubbanna monganna, na'oman sara tumanange ta'e mangngonggolu sasamba wuṛṛu mannutunga amania isudde.

⁴ Su allo sambau i Yoas namago manga imam wuṛṛu nandolokki mangitou niapasahipunna roitta apan niasombanganna wuassu manga sasamba su Wal᷊en Mawu, mawae ete roitta wawaekka pina'ola'a sasamba, ara'e lai roitta apan nionggola aroddi.

⁵ Suapan imam ṛinone uariaga roitta apan nionggolu manga taumata apan a'imbeanne. Roitta udde sarun ipaatta ipangapia saranapa apan nahohakka su Wal᷊en Mawu.

⁶ Na'oman sara tonna aruam pul᷊o tallune i Yoas uaparenta, manga imam taambe nanul᷊en saranapa apan nahohakka su Wal᷊en Mawu.

⁷ Ana waugu udde i Yoas namago si Imam Yoyada wuṛṛu manga imam baine, wuṛṛu nabbisara, “Anio i yamiu taambe lai nangapia Wal᷊en Mawu? Manattakka orassa indi yamiu taambe iwala manahipunna roitta apan niasengkami yamiu. Sarangkanambone ṛinone itantilli yamiu ipangapia Wal᷊en Mawu.”

⁸ Manga imam ma'apulu tawe mangammulu roitta wuassu tumana'u soa, wuṛṛu lai ma'ielen baga su pangangapia Wal᷊en Mawu.

⁹ Ne Yoyada nanganu sambau kase, wuṛṛu niloṛṛanga su lal᷊uumme, ana see niaddo maranin mezbah su samba'a uanannu ngara sasuttanna su Wal᷊en Mawu. Anambon doitta apan ia'onggola su Wal᷊en Mawu nitaṛṛo manga imam apan uariaga su ngara sasuttanna.

¹⁰ Masokka napawe roitta sulal᷊ummu kase udde manambote, mamamoṛettu ratu suadio'a ringannu Imam Bahewa rumanta wuṛṛu mandeengu roitta udde, ana see pi'unanna.

¹¹ Napawe reengannu roitta buatte niwoṛetta, roitta udde itantilla su manga mandariaga manara mangangapia Wal᷊en Mawu. Wua'udde manga mandariaga namaekka manga wasen kalu, wase ma'aola'a wal᷊en,

¹² wasen batu, wuṛṛu manganguitta watu. Manga mandariaga udde lai namalli alu wuṛṛu watu, see lai nangatokku anambon doitta apan niapasabbanga pinangapia wal᷊en udde.

¹³ Arawe roitta udde tawe saran kadio'a nipaata pina'ola'a manga mangko sal᷊a'a, mangku, trompeta, saranapan sasol᷊oanna ara'e saranapa waine wuassu wul᷊awanna ara'e sal᷊a'a.

¹⁴ Sarangkanambone niwaekka su manga wase wuṛṛu nipamalli manga aola'u wal᷊en apan pappandumanna.

¹⁵ Manga mandariaga manara udde tawe awusune, nariaddi tate lai maiwal᷊on doitta nipaatta wuassi mangitou.

¹⁶ Roitta wuassu sasamba pinallanna'a ariegianna wuṛṛu sasamba aampunga rosa tawe itaṛṛo sulal᷊ummu kase udde. Roitta udde ionggola su manga imam.

¹⁷ Sutempo udde i Hazael ratun Siria namangalo wuṛṛu namanua su soa Gat. Ana see i tou piate pandumma inai lai mamangalo Yerusalem.

¹⁸ Ne i Yoas napaapiddu roitta wawaekke. Roitta udde niasombanganne wuassu anambon sasamba apan dorone buatte tinantilli Yoas sassane, wuṛṛu i Yosafat, Yoram wuṛṛu i Ahazia su Mawu, eteudde manga ratu apan uaparenta dorone wuassitou. Wuṛṛu lai wuassu anambon bul᷊awanna sulal᷊ummu kase su Wal᷊en Mawu wuṛṛu wal᷊en araratuanna. Ne i Hazael tate nariaddi namangalo Yerusalem.

^19-21 Wua'udde manga mamanaran araratuannu Yehuda na'ammula lumawanga si Ratu Yoas. Ruan katou wuassu wallati mangitou, eteudde i Yozakar ana'i Simeat, wuṛṛu i Yozabad ana'i Somer, namate si Yoas su sambau wal᷊en apan niapararisikka su leta'a niombo su samba'an sa'in Yerusalem, su lal᷊anna sumossoka watukku Sila. I Yoas nilabbinga su labbingu marartun su Soan Daud. I Amazia anangnge naola'a ratu nallol᷊ossa si tou. Watti'a waine su ola'i Ratu Yoas niwoṛṛetta sulal᷊ummu wuke Watti'u mararatun Yehuda