2 MARARATU 10 - WUKE SUSI WATTI'U AL᷊AL᷊USASSA

Papapulunni Ahab nipate

¹ I Ratu Ahab uatahuanna pitun pul᷊o ana'a wuṛṛu pulunna su soa Samaria. Ana waugu udde i Yehu ningirimmu suratta watukku Samaria, su manga mabawuwunna ana'a wuṛṛu pulunni Ahab wuṛṛu su manga piaṛṛange ana see su manga tembonannu soa udde. Tingikku suratta udde arendi,

² “Ana'a wuṛṛu pulunni Ahab sulal᷊ummu lu'addi yamiu, wuṛṛu i yamiu pia keretan pangalo, awal᷊o, lutanga wuṛṛu soa pia tatandange watu. Ana waugu udde, paal᷊ihakke napawe i yamiu naasengkamma suratta indi,

³ pamilete apianne wuassu ana'a wuṛṛu pulunni Ahab udde wuṛṛu angkatte maola'a ratu, ana see paaṛṛimadde mammamanara ana waugu i tou.”

⁴ Manga piaṛa'u Samaria nata'utta. I mangitou nabbisara, “i Ratu Yoram wuṛṛu i ratu Ahazia lai tawe maatottola si Yehu, nangillembote lai i ite!”

⁵ Ana waugu udde tembonannu wal᷊en araratuanna wuṛṛu tembonannu soa suadio'a ringannu manga matatimmadu soa wuṛṛu manga mabawuwunna ana'i Ahab udde nangirimmu watti'a indi si Yehu, “Yami uasuṛṛubbawa si Tuanga wuṛṛu walate i Tuanga mandolokki yami. Yami tawe mamile sisai-sai maola'a ratu. Ola'e apa apan mapia tumuṛuttu aellegi Tuanga.”

⁶ Ana see i Yehu nangirimmu suratta apia si mangitou, tingikke, “Amungkangu i yamiu uasamba'a si ya'u, wuṛṛu walate i ya'u mandolokka, manungku patete ana'a wuṛṛu pulunni Ahab udde, ne tiṛṛabbi tempone ereindi lai apira'e manga puan mangitou si ya'u su Yizreel.” Siri pitun pul᷊o ana'a wuṛṛu pulunni Ratu Ahab udde uatana'a ringannu manga matatimmadu soa su soa Samaria, wuṛṛu bawuwunanni mangitou.

⁷ Napawe naasengkamma suratta wuassi Yehu, manga matatimmadu soa Samaria udde namate siri pitun pul᷊o ana'a wuṛṛu pulunni Ahab udde ana see manga puan mangitou nitaṛṛo su so'anna wuṛṛu niuntudda si Yehu su Yizreel.

⁸ Napawe olange udde niapasingkatta si Yehu, i tou namarentate tadea'u manga pua udde iatokka maola'a darua ombone su sasuttannu soa, wuṛṛu iwala isudde ma'oman sara marua allo.

⁹ Marua'allo atonna i Yehu sinumabbangke watukku ngara pasallanganna, ana see nabbisara su manga taumata apan uaammula isudde, “Ete i ya'u apan suadio'a naammula mando'appa si Ratu Yoram wuṛṛu namate si tou; i yamiu tawe sal᷊ane su hatto udde. Arawe anambon taumata indi wal᷊ine i ya'u namate.

¹⁰ Indete tatialane manungku sarangkanambone apan niwisaran Mawu su ola'u ana'a wuṛṛu pulunni Ahab sarun matipussa. Mawu buatte napaamattu wisara-Ne si Elia allang-Nge.”

¹¹ Wua'udde i Yehu namate anambon tuṛṛangi Ahab waine apan uatana'a su Yizreel, wuṛṛu anambon mamanarane, manga hawene, wuṛṛu manga imam; tawe sangkatou apan niwala wiakka.

Tuṛangi Ratu Ahazia nipate

¹² I Yehu nanantangu Yizreel ana see inaite watukku Samaria. Su tangngan dal᷊anna, su tampa apan isassago “Ampungngu Mallal᷊u'adda”,

¹³ i tou nassomban siri pira manga tuṛṛangi Ahazia ratun Yehuda. I tou naiwal᷊o, “Isai i yamiu?” “Yami tuṛangi Ahazia,” sasimbakki mangitou. “Yami inai watukku Yizreel mattembo anambon amonannu ratu wuṛṛu ana'a, pulunni Izebel.”

¹⁴ “Samette ta'e wiakka i mangitou!” parentan Yehu su tantarane. Ne manga taumata udde nisamette, ana see nipate maranin paṛihi mamara, sarangkanambone appatu pul᷊o dua su atoune. Tawe saran sangkatou apan niwala wiakka.

Tuṛṛangi Ahab sarangkanambone nipate

¹⁵ I Yehu nanassukku amatanne. Su tangngan dal᷊anna, i tou sinal᷊ohoanni Yonadab ana'i Rekhab. I Yehu nattabea wuṛṛu nabbisara, “Wal᷊inewe i ite naungnga sambua? I'o maapuluwe mallal᷊ima si ya'u?” “Ore,” sasimbakki Yonadab. “Amungkangu aroddi, wette iaddua ma'a'agasse lima,” sasimbakki Yehu. Ne itarua na'a'agasse lima, wuṛṛu i Yehu nantul᷊ungi Yonadab sinuma'e sulal᷊ummu keretane,

¹⁶ lapiddu nabbisara, “Wette tantalongke wuṛṛu pa'ellege sassane ereapa aṛṛimadde i ya'u massubba Mawu.” Ana see itarua suadio'a sinuma'e kereta watukku Samaria.

