2 KORINTUS 8 - WUKE SUSI WATTI'U AL᷊AL᷊USASSA

Roitta sasumbala wuassu manga taumatan Saṛṛani

¹ Manga tuṛṛangnga, i yami maapulu i yamiu maasingkata lai su ola'u ereapa apiane Ruata su manga jamaattu Makedonia.

² I mangitou buatte niannamannu manga asasusa apan mawakkata. Arawe su pattangngannu manga asasusa udde, i mangitou lulluassa, wuṛṛu naungnge masaṛṛionto'a ipangonggolu sumbala ipantul᷊ungngu taumata waine, salaiwe i mangitou asiangnga.

³ I ya'u wotongnge makkawessa manungku i mangitou nangonggolu ahewallu asombangi mangitou, ewe'e lai pia lebbene. Ringannu taweddu nandolokka,

⁴ i mangitou madorongnga si yami amungkangngu wotongnge i mangitou mantul᷊ungnga lai mangonggolu sumbala su walahannu Ruata su Yudea.

⁵ I mangitou nangonggolu mannamboanna wuassu apa apan aantimanni yami. I mangitou paarorone nanantillu watanganne su Mawu, wua'udde si yami lai, ere ipaapulun Duata.

⁶ Ana waugu udde i yami nandolokki Titus – apan nanattaku manara indi – tadea'u i tou manassu manara apan mapia indi su wallatti yamiu lai.

⁷ Yamiu apianne wuassu al᷊awo'u taumata; i yamiu apianne su ola'u pangangimanna, su ola'u mapaasabangngu ṛingidda, su ola'u asingkata, sulal᷊ummu al᷊awo'u hati manara, wuṛṛu sulal᷊ummu darangngu si yami. Ana waugu udde, mappianne i yamiu lai apianne sulal᷊ummu manara apan mapia indi.

⁸ I ya'u tawe nandolokka udde maola'a sambau parenta. Arawe ringannu namasilo aroddi aṛṛimadde taumata waine mantul᷊ungngu taumata sansul᷊ungnge, i ya'u lai maapulu maasingkata na'oman sara suapa, darangngunu.

⁹ Ana waugu i yamiu masingkata atonna manungku i ite lembon arangnguanni Yesus Kristus Mawun kite. I Tou ala, arawe i Tou nattingkaola'a asiangnga ana waugu i ite, tadea'u ringannu paa'asiangnge udde i yamiu maola'a ala.

¹⁰ Tumuṛṛuttu addapa'u, su ṛinone i yamiu manginsue manara apan buatte nitattaka tonna nal᷊iu. Ana waugu ete i yamiu apan paarorone naṛṛingidda wuṛṛu nanattaku manara indi.

¹¹ Orassa indi ṛinone i yamiu manassute manara udde tumuṛṛuttu auatannu. Ṛinone i yamiu maṛṛimadda manginsue manara udde, su ereapa i yamiu lai rorone maṛṛimadda maṛṛingiddu manara udde.

¹² Amungkangngu i yamiu maapulu mangonggola, ne Ruata sarun manengkamma aonggolu udde pinangiananne wuassu apa apan pia si yamiu, wal᷊ine pinangiananne wuassu apa apan tawe si yamiu.

^13-14 I ya'u atonna-tonna tawe pandumma mamallossu taumata waine wuassu winabbawane, wuṛṛu mammakkata si yamiu. Arawe ana waugu i yamiu orassa indi sulal᷊ummu asasuungnga, ne naṛṛinote i yamiu mapaasuungngu auranganni mangitou. Napawe i yamiu pia auranganne, wuṛṛu i mangitou su asasuungnga, ne i mangitou sarun mantul᷊ungngi yamiu. Ringannu aroddi ruang kawageanganna uatatul᷊ungnga.

¹⁵ Sulal᷊ummu Wuke Susi uawoṛṛetta, “Taumata apan pia darotongnge manambo, tawe lumebbe, wuṛṛu taumata apan darotongnge mattul᷊ungnga, tawe asueanne.”

Titus wuṛṛu manga hawene nirolokka suadio'a

¹⁶ Lembon maadiangkamanna i yami su Ruata ana waugu i Tou suete na'ola'a si Titus maṛṛimadda ere i yami mantul᷊ungngi yamiu.

¹⁷ Ana waugu Titus wal᷊ine tumba'u mal᷊uassa manipussu darorongngi yami, arawe i tou lai aroddi aṛṛimadde mantul᷊ungngi yamiu na'oman sara wuassu apulune sassane i tou nakkawessa rumanta ringanni yamiu.

¹⁸ Suadio'a ringanni tou i yami nandolokku sangkatou tuṛṛangnga apan aadatannu anambon jamaatta ana waugu manarane mammasingkatu Watti'u Al᷊al᷊uassa wuassu Ruata.

¹⁹ Wua'udde lai, taumata isassago'u udde suete nipile lai wuṛṛu nitantunu manga jamaatta ipandinganna si yami su amatanni yami. Ana waugu i yami sarun umamatta mamasingkattu sasumbala udde, tadea'u Mawu wantuhanna, wuṛṛu tadea'u i yamiu maasilo manungku i yamiu maapulu mantul᷊ungnga.

²⁰ I yami mateha-tehamma tadea'u tawe taumata mapaasal᷊an kami su ola'u padarorongnga sumbala apan wahewa indi.

²¹ I yami maddiri mangawusu wal᷊ine tumba'u su lantakku hati Mawu, ewe'e su saruannu taumata lai.

²² Suadio'a ringanni Titus wuṛṛu tuṛṛangnge udde, i yami lai nandolokku sangkatou tuṛṛangnge waine. I yami masokkate naannama si tou wuṛṛu inasingkatanna i tou sidutu maapulu mantul᷊ungnga. Wuṛṛu orassa indi, i tou maapulu mantul᷊ungngi yamiu, ana waugu i tou pia antimma wahewa si yamiu.

²³ Su ola'i Titus, i tou udde hawe'u, apan mammanara ringangku mantul᷊ungngi yamiu. Wuṛṛu su ola'u tuṛṛangnge darua udde, apan inai suadio'a ringanni tou, ete i mangitou udde taumata apan nirolokku manga jamaatta wuṛṛu naola'a sambau awawantugi Kristus.

²⁴ I yami mangantima i yamiu mapaal᷊iatta'u darangngunu si mangitou, tadea'u anambon jamaatta masingkata manungku i yamiu marangngu si mangitou wuṛṛu manungku apa apan ilalluassi yami su ola'i yamiu udde atonna.