2 KORINTUS 7 - WUKE SUSI WATTI'U AL᷊AL᷊USASSA

¹ Manga tuṛṛangnga apan arangnguanna! Anambon paaire udde tuddane si ite. Ana waugu udde ṛinone i ite mamaresi watanganni ite. Ṛinone i ite mata'uttu Ruata, tadea'u i ite wotongnge mabbiakka sassane hunan Mawu ringannu nasuungnga.

Al᷊al᷊uassi Paulus

² Sal᷊ohoite i yami sulal᷊ummu naungngu. I yami tawe nassal᷊a su sangkatou taumata, tawe taumata apan niwodoanni yami. I yami tawe saran paassa mangngal᷊iwun darotongngu sangkatou taumata lai.

³ I ya'u mabbisara aroddi, wal᷊ine ana see mapasal᷊an kamiu. Ana waugu ere buatte niwisara'u paarorone, i yami lembon marangngu si yamiu wuṛṛu ete i ite sanggaweanna ma'oman sara mate.

⁴ I ya'u mangngimanna atonna si yamiu. Wuṛṛu lai ya'u mal᷊uassa atonna si yamiu! Salaiwe i yami naasomba manambo asasusa, naungku nal᷊uassa ana waugu i yamiu. Naungku lembon lulluassa!

⁵ Napawe i yami na'omate su Makedonia lai, yami tawe naaillol᷊o. Wuassu al᷊awo'u inolaanna i yami naasomba asasusa: wuassu inolaanna waine pattatatiakka, wuassu naungnga sassane atata'utta.

⁶ Arawe aadiangkamanna, Ruata sidutu mannohassa naungngu taumata apan nial᷊iwune, i Tou nalluassa si yami ringannu darantan Titus.

⁷ Naungngi yami nal᷊uassa wal᷊ine tumba'u ana waugu Titus nirumanta ewe'e lai ana waugu i tou nabbatti'a ereapa naungnge nal᷊uassa ana waugu i yamiu. I Tou namasingkata si yami manungku i yamiu maapulu atonna maisasomba'u; manungku i yamiu sussassilu pallal᷊agunu paarorone wuṛṛu orassa indi mal᷊uassa manamba'a si ya'u. Olangnge udde naal᷊uassa sia'u lai.

⁸ Salaiwe sura'u naasusa naungngu, i ya'u tawe sumassilla namoṛṛettu suratta udde. Atonna su tempo i ya'u naasilo manungku suratta wuassia'u udde naasusa si yamiu – salaiwe asasusanu udde tumba'u tal᷊an kadio'a – i ya'u sussassilla lai.

⁹ Arawe i ya'u orassa indi lulluassa – wal᷊ine ana waugu naungngu nasusa, ewe'e ana waugu asasusanu udde naawal᷊u pallal᷊agunu. Atonna asasusanu udde su lal᷊annu apulun Duata. Nariaddi, yami tawe namoddo si yamiu.

¹⁰ Ana waugu asasusa ereudde maawal᷊u naungnga apan mandantan asasal᷊amatta. Wuṛṛu taumata tawe sumassilla su olangnge udde. Arawe asasusa apan su lal᷊annu apulun taumata maawawa papate.

¹¹ Annama'a i yamiu panutukka, apa asombangani yamiu wuassu asasusa apan su lal᷊annu apulun Duata! Sombangnge eteudde i yamiu atonna-tonna maṛṛusahadda manilangnga apan mal᷊abukka! I yamiu naola'a maddantinu rosa, i yamiu mata'utta, i yamiu marangngu, i yamiu naola'a matohassa, i yamiu maapulu maṛṛuumannu taumata nassal᷊a! Sulal᷊ummu al᷊awo'u hatto indi, yamiu buatte napaal᷊iatta'a manungku i yamiu tawe nassal᷊a.

¹² Nariaddi, salaiwe i ya'u suete namoṛṛettu suratta udde, i ya'u namoṛṛetta, wal᷊ine ana waugu taumata nassal᷊a udde. Wal᷊ine lai ana waugu taumata apan uatataṛṛanga pasasal᷊a udde. I ya'u namoṛṛettu suratta udde tadea'u su saruannu Ruata i yamiu maatutukka sassane aroddi ahewalle naungngi ami si yamiu.

¹³ Ana waugu udde naungngi yami nal᷊uassa. Ringannu lulluassa, i yami lai lullala'a ana waugu naasilo lal᷊uassi Titus, naungnge lulluassa ana waugu i yamiu sarangkanambone.

¹⁴ I ya'u atonna suete namarabungan kamiu si tou. Aadiangkamanna, i yamiu tawe namansili si ya'u. Anambon apa apan suete niwal᷊on kami si yamiu udde atonna. Aroddi lai apa apan ipamarabungan kami su ola'i yamiu si Titus udde niatialanna atonna.

¹⁵ Orassa indi i tou lembon marangngu si yamiu ana waugu i tou mannaungnga ereapa i yamiu sarangkanambone tuttuṛṛutta piaṛṛangnge, wuṛṛu ereapa i yamiu manarimmatti tou ringannu maaddatta wuṛṛu matuṛṛuta.

¹⁶ I ya'u mal᷊uassa tassul᷊ungnge, ana waugu i yamiu aapangimananna su al᷊awo'u inolaanna.