¹⁷ Napawe na'omate poiaroddi i Yehu namate anambon tuṛṛangi Ahab, tawe saran sangkatou apan nitantanga. Olange udde nariaddi nassul᷊ungu wisaran Mawu si Elia.

Manga masasubba si Baal nipate

¹⁸ I Yehu nandolokku tumana'u Samaria na'ammula ana see i tou nabbisara, “I Ratu Ahab malassa mattaṛṛamawu si Baal; i ya'u sarun maola'a aṛṛimaranne wuassi tou.

¹⁹ Ana waugu udde ammul᷊a'e anambon nabin Baal wuṛṛu masasubane ana see lai manga imam; tawe sangkatou tantange. I ya'u sarun mangonggolu sasamba apan wahewalla si Baal. Isai tawe nirumanta sarun pateanna.” Arawe udde tumba'u ola'u wisara wuassi Yehu ipamate anambon masasubba si Baal.

²⁰ I Yehu nangonggolu parenta indi: “Ṛaea'a sambau allo sassane ipassuba si Baal!” Ne taumata naṛṛaeten allo udde

²¹ wuṛṛu i Yehu napaal᷊iata su ahewallu Israel. Ne su allo udde nirumantate anambon masasuba si Baal, tawe saran sangkatou tantange. I mangitou sinumutta su wal᷊en Baal wuṛṛu namene wal᷊en udde wuassu saruanne na'oman sara liudde.

²² I Yehu namarenta tadea'u manga mabbawansala manga laubbu sasutta su kuil udde mangonggolu manga laubba udde su manga taumata apan rumanta mattaṛamawu si Baal. Napawe parenta udde buatte niapaamatta,

²³ I Yehu sinumutta su wal᷊en Baal udde suadio'a ringanni Yonadab ana'i Rekhab, wuṛṛu nabbisara su manga taumata poiaroddi, “Parikisete ringannu maannuda, ara'e mauddupa, sarangkanambone apan nirumanta indi tumba'u masasuba si Baal. Arie ma'oman sara isindi pia taumata apan massuba Mawu.”

²⁴ Ana see i Yehu wuṛṛu Yonadab nangonggolu sasamba si Baal. Su liuddu wal᷊en wahewalla, i Yehu buatte nangaddon 80 su atoune mandariaga wuṛṛu tembonannu tantara. I tou lai buatte nangonggolu parenta indi si mangitou, “I yamiu ṛinone mamate anambon taumata udde. Isai apan napaatal᷊angu sangkatou wuassi mangitou, sarun pateanna!”

²⁵ Tawe nal᷊annu napawe i Yehu buatte nangonggolu sasamba, i tou sinumabbanga wuṛṛu nabbisara su manga mandariaga wuṛṛu manga tembonannu tantara udde, “Suttate wuṛṛu patete i mangitou sarangkanambone. Arie pabbala'a pia sangkatou apan maatal᷊anga!” Ne i mangitou sinumuttate ringannu hal᷊ele sasawutanna, wuṛṛu namate anambon taumata isudde, ana see namol᷊enga manga winal᷊unanna udde su liudde. Wua'udde i mangitou sinumutta su wageangu lal᷊ummu kuil,

²⁶ wuṛṛu napasabbangu paal᷊uanni Baal ana see tinutungnga.

²⁷ Paal᷊uanna udde nihohakka susambau ringannu wal᷊ene, ana see tampa udde niola'a tampan lal᷊iasanna naddatingngu allo indi.

²⁸ Etearoddi i Yehu namaresi pasasubba si Baal su leta'u Israel.

^29-31 Ana waugu udde, Mawu nabbisara arendi si Yehu, “Al᷊awo'u parenta-U si'o apan nipa'ola'a su papapulunni Ahab buatte niolangngu. Ana waugu udde i Ya'u maddiandi manungku papapulunnu ma'oman sara aiappatu ṛawanne sarun maola'a ratu su Israel.” Arawe i Yehu tawe ringannu ahewallu naungnge tuttuṛṛuta Titan Mawu, Ruatan Israel. I tou nangaṛṛussa inolaanni Yerobeam apan naarosa taumatan Israel ringannu massubba sapi wul᷊awanna apan niola'a su Betel wuṛṛu su Dan.

Papaten Yehu

³² Sutempo udde Mawu nanatakke mangngadio'a wageangu leta'u Israel. I Hazael ratun Siria nangaṛṛo ahewallu wageangu leta'u Israel

³³ su samba'a ra'in Sal᷊ukku Yordan naddatingu timukka araune sarasoa Aroër maranin Sal᷊ukku Arnon, nasutta wageangu Gilead wuṛṛu Basan, tampa atatanaannu ruanganni Gad, Ruben wuṛṛu Manasye su samba'an ra'i.

³⁴ Watti'a waine su ola'i Yehu, nasutta inasaharannu awawaṛṛanine, niwoṛetta sulal᷊ummu wuke Watti'u mararatun Israel.

^35-36 I Yehu namarenta naola'a sangkatou ratu 28 su tonnane al᷊annune. I tou nate see wuṛṛu nilabbinga su Samaria. Ana see i Yoahas anangnge naola'a ratu nallol᷊ossa si tou.