2 MARARATU 11 - WUKE SUSI WATTI'U AL᷊AL᷊USASSA

Ratu wawine i Atalya wuassu Yehuda

¹ Napawe i ratu wawine i Atalya naasingkatta manungku Ratu Ahazia, anangnge, natete, i tou namarenta tadea'u amonanni Ahazia sarangkanambone pateanna.

² I Yoas ana'i Ahazia aṛingkenne'e niapate lai suadio'a ringannu manga parinsin datu waine, arawe i tou naatal᷊anga ana waugu niapasal᷊amatti Yoseba tuṛṛangu inangene. I Yoas wuṛṛu mandariagane niapidda wuṛṛu niwuni su sambau wabbo'a sulal᷊ummu Wal᷊en Mawu.

³ Annumu tonna al᷊annune i Yoseba uapadul᷊i ana'a udde sulal᷊ummu Wal᷊en Mawu su tempo i Atalya uaparenta naola'a ratu wawine.

⁴ Su tonna appitune manga mandariaga ratu wawine wuṛṛu manga mandariaga wal᷊en araratuanna niwagoanni Imam Yoyada iapasasomban tou su Wal᷊en Mawu. Poiaroddi i tou nandolokki mangitou niapasalu tadea'u mapaamattu ṛiinne. I tou namasilon Yoas parinsin Datu Ahazia, si mangitou,

⁵ wuṛṛu nangonggolu parenta indi, “Amungkangu i yamiu mammanara su allon Sabat, sepere tatallu wuassi yamiu ṛinone mandiaga wal᷊en araratuanna,

⁶ sepere tatallu lai su ngara Pasallangannu Sur, wuṛṛu lambene su ngara pasallanganna su liuddu manga mandariaga waine.

^7-8 Siri ruan pul᷊o appata apan namallosu manara su allon Sabat, ṛinone pandiaga su Wal᷊en Mawu ringannu hal᷊ele sasawutanna ipandiaga si Ratu Yoas. I yamiu ṛinone mandiaga si tou suapan i tou umamatta, wuṛṛu suapan taumata apan maapulu mangundanin tou, ṛinone pateanni yamiu.”

⁹ Manga tembonannu tantara udde uararingikka parentan Yoyada wuṛṛu nangapidda ringanni tou tantaran mangitou apan ṛinone mammanara wuṛṛu mamallossu manara su allon Sabat udde.

¹⁰ Yoyada nangonggolu wangkao su manga tembonannu tantara wuṛṛu manga allungngi Ratu Daud apan sasahipunanna su Wal᷊en Mawu.

¹¹ Ana see manga mandariaga, sangkatou-sangkatou ringannu hal᷊ele sasawutanna, uariaga sutampa mangitou uapal᷊iwutta su saruannu Wal᷊en Mawu, ipandiaga ratu.

¹² Wua'udde i Yoyada nangapiddi Yoas su liudde, ana see nangaddon araposan araratuanna su puane, wuṛṛu nanantilla si tou wuke Titan Mawu Ruata. I Yoas nitenega naola'a ratu wuṛṛu olange udde nial᷊iata su anambon tumana'u soa. Sarangkanambone nattal᷊o'appa wuṛṛu naggahio, “Wiakke ratu!”

¹³ I Ratu Atalya naaringikka hion manga mandariaga wuṛṛu tumanangnge. Ne i tou inaite nasasaṛawutta watukku Wal᷊en Mawu, su tampa padduluannu taumata.

¹⁴ I tou naasilo ratu apan wakku udde uarisikka su ngara sasuttannu Wal᷊en Mawu sutampa i tou nitenega, papal᷊iwutannu manga tembonannu tantara wuṛṛu mananiuppa trompeta. Tumana'u soa sarangkanambone hinumio lulluassa lapiddu napatuntungikku trompeta. Ringannu sussinggawanga i Atalya nanggesa'a laungnge, wuṛṛu nangintul᷊i “Lal᷊obossa! Lal᷊obossa!”

¹⁵ I Yoyada tawe namalan Atalya pateanna maranin Wal᷊en Mawu, nariaddi i tou nabbisara su manga tembonannu tantara, “Apira'e i tou sumabbanga sumabbi warisannu mandariaga wuṛṛu patete suapan pia taumata apan maannamma manal᷊amatta si tou.”

¹⁶ I mangitou nanametta si tou, ana see niapidda watukku wal᷊en araratuanna. I tou nipate poiaroddi su saruannu ngara Pasallangannu Awal᷊o.

I Yoyada na'ola'a pallal᷊imbakku

¹⁷ I Imam Yoyada nandolokki Ratu Yoas wuṛṛu tumanangnge niapaola'a pa'aire su Mawu manungku i mangitou maola'a al᷊aṛṛana'u Mawu. I tou lai nandolokku ratu niapoala'a pa'aire ringannu tumanangnge.

¹⁸ Wua'udde tumanangnge tinumal᷊anga wuṛṛu nanggohakku kuilli Baal. Mezbah see lai manga paal᷊uanne niṛṛimunsa'a, wuṛṛu i Matan imammi Baal nipate su saruannu manga mezbah-mezbah udde. I Yoyada nangatokku mandariaga iapariaga Wal᷊en Mawu,

¹⁹ ana see i tou suadio'a ringannu manga perwira arae, manga mandariaga ratu, wuṛṛu manga mandariaga wal᷊en araratuanna see lai tumana'u soa sarangkanambone namantuga amatanni Ratu Yoas wuassu Wal᷊en Mawu naddatingngu wal᷊en araratuanna. I Yoas sinumutta wuassu Sasutannu Mandariaga, ana see niuma'iante su adderan araratuanna.

²⁰ Tumanangnge sarangkanambone lullala'a, ne soa mal᷊angngante wuṛṛu i Atalya buatte nipate.

²¹ I Yoas uukke pitu tonna sutempo i tou naola'a ratun Yehuda.