2 KORINTUS 9 - WUKE SUSI WATTI'U AL᷊AL᷊USASSA

Sasumbala su taumata labissa Saṛṛani

¹ Ṛinone i ya'u lai lasa'e mamoṛṛettu suratta si yamiu su ola'u sasumbala apan tantal᷊anna niroho su walahannu Ruata su Yudea.

² I ya'u masingkata yamiu maapulu mantul᷊ungnga, wuṛṛu ya'u buatte nilumuassi yamiu su manga taumatan Makedonia. I ya'u nabbisara si mangitou, manungku ro'en tonna nal᷊iu manga tuṛṛangnga su Akhaya nasaddiate mangonggolu sumbala. Wuṛṛu apulunu udde naatohassa lai apulun sangkawageanganna wuassi mangitou.

³ Orassa indi ya'u nandolokki Titus wuṛṛu tuṛṛangnge ruang katou ringanni yamiu tadea'u apa apan ilalluassi yami su ola'i yamiu tawe maola'a awusu marasai. Nariaddi yamiu ṛinone nasaddiate, ana waugu i ya'u nabbal᷊o si mangitou i yamiu nasaddiate rumanta su manara udde.

⁴ I ya'u sussinggawangnga aṛṛengenne pia taumatan Makedonia apan tumantalongnga si ya'u su tempo i ya'u rumanta ringanni yamiu. Wuṛṛu amungkangngu i mangitou naaratingnga manungku i yamiu taambe naasaddia, uare asasili eteapa si yami, ana waugu i yami suete nabbal᷊o si mangitou manungku i yami lembo mangngimanna si yamiu! Wuṛṛu i yamiu sassane lai masili.

⁵ Ana waugu udde i ya'u mammendama ṛinone mandolokki mangitou udde ringanni yamiu malliu ṛoro ana see mapanaddia sasumbala apan suete pina'iren kamiu udde. Udde ta'u niola'a tadea'u amungkangngu i ya'u rumanta, aonggoli yamiu udde nasaddiate. Ringannu aroddi, nilumiatta'e manungku aonggolu udde nionggola ringannu naungnga mal᷊uassa wuṛṛu wal᷊ine ana waugu niwata'a.

⁶ Paanaunge! Taumata apan mangngasi'u wualanna mampaadio'a, sarun mangitingnga hessine adio'a lai. Arawe taumata apan mangngasi'u wualanna manambo-nambo sarun mangitingnga lai hessine manambo.

⁷ Suapan taumata ṛinone mangonggola tumuṛṛuttu al᷊al᷊uassu naungnge. Arie i tou mangonggola ringannu uapapadua ara'e ipabbawata'a, ana waugu Ruata mandangngu taumata apan mangonggola ringannu naungnga mal᷊uassa.

⁸ Ruata uataṛṛino mangonggola si yamiu al᷊amatta apan manambo-nambo, tadea'u i yamiu sidutu uatahuanna apa apan ipaapulun kamiu; wuṛṛu i yamiu lai sarun pia lebbene ipa'ola'a apapia wuṛṛu pasasumbala su taumata waine.

⁹ Sulal᷊ummu Wuke Susi uawoṛṛetta arendi su ola'u Ruata, “I Tou mannal᷊iawukka su taumata asiangnga; apapian naungnge uata'a saran mal᷊annu-l᷊annu.”

¹⁰ Ruata apan nanaddia wualanna su mangangasi'a wuṛṛu pabbawiakki ite. I Tou lai sarun manaddia wuṛṛu mapaanambon hessine apan niasi'i yamiu tadea'u hessin apapian naungngu aatambanna lai.

¹¹ Ringannu aroddi yamiu sarun maasuungnga sulal᷊ummu manga hausannu na'oman sara i yamiu sidutu wotongnge mangonggola ringannu naungnga mal᷊uassa. Wuṛṛu manga aonggoli yamiu apan tattahianni yami, ma'aola'a taumata nambo maadiangkamanna su Ruata.

¹² Ana waugu inolaanna mapia apan niola'i yamiu indi wal᷊ine tumba'u mannuungngu aurangannu walahannu Ruata, arawe udde ma'aola'a taumata nambo maadiangkamanna su Ruata.

¹³ Wuṛṛu wuassu apapian kamiu udde, manambo taumatan Saṛṛani su Yudea sarun maddalo Ruata ana waugu i mangitou naasilo tatuṛṛuti yamiu su Watti'u Al᷊al᷊uassa su ola'i Kristus apan tatantalonganni yamiu udde. I mangitou lai maddalo Ruata, ana waugu i yamiu naungnge mapia mattahia si mangitou wuṛṛu su anambon taumata waine sarannapa apan pia si yamiu.

¹⁴ Ne i mangitou sarun umal᷊iomanni yamiu ringannu apendammu darangngu ana waugu Ruata naung-Nge lembon mapia si yamiu.

¹⁵ Ṛinone i ite maadiangkamanna su Ruata ana waugu aonggole apan wahewalla udde!